1 Corintios 16 - Wounaan Meu

Ofrenda dee nʉm

¹ Pãrau khaphʉ nʉm, jãga mua Galaciapienagjã jaaupʉijĩ. Magtarr aawai jãg Cristo gaaimua maach khodnaankha thʉnʉm khʉʉn athee pãach eejã agjo phatkhon phiebat.

² Domighed paawai agdaujo pãachdeu ganmampierr phiepetat; maagwai ya wai naawai, mʉ barbaimaawaita eeupemjo mag phatkhon jʉrjʉr abaju.

³ Ya pãach aar mʉ barbaimaawai pãrau õor jʉr auju; makhʉʉnta mʉchdeucha pʉiju, maach khodnaan Jerusalenpien athee mag pãachdeu phatkhon jʉr phietarr deen mamkhĩir. Amach dʉipai ĩchab ẽsap phãnaa deepʉiju. Ag gaai pãrau jaaupʉiju, mʉg chi phatkhon arr nʉm khʉʉnan maachdeucha jʉr auwiata pʉi nʉm khʉʉnau a khap amkhĩir.

⁴ Mʉchdeu oowai mʉchjã am dʉi maju aai chirʉm khai, magan mʉchdeuta am phe arrju mag phatkhon deen.

Pablo Corintoog maju khĩirjutarr

⁵ Pãar oon mamua Macedoniapien ee mʉ dichju. Okhar mag phʉʉrdʉmamuata Corinto barju, pãar aar.

⁶ Tale pãar aig mʉ khãaidam khapanaa khãijã chiraimaju, pari agtha wajappai khaugba chirʉm. Ichaau pamʉn, jãig pãar aig chirʉmua ideu mʉch gaai noseg jaar dichpiju. Maimua ya dochʉumie burrbaadeewaita mʉch majuug mamkhĩir, mag tale pãrau mʉrʉg jap ee mʉchdeu nemdam igju thumaa phedeepʉiju.

⁷ Mamʉ mʉʉgwaiwe chan mabam. Sĩi pãar aig dichmapha chiraawai maach Por Jesuu khõs amʉn mʉch odiiwan pãar aig dʉrrʉʉ chiraimaju khĩirju chirʉm.

⁸ Pari ya mʉg phiesta Pentecostés burrju gayaa pamaawai ich mʉig Efeso phobor ee chirʉmua warag phiesta dichpiju.

⁹ Maach Por Cristo iek jaau chitʉm gaaimua õor khapankham khʉʉnau mʉ khõchkhaba thʉnaab mamʉ, mua magʉmjã igba warag jaauju, mag maach Por athee phidkha nʉmua i iek jaauju ayaa oo wai chiraawai. Magua pod phiesta nawe chan mʉ mabam. Mua khaphʉ chirʉm, mag mua jaaubarm chi ũr nʉm khʉʉnaujã sĩi par jʉ̃gʉupai ũrbaju.

¹⁰ Pãach aar Timoteo barimaawai i dʉi wajapha abat, ichjã ĩchab pãach ee aairaa chiramkhĩir. Magaag ĩchab ijã mʉjo maach Por Cristo iek jaau nʉm phidagta jaau khitaajem.

¹¹ Iwiram ãbmuajã oob pãrau i kha isee amiet. Magju khãai irua nem igjudam thumaa irig deebapʉit, onee urumua mʉ oon beemkhĩir. Bʉ̃ʉrjã barcheba aawai tagam khʉʉn hermanonaan dʉi í nʉ chirʉm.

¹² Maach hermano Apoloogjã par mua pepet chirʉʉ ajim, warm khʉʉn dʉi pãar oon mamkhĩir. Pari magʉmjã maba, thʉba sĩsijim. Pari okhar ichdeu oowai maju ayaa abarm ed jam pãar aar i barju.

Pabloou Corintopienag salud deepʉinaa am wawitarr

¹³ Ãbmiecha paawai pãrag, “Pãach oomapha aajem khʉʉn dʉijã khĩir khaphʉnaa pãachdeu Cristo iek ʉkha nʉm gaaita ubʉ thierrkha nʉisit” a chirʉm. Ag iek gaaita emkhooinkhanaa nem jua theeg abat.

¹⁴ Pãach eepai nem waauwaijã, thumaa dich khapeen kha khõsinaa am ʉu apiegta nem waubat.

¹⁵ Cristo gaaimua khodamnaan, Corintopien. Pãrau khaphʉ nʉm, maach hermano Estefanata jam pãar aar Acaya durr nacha ich chaain dʉimua ich ʉʉipa mʉg maach peerdʉajem iek ʉkhajim. Mag ʉkhawia amach khĩrauta agjo ar ewag ʉkhamam khʉʉn juagjã oo nʉisijim.

¹⁶ Muan pãrag, “Jãgʉm wounaanau wa ijo Ẽwandam iek gaai phidkha nʉm khʉʉnau khãijã pãachig mag abaawai ag ipierraa abat” a chirʉm.

¹⁷ Mʉ onee chirʉm, pãar beeba nʉm ee Estefanaauta Fortunato dʉimua Acaicopa ʉu mʉ oon beetarr aawai. Pãachcha pod beebahab mamʉ, am pierrumua ʉu pãachchata pierrumjo abarm.

¹⁸ Ʉu chadcha amau mʉ thãar onee apiwia pãarjã ich agjo onee apiju, deeu pãar aar bardʉtkhaimaawai. Jãgʉm wounaanan chad pãrau chadcha pãach garmuajã bʉ̃ʉrjã chig abata wai naaju aai nʉm.

¹⁹ Mau Asia provincia ee iglesia nʉnʉidʉm eem khʉʉnaujã pãrag salud deepʉi nʉm. Aquiloou Priscila dʉimua salud deepʉi nʉm, maimua am deg hermanonaan culto waaujem khʉʉnaujã agjo salud aajem pãrag, pãarjã maach Por Jesucristo denkha naawai.

²⁰ Tagam hermanonaanaujã agjo thumaam khʉʉnag salud aajem. Pãach ãba biirdʉawai pãach khapeen dʉi agdaujo kha khõsinaa saludaabat.

²¹ Mʉch Pabloouchata pãrag mʉg saluddam mʉch juadamaucha phãnaa deepʉi chirʉm.

²² Ãbmua khãijã maach Por Jesucristo khõchkhaba sim khai, magan ichdeu khap chirá Cristoou jãga aju i dʉi ich beem ed. Maach Por Jesús, ¡deeu pidú!

²³ Pãar kõit maach Por Jesucristoog jeeu chirʉm, ichdeuta pãar dʉi ogdʉba ich mag pãar ʉu wai nʉrramkhĩir.

²⁴ Pãar thumaam khʉʉn mua khõsi chitʉm, maach thum ãba Jesucristo denkha thʉnaawai. Mʉgdampai ajim pãrag jaaum ig chirarr. Ayoo keena, Pablo