1 Corintios 3 - Wounaan Meu

Cristo phidag gaai ãba phidkha nʉm

¹ Cristo gaaimua khodamnaan, pãraun chadcha mag Ẽwandam Akhaar aujierrab mamʉ, mua pod pãrag ya sĩi Ẽwandam iek athee nem khaug sĩsidʉm khʉʉnagamjo iekhaba, agtha sĩi mʉg jẽb gayam khĩirjug dʉi thʉnʉm khʉʉnagamjota iekhaajeejim. Wajapcharan Cristo iek khaugaag chaainjopai thʉnʉm khʉʉnagamjota iekhaajeejim.

² ¿Pãrau chaain bʉ̃rʉʉ aawai ooba aajẽ? Ewaa au khitʉmʉg nem thethem deeba sĩi jũdchodampaita deejemjo, ich agjota muajã pãrag nem jaau chirarrjã khaugju phithurg chukhu sĩejim. Khaugju phithurmta mua pãrag jaautarr akhiin, pãrau pod khaugbakham. Ĩsjã agtha phithurm nem chan pãrau pod khaugbam,

³ sĩi agtha parhoobam khʉʉnau khĩirjuajem khĩirjugta wai naawai. Pãarta wir aig pãach eepaijã agtha chikham nemjã pãach den apim khõsinaa jũrr chikham ipeer ahau khaphobaadep nʉmʉn, magan agtha sĩi õor parhoobam khʉʉnjopaita nʉm. Maguata amau nem waaujemjo pãraujã agtha wau nʉm.

⁴ Merag chukhu, wa ãbmua “Mʉʉn Pablo deneu” jũrr magbaa ãbakhaíu “Mʉʉn Apolos deneugui” aadephʉm; jãg nʉm aig sĩi agtha ʉkhaba nʉm khʉʉn khĩirjug dʉipai naawai khabahab.

⁵ Pari pãrau pãachdeu mag nʉm wajapcha khĩirjukhiin, khai agá Pablo. Khai agá Apolos. ¿Am Ẽwandam chognaan sĩi i atheepai phidkha wenʉrrʉm khʉʉn khabá? Marau jaau wenʉrrʉm gaaimuata pãraujã maach Por Jesús iek ʉkhajierram. Pari maar pãar khãai atchajã khaba nʉm. Thum maach chi mʉg wenʉrrʉm khʉʉnaun ãba maach Por Jesuu maachig agdaujo nem jaaumarrdampaita wauwia nʉm khabahab.

⁶ Mag Jesús iek jaau nʉmʉn, muata nacha sĩi khajap nemjĩir chaar jĩir nʉmjo jĩirbajieb. Magbaawai Apoloou jũrr ag ee do choobarmjo ajim, obermkhĩir. Mamʉ mag nemjĩir chaarjo oberwia pãar ee aaidʉtarrjã ich Ẽwandamauta aaidʉpijim, ich iek aawai.

⁷ Wajapcha oowai, chi nacha jĩirtarr khʉ ni chi ag ee do choo sĩerrjã maadeu nem igba sĩsidʉm. Mamʉ chi ich iekta nemjĩir daujo oberpiwia aaidʉpiejemʉn ich Ẽwandamau.

⁸ Magua sĩi i iek nacha jaauchetarr khʉʉn awiajã sĩi ag khur jaau wenʉrrʉm khʉʉn dʉi ãba nʉm; ni iwiir ãbjã ʉ̃rʉʉ khaba sim. Mag naab mamʉ agdaujo dich phidkhamarrpierr Ẽwandamau par khabaju.

⁹ Wajapcha oowain maran sĩi i juag oojem khʉʉnau, i iekdam jaau nʉm gaaimua ich dʉita khapeerkhanaa ãba phidkha naawai. Maagwai pãar sĩi chi phʉajẽbjota nʉm. Maagwai ich Ẽwandamauta ag ee nemjĩir jĩirkhamam, pari mag nemjĩiran ich iekhau. Wa magbam khai, sĩi dijota nʉm. Pari mag di agjo ich Ẽwandamauta eu arrum.

^10-11 Wajapcharan mʉʉn sĩi ich Ẽwandamauta di eu nʉm khʉʉn den chi maestro khapibarmjo arr aawai muata ich Ẽwandam iek jaau nʉmjã warrpem chi dibʉ jukhabarmjo ajim, jãga Ẽwandamau maach peerdʉ aaujẽ a jaau chirʉmua. Maagwai deeumua jũrr ag ʉ̃r warag eumam, mag mua jaautarr ʉ̃r warag jaaumamua. Mamʉ mag mua nacha jaautarrjo khaba deeum iek jaauju khaba sĩewai chi ag ʉ̃r warag jaau nʉm khʉʉnaujã warre wajaphata jaauju aai nʉm. Mag mua chi dibʉjo jukhajim a chirʉmʉn, Jesucristoou maach peerdʉajem iek igwiata mag chirʉm.

¹² Mag Jesucristo iekta chi dibʉjo nacha jukha sĩubarm ʉ̃rʉn chadau maadeu dichdeu khõchagpierr sĩi khajap di eu nʉmjo warag i iekta jaauju aai nʉm. Di wajapham eunaa da jẽeupiba aag khai, dipá wajaphamta phewia, wa nem parhẽphʉm khãijã per aunaa warre wajaphata eu sĩuju aai nʉm. Wa magba khũchpaim athee khai, sĩi khõmariipai dikher den wa choobʉ den khãijã euju aai sim.

¹³ Mamʉ mag di ewaag nem khĩir pogkhe igwiajã, ya ich Cristooucha maachig jaaubarm edta khap aju, wajapha phidkhajĩ wa aai phidkhabajĩ. Mamʉ mag khap aagan, sĩi õtdau uu pierrumuata thũr phaa nʉmjo õt ee ich Ẽwandamaucha phaa oomamuata maadeu nem waaujerrpierr maach chach oomamua khap apiju.

¹⁴ Maigta khap aju, khan khĩirjug auwiata Ẽwandam athee mag nem waujĩ. Ãbmua di eutarr gaaita chadcha õtdau uu thʉnarrjã paba ʉu ãwatbapʉimʉn, magan mag chi di eutarr khʉʉgjã ich Cristooujã nem wajapham deeju, ich athee nem wautarr jũrr.

¹⁵ Mamʉ mag irua di eutarrta sĩi õtdau khierrjã ãwatba uu thʉnʉʉ awia pa obaademʉn, magan ich chi di eutarr wounan peerdʉwiajã, peer ichpa phaapʉitarrjo sĩi ich jua pariita peerdʉju. Pari chi phidagan thumaa okhooju.

¹⁶ ¿Pãrau khaugba nʉ, pãach thum ãba Ẽwandam sĩejem dikha nʉm? Magua khabahab ich Ẽwandam Akhaarta pãar ee sĩejem.

¹⁷ Mag pãach thum ãba Ẽwandam dikha naawai o ãba nʉmua wajapha i di ʉʉrkhabat, wajapcharan pãach morma. Magba jãg pãar ee ãbmua “mʉʉn mag deneu” wa “mʉʉn mag igarta chirʉm” aadephʉm aiguin, sĩi di magreunaa chi dipá parhooba aaiphur werppʉi nʉmjota naabahab. Mag pãach o ãba khaba nʉm paar chan Ẽwandamau par daúapai oobaju pãar gaai.

¹⁸ Oob wir aig pãachdeupai pãach khũgurmiet. Ãb khãijã pãach ee sĩi mʉg jẽb gayam khĩirjug nem khaug chirʉm awia ichta chi khaphʉm a sim khai, magan warag sĩi khaugbamjota aju aai sim, jũrr chadcha ich Ẽwandam khĩirjugchata khaugaag.

¹⁹ Ẽwandamagan mʉg jẽb gaaipaim khĩirjugan sĩi warag õor lokiepiejem khĩirjugau. Magʉm khĩirjug igwia Ẽwandamau ich i jaaumienag phãpitarr gaai mag sim: “Muan mʉg jẽb gayam khĩirjug khaugkham khʉʉnjã amach khĩirjug khaug gaaimuapai imeraa phithurg chukhu pʉr auwia khaibag ee päaijem” a sim Ẽwandamau. (Job 5:13)

²⁰ Ich mag iek igwiapai ĩchab ich iek phã sĩsidʉm gaai ich Ẽwandamaupai, “Jãg mʉg jẽb gayam khĩirjug athee chi machnaan anʉm khʉʉn khĩirjugjã jãg sĩi lokoom khʉʉn khĩirjugkha sĩsidʉmʉn pãar Poroun wajappha khaphʉ wai sĩejem” a sim Ẽwandamau ich igwia. (Sal. 94:11)

²¹ Magua mua pãrag mag chirʉm: Ni ãbmuajã maestro ãb khãijã ichta chi khaphʉm awia magʉgpaita ee aju khaba sim. ¿Jãgwia? Am amach thum Ẽwandamau sĩi pãrag ich i jaaumkhĩirta pʉitarr khʉʉn aawaima; mag sim jãga mag iwiir ãbpai khõsi abarju.

²² Magua mʉ, Apolos, Pedro, ajapcharan maach thumwe pãach den khabahab; mʉg durr maimua cha maach iyʉʉ nʉmjã agjo mʉg atag pawiajã nem thum thʉnʉmpa pãach den khabahab.

²³ Mag maar pãar den aawai maach thum pãachpa jũrr Cristo den khabahab. Maagwai Cristo jũrr Ẽwandam den.