1 Corintios 15 - Wounaan Meu

Cristo meewia deeu phiidʉtarr

¹ Khodamnaan, pãrag khĩir eyaa apim khõsi chirʉm maach peerdʉajem iek ar na mʉchdeucha pãachig jaautarr. Ich mag iek ajim pãrau ʉkhawia ĩsjã ʉu agtha ag gaai ubʉ durrum.

² Ich mag iek mʉchdeu pãrag jaautarr gaaimua ʉu pãar peerdʉwi nʉm, majã chadcha ʉkhatarr khai mamʉ. Ich agtha pãar ag iek pʉaba ich mag i dʉi ubʉ nʉm khai, ʉu pãar chadcha peerdʉ nʉm.

³ Mʉchdeu ʉkhatarr iekta ya ĩchab pãragjã jaauwia chirʉm, jãga ich Ẽwandam iek phã sim gaai jaau simjo chadcha Cristo maach pekau gaaimua thõjĩ.

⁴ Mag i thõowia bep sĩutarr khãai thãrjup nʉm ee ũwaai maach ich mʉg phiidʉtarrjã ĩchab mua pãrag jaaujim. Mag i phiidʉjujã ĩchab ich Ẽwandam iek phã sim gaai ya ag nawe jaau sim.

⁵ Mua pãrag jaaujim, Pedroog ich oopitarr, ag khur doce ich dʉi ogdʉba wenʉrraajerr khʉʉnag ich oopitarr,

⁶ maimua ag khur ũmaai deeu ich iek ʉkha durrarr khʉʉn khapan quinientos atcha ãbam aig narr khʉʉnag ich oopitarr. Mag i ootarr khʉʉn ãaur khʉʉnan ya khechwia naab pari jãrrcha atcha agtha monakha thʉnʉm, mag amachdeu ootarr jawaag.

⁷ Maimua Santiagoogjã ich oopiwia thum ich dʉi ogdʉba wenʉrraajerr khʉʉnagjã ich oopijim.

⁸ Jãkhʉʉnan chadcha ya ich dʉi dʉrrʉʉ wenʉrraajerr khʉʉn ajim, mamʉ mʉʉn eeu ich iek ʉkhatarr edweta warre mʉrʉg ich oopiwia mʉ jʉr aujim. Maguama, mag mʉrʉgta ãbmiecha ich oopitarr aawai mʉʉn sĩi agtha khukhur chirʉwe thaabapʉitarrjota chirʉm.

⁹ Magtarr aawai Jesuu ich iek jaaumkhĩir ichdeucha jʉr autarr khʉʉn eejã mʉchta thumaam khʉʉn khãaijã serbiibacha chitʉm. Mag chiraawai mʉjã ĩchab ich Jesuucha ich iek jaaumkhĩir thʉ̃r autarrau a thʉ̃rju aai khaba chirʉm, i iek ʉkha durrum khʉʉn khaibag wawaagjã am ẽudee ẽkha chitʉʉ aajerr aawai.

¹⁰ Mag chitajieb mamʉ ʉu Ẽwandamau mʉ eeg oowi ĩs ich iek jaaujemkha wai sim. Mʉchta mʉch khapeen ich iek jaaumkhĩir ichdeucha jʉr autarr khʉʉn khãaijã ʉ̃rcha phidkhawia chirʉm. Mʉch juapadamau khabajim pari ichdeu mʉ juag oowiata ʉu chadcha mʉ dʉrrcha i athee phidkhabarm. Jãgan Jooirau parchata mʉ eeg oobajim.

¹¹ Pari mag chirʉm aig chan khaita ʉ̃rcha phidkhajĩ wa khaita pom phidkhabajĩ a chirʉm khabam. Maach thumaam khʉʉnau ichiita Cristo meewia deeu iiu phiidʉtarr iekta jaau nʉm; mag jaauwia pãrau ʉkhajierram.

Khechwiajã deeu phiidʉtkhaju

¹² Pari mag Cristo meewia phiidʉtarr marau pãrag jaaubaawai ʉkhatarrta, jãga ĩs ũurwai pãar eem khʉʉn iek mag õor meebarm chan tag phiidʉba aajem a jaau nʉm ũr chirʉ́.

¹³ Chadcha mag õor meebarmjã tag phiidʉba aajeekhiin, magan Cristojã agtha ich aukhertarr jẽbdeg sĩejeekham.

¹⁴ Mag Cristo chadcha iiu phiidʉwia ich mʉg oberba arr akhiin, cha marau i iek jaau wenʉrrʉmjã seukha chad khaba arrta jaau wenʉrrakham. Mag khai magan maadeu parta ʉkha nʉm.

¹⁵ Chadcha mag amau jaau nʉmjo õor meebarmjã meem iekta meejem akhiin, magan maraun seukhata Ẽwandamau Cristo phiriu aujim a jaau wenʉrrʉm, chadcha phiidʉba arrta.

¹⁶ Amau jaau nʉmjo mee nʉm khʉʉn tag bʉ̃ʉrjã iiuba nʉm khai, magan Cristojã meewia tag phiidʉbakham.

¹⁷ Mag Cristojã phiidʉba arr khai, magan parta pãraujã i iek ʉkhajierram. Mag akhiin magan pãran agtha pãach pekau eeta wenʉrraajeekham.

¹⁸ Mag i phiidʉba arr khai, magan ĩchab i iek ʉkha durrumua otarr khʉʉnjã amach pekau eepaita ich mag okhoo durrum.

¹⁹ Cristoou ich igar wenʉrrʉm jũrr maach ich aar auju a simjã, maach meewai chadcha ich aar aubamta mag sĩekhiin, magan ¿khan wajaug athee i gaaimua mʉg phithur wenʉrraajeekhajĩ? Mag akhiin maachta chadcha thumaam khʉʉn khãaijã parchata phidkha wenʉrrʉmjoo aajeekham.

²⁰ Pari Cristoon chadchata iiu phiidʉjim. Mag õor pom o nʉm ee ichta nacha phiidʉtarr gaaimua ewag pawiajã õor khapan ichjo phiidʉtkhaju jaau sim ajim.

²¹ Wajapcharan ich jãg warrjã õor ãbpaim gaaimua ewag pawiajã õor thum okhoo nʉisierrjo, ich agjo ĩchab woun ãbpaim gaaimuata ewag pawiajã õor iiu phiidʉtkhaju i gaaimua.

²² Ich jãg warrgarwe Adán gaaimua õor thum o derr aawai ich agjo ĩchab Cristo gaaimuapaita thum maachin ich mag iiu wenʉrraju.

²³ Pari majã sĩi parhooba khabam: Cristota nacha phiidʉjim; mag khur deeu ich pierrum edta i igar ʉkha durrum khʉʉnjã jũrr phiidʉtkhaju.

²⁴ Ya magbarm aigmuan chadau, Cristoouta mʉg durr thum ich khaibag dʉi ag gaai jua theeg thʉnʉmpa thum podpʉinaa jũrr ich Ẽwandam chi Ayagta nem thum jʉ̃apiju, ich mag chi Porkha sĩsimkhĩir.

²⁵ Pari mag ich Ayagta jua theeg thum jʉ̃apiju na, ich dʉi iekkhõr paraam khʉʉn thum ich jua eegar phe au nʉm ora ich Cristota mag ichdeu õor phe aumam khʉʉn Reikha sim.

²⁶ Mag ich dʉi iekkhõr paraam khʉʉn thum ich jua eegar phe athaawai, ãbmiecha paawai tag õor mee khaugba thʉnʉisiju,

²⁷ magamkhĩirjã ich Ẽwandamau thumaa Cristoogta jaau wai sĩewai. Mag nem thum irigta jaaujim anʉm chan, ich Ẽwandam chi Aaipata jũrr i jua eegar sim anʉm khabam. Ich Ẽwandam chi Aai chan pod i jua eegar aju khaba sim, warrjã ich Jooirauta mag nem thʉnʉm thum i jua eegar apitarr aawai.

²⁸ Maimua mag nem thum thʉnʉm Cristoou ich jua eegar phe athaawai ich Cristojã Ẽwandam Iewaakha simta jũrr ich Jooi jua eegar sĩsiju, ich Jooirauta warrjã irig jua theeg thum ich jua eegar phedeetarr aawai. Magbaawain chadau ich Ẽwandamta nem thum thʉnʉm khãaijã warag ʉ̃rpai sĩsiju.

²⁹ Mag Cristo iiu phiidʉbajim anʉmʉ magan ¿khanthee ãaur khʉʉnau jãg ya meetarr khʉʉn kõitjã amach por choopi nʉmma? Mag õor mee nʉm khʉʉn iiuba nʉm chan, ¿khanthee am kõit por choopi nʉmma?

³⁰ Mag Cristo iiu phiidʉba arr khai, magan ¿khantheeta maar jãg ed eepierr sĩi maach mod ʉmkha nʉmjo wenʉrraajemma i gaaimua?

³¹ Mag wenʉrrʉm gaaimua mʉchin edau ãspapakhampierrta tag pãar khĩir chitabajujo aadep aajem, chikhamnau dakhãwaau. Pãar Cristo igar nʉm gaaimua mʉch onee chirʉmjã meerba jaau chirʉm pãrag. Ich agjo mʉch peer õrau thõthõo aajem pãrag jaau chirʉmjã seukhaba chirʉm.

³² Dich khapeenpaijã khaibag sĩi maach khoojemjo sĩsidʉm dʉijã par iekhaupain Efeso phobor ee chadcha maar jãau nʉmjo aadep aajeejim, Cristo gaaimua. Pari chadcha õor o nʉmjã tag phiidʉba aajeekhiin, ¿khanthee mʉ mʉg chitʉʉ aju chad khabam athee? Mag akhiin magan am iekhõoin, “Keena, jopcha khechju nʉpí, magan warag thach khowia onee dojã dotarrau” aju aai nʉm.

³³ Pari mag khabam khodamnaan. Oob ar Jesús iiu phiidʉbajim a jaaujem khʉʉnag pãach khũgurpimiet. Pãrau khaugbá: “Khaigbam khʉʉn dʉi khapeerkhaawain maach wajapha chirarrjã ãrpäaijem” a jaaujem.

³⁴ Khĩirjug khaphʉ aajeethʉ̃. Mua ũr chirʉm, mag maach meebarm chan tag phiidʉba aajem a jaaujem khʉʉn pãach eepaijã thʉnʉm anʉm; mamʉ mag thʉnʉmjã pãar bʉ̃ʉrjã chigaa khabamjota aajerram, amag iekhabanaa sĩi ũrbamjo aawai. Pãrau khaugba nʉ, chi mag nʉm khʉʉn chan Ẽwandam igar khaba, ni bʉ̃ʉrjã i khaugba naawaita mag nʉm. Magʉm khʉʉn pãach ee wai naaba warre jʉrbapʉit. Mʉch iek ũrwia khĩir naaumkhĩir ĩs chadcha mʉ mag iekha chirʉm pãrag.

Jãga meetarr khʉʉnjã deeu phiidʉtkhaju khai

³⁵ Tale ãaur khʉʉnau amach odegpai khãijã, “Keena, jãg õor mee nʉmjã ¿jãgata phiidʉtkhaju khai? wa am phiidʉtkhaawai ¿am mor jãgata sĩsid aju khai?” a jeeuju, amach wir aigpai khãijã.

³⁶ Chi mag jeeu simʉn magan wajap khĩirjubanaata mag sim. Pãrau ooba aajẽ, jãga aajẽ nemjĩir dau jĩirwai. Par daúa oowai nemjĩir daudam jẽb eecha joothʉ kheerwai warre thõbaademjoo oojem. Pari mag thõbarmjo arrta, deeu tharrphebaademuata ũwaai kherdam paarpawia iiu khersiejem. Ich agjota thʉnaabahab maachjã; maach meewia jẽb ee aukheerwai mʉg atag deeu phiidʉtkhaju khʉʉn khabahab.

³⁷ Pãade mʉ seu awia arroz wa deeum nemjĩir dau khãijã jĩirnaa oobat: Mag nem jĩirwaijã warre chi bʉdamchata jĩirba, chi daudampaita jĩirjem.

³⁸ Mag obermamuata chi nemjĩir daupierr khĩir pogkhe obeerjem, Ẽwandamau warrgarwe ich mag derr aawai. Maachjã agjo meebarmuata mor iiur paarpa naabahab.

³⁹ Ich jãg nemjĩir dau khĩir pogkhe paraanaa pabʉjã khĩirpierr thʉnʉmjo, maach morjã khĩet sĩebahab, tagam nem dʉi. Nemchaain pabʉ eem morjã khĩet sim; nem ichpan morjã khĩet sĩewai ãwarr morjã agjo khĩet sim.

⁴⁰ Ʉ̃gtharmpeen morjã khĩet sĩewai, mʉg jẽb gayam khʉʉn morjã khĩet sim. Ʉ̃gtharmpeen amach ooimʉg khĩet wai naawai mʉg jẽb gayam khʉʉn ooimʉgjã khĩet sim.

⁴¹ ¿Pãrau oowai mʉg edau ãsdawam edau chi edaram dʉi khĩet sĩeba aajẽ? Ni phĩdagjoojã khaba sĩsidʉm. Amach chi phĩdag appaijã thum dau agdaujo wʉʉba, dau khĩet sĩsid aajem.

⁴² Wajapcha khĩirjukhiin, maachjã ich jãg nemjĩir jĩir nʉmjota naabahab ĩchab, mag meewia deeu iiu phiidʉajem a jaauwai. Khani maach meewai nemjĩir jĩir nʉmjo maach mor jẽb ee aukherbaawai sĩi beeurjem; pari mag meebarmua deeu iiu phiidʉbarm chan tag beeurbam.

⁴³ Mag bep sĩubarm chan tag bʉ̃ʉrjã maadeu igba sim. Pari magtarrta deeu phiidʉ sĩsiewain chadau sĩita ooihmʉ sĩsiju, magjo aju nem chan maadeu ooba aajem. Ya sĩi jua theegjã chukhu bep sĩutarrta jũrr phiidʉawain chadau juapa theegta phiidʉju.

⁴⁴ Maach meewain maach mordam cha maach iyʉʉ nʉmta jẽb ee maajem. Pari mag sim phiidʉawai chan ya tag mʉg mor khĩir khaba, ʉ̃gtharmpeen morkhata phiidʉju. Wajapcharan mʉig dich bi eem morjã paraa aawai ʉ̃gtharmpeen morjã ĩchab thʉnʉm.

⁴⁵ Ẽwandam iek phã sim gaai jaauwai, warrcha ichdeu ompaatarr woun Adán a thʉ̃r sĩerr ichdeuta iiupi aujim a jaau sim, magbarmua ewag pawiajã maach paarpa aumkhĩir. Pari ag khur Cristo pierrwai jũrr ich garmuata õor iiupie chaar iiupiejem, magbarmua ich gaaimuata ʉ̃gthar õor ober wenʉrramkhĩir. Mag Ẽwandamau Adanta nacha ompaatarrjo, jũrr Cristota nacha phiriu aujim, ichta ʉ̃gthar wetju khʉʉn den chi Porkha sĩsimkhĩir.

⁴⁶ Magtarr aawaita mʉg agtha eegar nʉweran ich mʉg mor maachdeu wai nʉm dʉipaita wenʉrraju. Pari mʉg atagta agjo ich Ẽwandamaupai maachig tag thõjã thõba aajem mor deeju.

⁴⁷ Nacharam woun Adán aajerran jẽb denta Ẽwandamau ompaa aujim, pari Cristoon jũrr ʉ̃gtharmuachata beejim.

⁴⁸ Maach mʉg agtha mʉg durr jooi gaai durrum khʉʉnan nacha mag jẽb den ompaa autarr ag mor khĩirta wai nʉm: pari ya ʉ̃gthar paawain ich ʉ̃gthar sim ag mor khĩirta wai naaju, Cristo mor khĩir.

⁴⁹ Ĩs ewag pawiajã agtha Adanag mor deetarr khĩirkha wenʉrrʉmjo, jãg nʉʉ awia jũrr ich Cristoou mor wai sim khĩirta maadeujã agjo wai nʉisiju.

⁵⁰ Pari cha mua jawaagpam wajapha ũrbat hermanonaan: Maach mʉg eegar aawai maach mordam mʉg khitʉm chan pod Ẽwandam sim aar oberbam. Maach mor mʉg bʉ̃ʉr abarmua dajẽkhu khitʉm chan pod Ẽwandam sim aar wenʉrraju khaba nʉm.

^51-52 Pari ũrbat, ĩchab agjo cha mua pãar jʉ̃gderraa jawaagpam: ma chan pãrau bʉ̃ʉrjã ũrba aajemʉu: Maach mʉg thʉnʉm khʉʉn thumcha chan khechbaju. Pari agtha khechba naawiajã, chadcha maach chi ʉkha nʉm khʉʉn mor mʉg simʉn, ãbmiecharam trompeta sirbarm dʉi sĩi mʉg maach dau phĩrbarmjo abarm ee, warre maach thumta mor iiur wai nʉisiju. Mag trompeta tẽe abaawaita nawe khechwia jẽb ee khekhed arr khʉʉnjã deeu phiidʉtkhaju, tag khechba ich mag iiu nʉisieg. Magbarm dʉi maagwai agtha maach chi monakha durrum khʉʉnjã deeum mor chi iiurigta paapʉiju ich Ẽwandamau.

⁵³ Magbaawai maach mor mʉg dajẽkhu khitʉmjã jũrr bʉ̃ʉrjã meeba aajemʉg pabaadem dʉi, tag beeurjã beeurba, sĩi ich mag sĩerraajemkha sĩsiju.

⁵⁴ Mag tag maach meejã khaugba thʉnʉisiewain chadau chadcha ich Ẽwandam iek phã sim gaai jaau simjo, “Mʉg atag paawai mʉch garmuata õor dajẽgpiejemjã podpʉiju” a simjo nʉisiju.

⁵⁵ Mag igwia ĩchab ich Ẽwandamau ich iek deeum ich iek jaaujemʉg phãpitarr gaai jaauwai, “Magbaawain chadau jãg õrau amach dajẽgju ogkhaajerrjã tag khĩirjuba nʉisiju” a sim, “chi maach dajẽgpiejerrjã ya tag jua theeg chukhu sĩsiewai.”

⁵⁶ Jooingarwe ley deetarr gaaimuata õrau amach pekau pooma wai nʉmua okhoojujã khaphʉ aajem, mag pekaúata nem jua theeg benen denjo õor meepiejeewai.

⁵⁷ Mamʉ ʉu maach Por Jesucristoou mag pekaúa õor okhoopiejem ich garmua podpʉitarr gaaimua ʉu maach i dʉi wenʉrrʉm, tag okhooju khaba. Mag nʉm dʉi mʉg jẽb gaaiwejã maachig ich jua theeg deejem, mag pekau jua theegag dich thʉ aupiba aag.

⁵⁸ Cristo gaaimua khodamnaan, mua chadcha pãar khõsi chitʉm. Magua mua pãrag, “Ich jãg i dʉi ubʉnaa chikhamnau chaaur nem jaau nʉmuajã pãach khũgurpiba, warag maach meewiajã deeu iiu nʉisijuuta khĩirjunaa i dau najã nem wajapha wau nʉm gaaita phidkhanaat” a chirʉm. Pãrau khaphʉ nʉm, ich athee maach mag phidkhabarmjã irua sĩi ich jãg par okhoopibaju.