1 Corintios 14 - Wounaan Meu

Ẽwandam Akharau deeum meu iekhapibaawai

¹ Keena, mua pʉaba deeu pãrag jaau chirʉm: Ãba dich khapeen kha khõsi ajuuta ʉ̃rcha ẽkhabat. Magnaan chadau ĩchab ich Ẽwandam Akharau dee sim juapajã aum khõsi aju aai nʉm. Pari bʉ̃ʉrjã õrau khaugbam meúata iekhaju khãai, ʉ̃rcha i iek deeum khʉʉnag jaau khaphʉ aagta pãach gaai wajapha ich jua theegdam deepim khõsi abat.

² Deeum meu iekhamamua khãijã irig jeeumʉn, nem wajaug sim ĩchab; pari mag deeum meu iekha simuan õrag ũrmkhĩirjã khaba, sĩi Ẽwandamag ũrmkhĩirpaita iekha sim aawai, chadcha ich Ẽwandam Akharau khĩirjug wajapham dee sim awiajã bigaaum khʉʉnau ni ãbmuajã khaugbaju, khan ata iekha sĩ.

³ Mag khãyau Ẽwandamau ich iek jaaupi simta jaau nʉrrʉm wounaun chadau chadcha warag bigaaum khʉʉnpata Ẽwandam Iek gaai am khĩirjugdam bãaupiwia, am khĩirjã onee apinaa ĩchab am wawijã wawí sim.

⁴ Pari magba deeum khʉʉnau magʉm meu khaugbag aigta amag ũrpimaaugaujo deeum meúata iekha simuan sĩi ichigpaita wir aig jaau sim. Mamʉ Ẽwandamau ich iek jaaupitarrta jũrr õrag ũrmkhĩir jaau nʉm khʉʉnaun chadau chadcha thumaa chi ʉkha durrum khʉʉnta warag Ẽwandam iek khaugpi nʉm. Mag amau nem khaug paaukhamam aig warag ag iek gaaita am khĩirjugjã bãaukha wetum.

⁵ Mʉrʉgan pãach thumaam khʉʉnau deeum meu pãachdeu khaugbam khãijã iekhakhiin ʉu sim. Pari mua oowai Ẽwandamau ich iek jaaupi sim jaau nʉmta wajapcha sim, sĩi jãg degolp deeum meúa iekha nʉm khãaijã. Mag iekhawiajã pari warm khʉʉnag khaphʉ amkhĩir deeu am meúa jaaumʉn ʉu sim, Ẽwandamau mag iekhapitarr thumaam khʉʉnag khakhapdo amkhĩir.

⁶ Pãrau oowai mʉch khãijã pãar aar mawia sĩi deeum meu pãrau khaugbamuata pãrag iekhabaimakhiinjã, “¿Khani jaau simʉ mag sĩma?” aju pãrau. Mamʉ pãrag wajapha khap amkhĩran, pãar meúata jaauju aai chirʉm: Ẽwandamau pãrag ich iek jaaupitarr, wa mʉg atag irua maach dʉi aju, wa Ẽwandam khĩirjug khãijã khĩir pogkhe jaauju aai chirʉm. Magan chadau pãrau khaphʉ nʉisiju, pãach meúa aawai.

⁷ Pãrag deeum ejemplo jaaukhim: Karris khãijã wa guitarra khãijã siirwai, siir meraa aawai sĩi o ʉ̃ʉrbaajã chukhu sirkhiin, jãga khap abarju khanta sir sĩ. Pod khaugbaju.

⁸ Wa soldaaun khãijã juurhi ee werbʉan wetum aig chi trompeta sir simua wajapha o araraa sirba akhiin, jãga thumaam khʉʉnau khaphʉ aju mag sirbarmuapai amachig “Audimat” a jaaubarm.

⁹ Pãarjã ĩchab ich agjota thʉnʉm. Pãrau khãijã deeum khʉʉnag iekhaawai amau khaugbam meúata iekhamʉn, jãga amau khaphʉ abarju amachig iekha nʉm. Par sĩi jãgan paagta iekha nʉmjo okhoppha nʉisiju.

¹⁰ Mʉg durr gayan meu khapan khĩir pogkhe thʉnʉm. Chi meu khʉʉnagan meu wajaphamma, amach meu aawai, maimuajã amach iekhamam thum khaphʉ nʉm.

¹¹ Pari mag thʉnʉm eemua ãb khãijã beewia mua i meu khaugba chitʉmta mʉrʉg ich meúa iekhachekhiin, mua pod khaugbaju. Mag chan pod iyʉʉ abam, ni ãbmuajã chikham meu khaugba aawai.

¹² Magua mua sĩi iekkhõrjã khaba mag chirʉm: Pãrau jãg Ẽwandam Akharau ich jua theeg dee sim aum khõchag thʉnʉmʉn nem wajaug sim. Mamʉ chi wajapcharamta paarpam khõsi abat, ar pãachdeu oowai agua ʉ̃rcha chi ʉkha durrum khʉʉn thumaa khĩir onee apijojoom.

¹³ Ãbmua khãijã ich meu khaba deeum meúata iekhaajem ag jua theeg wai sim khai, magan agjo ich Jooirag jeeuju aai sim, mag ichdeu iekhabarm iekpai aig ũr nʉm khʉʉnag deeu am meúa jaaujem ag jua theegjã ichig deemkhĩir.

¹⁴ Ẽwandamag jeeu chirʉm aig mua sĩi parhooba deeum meúata jeeukhiin, mʉ akharaun chadcha Ẽwandamag jeeu jochkherama. ¿Pari mag sim mʉch chi ʉ̃rʉmua mʉchdeu iekhatarrjã khaugba abaawaijã?

¹⁵ Magbaawai ¿jãgajuma? Magbaawai mag deeum meúa jeeumam dʉi jũrr aig dich iek ũr nʉm khʉʉnag jaau khaphʉ jawaag agjo Ẽwandamag dichig jaaupima, jũrr am meúa amag khap amkhĩir jawaag. Meukhaar khãijã agjo bʉ̃ʉrjã õrau khaugbam meúata mag au dichtarr khai, ich agjo am meúata amag jaauma, khap amkhĩir.

¹⁶ Mag am meúa khaba sĩi deeum meúata Ẽwandam tho iekhamamua jeeukhiinjã, jãga pua iekha simjã khaugba aawai aig durrum khʉʉndamau pʉ ipierr dʉi ich magau abarju. Amau pod magbaju, pʉ iekhamamjã khaugba aawai.

¹⁷ Par pua nem wajaug ũrihmʉ jeeumaju; pari mag sim aig chan bʉ̃ʉrjã bithurgam khʉʉndam Ẽwandam iek gaai khĩirjug bãauba, ich magpai bʉ̃ʉrjã ũrba arrjo durrum.

¹⁸ Mua chadcha Ẽwandamag ʉu ajim a chirʉm, mʉchdeu irig jeeu chirʉm aig mʉchdeuta pãar khãaijã ʉ̃rcha deeum meúa iekhaajeewai.

¹⁹ Mag chitab mamʉ, khapanag ee chirʉm aiguin, iek pom khaba awiajã, thumaam khʉʉnag mʉch iekha chirʉmjã khaphʉ apim khõsita chitʉm, sĩi mʉch appai iekha chirʉʉ abarmjã am meúa khaba aawai iwiram ãbmuajã khaugba ich mag oberpimaaugau.

²⁰ Cristo gaaimua khodamnaan, mʉg mua jaau chirʉm khap aag oob sĩi chaaindamjo khĩirjug meraa amiet. Magarrau nem khaigbam wawaagan chadau warag wauju khaugba aju aai nʉm, chaain daumeraa aawai nem wauju khaugba aajemjo. Pari Ẽwandam Akhaar jua theegau nem khĩir pogkhe waupiejem eem chi wajapcharam khap aagan, chadcha jooin khĩirjugjota abat, wajapha khĩirjuag.

²¹ Khĩir eyaa abat jãga Ẽwandamau warrjã maach jooin israelnaan ichdeu amach castigaa sim khap amkhĩir deeum khʉʉnag amach meúata amag iekhapijĩ. Ag iek igwia Ẽwandamau ich iek phã sim gaai, “Jãkhʉʉn wounaanau mʉ iek ʉkhaba arr aawai jũrr deeum khʉʉnagta mua am durr khechthʉg aupiwi amach meúata jũrr chi durr khʉʉnagjã iekhapiju” ajim, “mag oobaawai amach khaibag isegamkhĩir. Pari par mag deeum durram khʉʉnau amach dʉi magbarmjã ʉkhabaju” a phã sim. (Is. 28:11-12)

²² Magua, ĩs ewagjã mag õrau meu khaugbam iekha nʉmuata chi ũr nʉm khʉʉnag Ẽwandam iek ʉkhapiju aju khaba nʉm. Magarrau Ẽwandam ichdeucha ich iek jaaubarmta jũrr thumaam khʉʉnag ũrmkhĩir am meúa jaau nʉmuan chadau ʉkhaba nʉm khʉʉnaupa ʉkham khõsi ʉkhaajem, ajaphata ũr naawai.

²³ Pãade khĩirjubat: Ẽwandam iek ʉkha durrum khʉʉn thumaa ãbam aig biirdʉnaa, thumaam khʉʉnau deeum meúata iekha thʉnʉmcha khãijã ãb bʉ̃ʉrjã Ẽwandam iek ʉkhaba sim dubchewia mag oobaicheewaijã, khan abarju irua. Par jãgan irua, “¡Ih! parhooba dubwia sĩi õor pom lokie thʉnʉmjã oobarm” awia warag ʉkhab sĩsiju.

²⁴ Pari magba sĩi pãach thumaam khʉʉnag Ẽwandamau jaau simta jũrr õrag jaau nʉmcha khãijã ãb Ẽwandam iek ʉkhaba khitʉm dubchewia mag ũrbaicheewai, irua thumaa ãsie ich mor ewag khĩirjuwia, “Chadchata mʉʉn pekau pooma chirʉm” aju, ich jʉ̃gdaar mag pãrau jajawagmam ũrwia.

²⁵ Mag amachdeu i oojã ooba aajemta wajapha i oojem khʉʉn denjo ichigcha jaaumam ũrbaawai kanieu thʉkhoonaa, “Chadcha Ẽwandam am dʉi sĩewaita mʉg thʉnʉm” awia, dʉi amach paarmua Ẽwandamag jeeuju.

Pãach nem iinwai wajapha oonaata inbat

²⁶ Ya ãbmiecha paawai mua pãrag magkhim: Ar ãba khapanaa biirdʉnaa Ẽwandamag jeeuwai, ãaur khʉʉnau meukhaar auju aai nʉm; maagwai ãaur khʉʉnau Ẽwandam iek gaaimta jaau nʉmua õor wawiju aai nʉm; maagwai ãaur khʉʉnau ich Ẽwandamaucha amachig jaaubarm iekta jũrr deeum khʉʉnag khap apiju aai nʉm. Tagam khʉʉn deeum meúa khãijã iekhaju aai nʉm; maagwai warm khʉʉnau jũrr makhʉʉnau deeum meúa jaaubarmta thumaam khʉʉnag ũrmkhĩir jaauju aai nʉm. Mamʉ mag nem in nʉmjã, dich appaita onee aag khaba, thum aig nʉm khʉʉn Ẽwandam dʉi warag ubʉ apiegta mag wauju aai nʉm.

²⁷ Pãach meu khabam iekhaju awiajã iekhaju aai nʉm. Pari numpai wa thãrjuppai khãijã ãhãbdo iekhamamuata iekhaju aai nʉm, sĩi thum sereuba. Mag deeum meúa iekhabarmjã ichiita jũrr ãbmua jaaub khaba jaauju aai sim am meúa, thumaam khʉʉnag ũrmkhĩir.

²⁸ Mag khapan thʉnʉm ee ni ãbmuajã mag warm khʉʉnau deeum meúa iekha nʉm jaauju chukhum chan, magan warag bʉ̃ʉrjã deeum meúa iekhaba, sĩi pãach odegpaita iekhabat, pãachdeu Ẽwandam dʉimuapaita mag pãach iekhabarm khap aag.

²⁹ Wa magba sĩi Ẽwandamau pãachigcha jaaubarm iekta jũrr õrag jawaag wai nʉm khai, agjo numpai khabamʉn thãrjuppaita iekhaju aai nʉm. Maagwai tagam khʉʉnau sĩi khĩuu ũrwia jaauju aai nʉm, chadcha Ẽwandam Akharauta mag iekhapi sĩ, wa sĩi ich khĩirjug eepaimuata mag iekha sĩ.

³⁰ Pari mag agtha warm iekha sim ee, deeum aig simʉg khãijã ĩchab ich Ẽwandamau ich iek jaaumkhĩir jaaumʉn, magan chi nacha iekha sĩerr iekha owia jũrr magʉg iekhapiju aai sim.

³¹ Mag ãhãbdo iekhamamuata thum chi Ẽwandamau ich iek jaaupi nʉm khʉʉn iekha oju aai nʉm, aig durrum khʉʉndamag khaugpiwia ĩchab khĩirdam onee durramkhĩir.

³² Chi mag Ẽwandamau ich iek jaaupibaawai jaau nʉm khʉʉnaun wajapha khaphʉ aju aai nʉm, amach parhooba sereuba sĩi ãhãbdopaita iekhamaju aai nʉm.

³³ ¿Jãgwia mag chirʉ́? Sĩi jãg nem parhooba amachdeu ampierr aawai Ẽwandamau khõchkhaba aajeewaita mag chirʉm. Ẽwandam chan oob magʉm eem khabam. Iruan agpierraanaa khõinaata wenʉrrapiejem. Jãg tagam khʉʉn chi ʉkha durrum khʉʉn iglesia ee aajemjo,

³⁴ ʉʉinan culto ee paawai sĩi khĩuuta ũr ohoodo aju aai nʉm. Am, emkhooin ijẽjẽbkham ee dʉi iekhaju khaba nʉm, ich Ẽwandam iek phã sim gaai jaau simjo, am sĩi amach jaai jua eegarpai khitheem aawai.

³⁵ Emkhooinau culto ee nem jaau nʉm wajappai khaugba aawai wajapcha khap aag jeeum khõsi nʉm khai, di aar pawia amach jaainagta jeeuju aai nʉm. Magba jãg culto ee ʉʉin ijẽjẽb aawai ʉu khaba sim.

³⁶ Pãrau jãg deeum iglesia ee aajemjo khaba, sĩi pãachdeu am aig nem waauwai, ¿pãachdeuta nacha Ẽwandam iek ompaa aujimpii nʉ? ¿Wa pãachdeupaita mag Ẽwandam iek khaphʉ nʉwa?

³⁷ Pãar ee ãb sĩi ich iiupai khãijã Ẽwandamau ichig jaaubarm iek jũrr õrag jaaujem ag jua theeg paraam a sim khai, wa deeum jua theeg Ẽwandam Akharau deetarr khãijã wai sim a sim khai, magua tagam khʉʉn khãaijã khapcha aju aai sim: muajã ich ãbam Ẽwandam Akharaupai mʉchig jaaupitarrta jaau chirʉm.

³⁸ Pari ĩchab ãbmua khãijã mua nem jaau chirʉmjã chad amapha sim khai, magan oob “Jã chan Ẽwandamauta ich iek jaaupi simʉu” amiet.

³⁹ Cristo gaaimua khodamnaan, magua mua mag chirʉm: Ẽwandamau ich iek pãachigcha jaaubarm jũrr õrag jaaujem ag jua theegta pãachig deepim khõsi abat, i iek õor jʉ̃g eyaa jawaag. Pari mag awiajã oob, “Deeum meu chan iekhaju khaba sim” amiet.

⁴⁰ Deeu pʉaba pãrag jaau chirʉm: Mag nem waauwaijã sĩi parhooba pãachdeu ampierr aba, agpierraata aajeethʉ̃.