1 Corintios 13 - Wounaan Meu

Dich khapeen kha khõchag

¹ Khanim nemjo ãbmua chadcha õor dakhĩir mʉg jẽb gayam meu khĩirpierr iekhanaa ʉ̃gtharmpeen meujã iekha sim, pari mag simta bʉ̃ʉrjã ich khapeen kha khõchkhaba sim chan, magan Ẽwandamau oowai mag wounan sĩi parta mag iekha sim. Mag sim aiguin sĩi tamburr bubujukhamjo khabam khai, latadí nenerrkhamjopaita sim.

² Maimua khanim nemjo ãbmua mʉg atag Ẽwandamau nem oopipig majujã thumaa ag nawe khaphʉnaa, mʉg eegarm khʉʉnau khaphʉ nʉm khĩirjugjã thumaa khaphʉ sim dʉi ich Ẽwandamau khĩirju sim khĩirjugjã khaphʉ sim; pari mag simta bʉ̃ʉrjã ich khapeen kha khõchkhaba sim chan, magan Ẽwandamau oowai mag wounan parta mag sim. Wa magba ichdeu nem mag abaawai Ẽwandamau ichdeu jaautarrjo apiju khaphʉnaa, durrsĩig khãijã wounagamjo “Chum dʉnʉʉubaimá” abaawai, i ipierr chadcha ichdeu jaautarrjo mam mapi sim; pari mag nem wau simta bʉ̃ʉrjã ich khapeen kha khõchkhaba sim chan, magan Ẽwandamau oowai parta mag nem khĩir pogkhe khãijã wau sĩeju.

³ Wa ãbmua khãijã aphʉʉ khitheem khʉʉnag ich nem wai sim thum ich thach khoju arrpa jigpʉiwia jũrr ichta khoju chuk sĩsip sim; wa ichcha khãijã Ẽwandam athee awia ʉdʉraa õt ee ich orpʉipi sim; pari magbarmjã bʉ̃ʉrjã ich khapeen kha khõchkhaba sĩerr khai, Ẽwandamau i aubaju.

⁴ Dich khapeen kha khõsim abarmʉn, dich dʉi khaigba aawaijã sĩi khĩuuta ãwatpʉpʉikham, magnaa thumaam khʉʉn dʉijã o wajaphata anʉm. Dich khapeen kha khõsim abarmʉn, irua nem wai simjã dich den apim khõsi khaba, wa maach khãai por opherg sĩewiajã ijo aju khĩirjuba; ni dich thowia dichta warm khʉʉn khãaijã emkhooikha chirʉmjã abam.

⁵ Dich khapeen kha khõsim abarm chan, bʉ̃ʉr abarm gaaimua chaai daumeraamjo parhoob thʉthʉg aba, ni nem thʉnʉmjã ãba sĩi dich atheepaita khĩirjubam. Nem khõrgjã khaba, wa mag meeukhabaademjã sĩi ich mag khĩir thũajã khaugba ãba ich mag iekta ich mag ig nʉrraba aajem.

⁶ Dich khapeen kha khõsim chan, chikhamnau õor khaigba wau nʉm oowaijã warag onee khaba, ãba nem agcha wau nʉm oowiata onee aajem.

⁷ Chadcha dich khapeen kha khõsim abarmʉn, dich khapeer garmua dich dʉi wajap khaba awiajã ideu ãwat pʉʉrbabakham. Chikham eugar khaigba jaau nʉm ʉkhaba, nem wajapha jaau nʉmta ʉkhaajem. Dich khapeen pekau ee burrwaijã, ya jãgbaadem chan tag at khabam a iekhaba, sĩita warag ʉu deeu ich sĩerrjo ajapha aju anʉm, i igwia. Dich khapeer gaaimua õrau ich khaigba aawaijã, magʉmjã igba ãwatpʉpʉikham.

⁸ Chadcha dich khapeen kha khõsim abarmʉn, mag khõchagjã ich mag chugpaa khaugba sĩerraju. Ẽwandam aar naaimaawaijã ich Ẽwandamjã khõsinaa ich khapeenjã ich mag kha khõsi wenʉrraju. Mamʉ mʉg atag paawai Ẽwandam iek jaau nʉm khʉʉnjã tag igbaju, ya ich dʉicha naawai. Magbaadem dʉi tag Ẽwandam Akharau õrag amachdeu meu khaugbampa iekhapiejerrjã tag iekhapibaju. Ya maig paawai ĩchab õor khĩirjug khaugkham khʉʉn khĩirjugjã tag igbaju.

⁹ ¿Jãgwia magʉm tag igbaju? Ẽwandam iek jaau nʉmjã maadeu thum jaauju khaugbanaa mʉg jẽb gayam khĩirjugjã sĩi khomariipaita khaphʉ naawaima.

¹⁰ Maimua chi wajapcharam khĩirjug khaphʉ aju ed barbaicheewain chadau mag khomariipai khaphʉm nemjã tag chukhu aju.

¹¹ Warr bʉ̃rʉʉ chiraawain chadcha chaain iekhaata iekhanaa chaain khĩirjugta khĩirju chitajim. Pari ya jooipa chirsiewai warre chaai aawaim khĩirjug isegpʉijim.

¹² Ẽwandam iek ʉkha nʉmjã ich jãgta sĩebahab. Ĩsin maadeu Ẽwandam igwia i khaphʉ nʉm anaab pari sĩi espheg khĩir purrjoom ee nem inag oo nʉmjopaita i khaphʉ nʉm, wajappai khaugba. Pari jãg nʉʉ awia mʉg atag paawai chadcha ich simjo maadeu i wajapha khaphʉ aju, ya agdaujo i dʉi khĩircha oophobaadem aig. Mʉg maach agtha eegar wenʉrrʉweran mʉchdeun ya i wajapha khaphʉ chirʉm a chirab mamʉ, agtha i ooba aawai wajappai i khaugba chirʉm. Pari jãg chirʉʉ awia ich jãg ich Ẽwandamau wajap mʉ khaphʉ simjo mʉch garmuajã ĩchab i khaphʉ aju.

¹³ Mag Ẽwandam jua theegta ʉ̃rcha ig naab mamʉ, Cristo pierrwai tag magʉm igbaju. Magjup mamʉ nem khĩir thãrjup nʉm, makhʉʉn chan bʉ̃ʉrjã chugpaa khaugba sĩerrjeem. Makhʉʉn: Ẽwandam iek ʉkhawia i gaaimuata maach ʉu wenʉrrʉm khĩirjugau; ʉ̃gthar pawiajã warag wajapcha paaukhamaju khĩirjug, maimua Ẽwandam khõsi nʉm gaaimua dich khapeenjã kha khõsi nʉm. Pari mag thãrjup nʉm eem ãb sim chi wajapcharam. Ma, cha mua jaau chirʉmjo dich khapeen kha khõsi nʉmʉu.