1 Corintios 12 - Wounaan Meu

Ẽwandam Akharau ich jua theeg jiigjem

¹ Khodamnaan, ĩs jũrr mua pãrag khaphʉ apim khõsi chirʉm, jãgata Ẽwandam Akharau maach ich iek ʉkha nʉm khʉʉnag ich jua theegjã deejẽ, nem khĩir pogkhe waumamkhĩir.

² Pãrau khaphʉ nʉm, warr agtha pãrau Ẽwandam iek khaugba naawai sĩi ʉdʉraa jãg juau nem parhoobam wautarragta pãach eudʉ arrpi nʉmjo aajeejim, agʉmʉgta jeeu nʉmua. Pãrau khaphʉ nʉm ĩchab, warrgar pãrau ẽwandamnaan aajerr khʉʉn chan pod iekhaba, meujã meraa sĩsidʉm, chadcha Ẽwandam chaar khaba sĩsid aawai. Pari ĩs ya pãrau Ẽwandam chaar iekta khaphʉ naawai ichdeun chadau pãrag ich iekha simjã khaphʉ apiju ich Akhaar gaaimua.

³ Magua ĩs khĩirjuawai, ãbmua khãijã chadcha Ẽwandam Akhaar jua theegauta i iek jaau nʉrrʉm khai, pod Jesús thʉ̃r thʉ̃rnaa khaigba iekhaju khaba sim. Maimua ich Ẽwandam Akharauta iekhapibam chan, pod ãbmua, “Jesuuta thumaam khʉʉn Porou” a iekhabaju.

⁴ Ẽwandamau chadcha ich chaainag ich jua theeg khĩirpierr deejem, agua ich athee nem waumkhĩir. Pari mag simʉn, ich Ẽwandam Akhaar ãbpai simuata mag deejem.

⁵ Ẽwandamau maachig nem waupi simua jũrr bigaaum khʉʉn chogkhamkhĩirta phidagjã khĩir pogkhe waupiejem. Mamʉ magʉmjã thum ich Ẽwandam Akhaar ãbpaimuata mag waupiejem.

⁶ Ẽwandamau maachig nem waupiju ayaam pom khĩir pogkhe wai sim; pari ãba ichdeupaita mag nem khĩir pogkhe wawaagjã thumaam khʉʉnag ich juapá deejem.

⁷ Magta Ẽwandamau ich chaainag amachpierr ich Akhaar jua theeg khĩir pogkhe deemaajem, magʉm gaaimua chi ʉkha durrum khʉʉn thumta wajapha wenʉrramkhĩir.

⁸ Ẽwandamau ich Akhaar gaaimua ãaur khʉʉnag ichdeu khõsimjo õor wawieg nem khĩirjug khaug apiejem. Maagwai ãaur khʉʉnag agjo nem khĩirjug khaug api sim, ich iek õrag jaau khaug amkhĩir.

⁹ Maagwai ãaur khʉʉnag ich ag Akharaupai khaphʉ apiejem, Ẽwandam am dʉi sim aawai dich juapaaupai pod nem waubajojoomjã ich jua theegauta wauju khaphʉ apiejem. Ãaur khʉʉnag ĩchab ich aguapai õor mor mas sĩsidʉmjã monaaumkhĩir ich jua theeg deejem.

¹⁰ Ãaur khʉʉnag ag na õrau mag ooba aajemta õor dauderraa waumkhĩir ich juapá deejem. Ãaur khʉʉnag ich iekta deeum khʉʉnag jaau khaug apiejem. Maagwai ãaur khʉʉnag ĩchab khĩirjug deejem, Ẽwandam iekta jaau wenʉrrʉm anʉm khʉʉnau nem jaau nʉm ũurwai chadcha ich Ẽwandamauta iekhapi sĩ wa sĩi dosãt iekta jaau wenʉrrʉ́ a khaug aumamkhĩir. Ãaur khʉʉnag ĩchab deeum meu bʉ̃ʉrjã mʉig eegar iekhaba aajem meupa iekhapimaajem. Maagwai jũrr ãbakhaíg mag warmua iekhatarr, pari agjo ich meu khaba simta ich meúata iekhatarrjo, chi ũrtarr khʉʉnag jaaumkhĩir khĩirjug deejem.

¹¹ Mag nem khĩirpierr jig simjo ich jua theeg dee simʉn, ich Ẽwandam Akharaupaita ichdeu deeju ayaam khʉʉnag mag deemaajem, ichdeu khõsimjota nem waumamkhĩir.

Thumaam khʉʉnta Cristo morkha nʉm

¹² Maach moron chadcha thum ãbpaita sĩeb mamʉ, ag gaai nem khĩir pogkhe thʉnʉm. Ag gaai thʉnʉm: dau, jua, bʉ, kach, maimua magpaijã khabam. Pari mag thʉnaab mamʉ, ichiita õor mor ãbpaim gaaita mag thʉnaajem. Ich magta sim ĩchab Cristo morjã: Maachta i morkha nʉm.

¹³ Judionaan wa judionaan khabam khʉʉn, sĩi chikham chognaan wa amach cuenta nʉrrjeem khʉʉnpa maachin thum ãba ãbam Ẽwandam Akhaar auwiata por choo nʉm, mag i Akhaar athaawai maach thumaam khʉʉnag Cristo mor ãbpai obeer aumkhĩir. Magua mʉg maach khapan thʉnaab mamʉ, ãbam Akhaarpaita wai naawai chadcha maachta Cristo morkha nʉm.

¹⁴ ¿Pãrau oowai maach mor gaaipai nem khĩir pogkhe thʉnaabá? Maach mor chan mag nem khĩir ãbpaimuata morkha sim abam.

¹⁵ ¿Khanim nemjo bʉʉu khãijã juag, “Mʉ chan jua khaba aawai mor gayam khabam” akhiinjã? Magju khaba sim, chadcha ichjã mor gayam aawai.

¹⁶ Maimua jũrr kachiu khãijã daúg, “Mʉjã dau khaba aawai mor gayam khabam” akhiinjã. Mag gaaimua chadcha mor gayam khabam aju khaba sim, ichjã mor gaai sĩewai.

¹⁷ Maach mor thum dau akhiin, ¿khaniu ũrkhajĩ? Wa jũrr maach mor thum khãijã kach akhiin, ¿jãga nem thũphamjã khap akhajĩ?

¹⁸ Warr maach ompaawaijã ʉuta Ẽwandamau maach magta deebajim. Irua oowai agdaujo amach sĩsid ajupierrta sĩumajim maach mor gaai, ichdeu khõchagpierr, amagjã agjo amachpierr nem waumkhĩir.

¹⁹ ¿Jãga akham khai Ẽwandamau sĩi maach dau, jua, wa bʉpai khãijã ompaawia, tagam nem ompaaba arr amuan? Mag arr amuan maach mor aju khaba sĩekham.

²⁰ Irua maachdeu nem igju thum maach mor gaai ompaakhajim. Pari nem khĩir khapan maach gaai thʉnaab mamʉ, ichiita maach moron ãbpaita sim.

²¹ Daúa ichdeuta warp oojem awia juadamag, “Mua pʉ igbam” aju khaba sim. Wa magbam khai jũrr porou khãijã bʉʉg, “Muajã pãar igbam” aju khaba sim, ichta tagam khʉʉn khãaijã maach mor gaai ʉ̃gtharraacha sĩejem awia.

²² Magju khãai wajapcha oowain, maach mor gayam nem wajappai igbajojoo sĩsidʉmta tagam khʉʉn khãaijã ʉ̃rcha iigjem khʉʉnau.

²³ Maimua ar maadeu dich mor wajappai asekasbaju ayaam perasta wajapha put eecha wai wenʉrraajem. Maimua ag khãai wajapcha ʉʉrkhaju aai nʉmta jũrr mag ãkhaa paraajã aba aajem,

²⁴ am mag warm khʉʉnjo meer paar wai wenʉrraju igba naawai. Mag khãai ʉʉrkhabaju aai nʉm perasta wajapcha ʉʉrkhaajem. Pari Ẽwandamau warrgarwejã ich magta deejim, maadeu oowai wajap nem igbapaimta ʉ̃rcha jãsenkha nʉmjo wajapcha thʉa paar wai wenʉrramkhĩir. Ich agjota sim ĩchab, maach khodamnaan Ẽwandam athee pom nem wauju khaugba khitheem khʉʉnjã.

²⁵ Ẽwandamau makhʉʉnjã ich morkha wai sim aawai agdaujo jãsene apim khõsi sim, maagwai iwiir ãbjã aaidʉba sĩi warag agdaujo warm khʉʉnau nem igaata oo naamkhĩir.

²⁶ Mag naawai iwiir ãb khãijã mas aawai tagam khʉʉnaujã dʉi thumaa sentii nʉm. Wa ãb khãijã nem wajapha waubarm gaaimua onee aawai tagam khʉʉnjã thumaa onee thʉnʉm.

²⁷ Maach Cristo igar nʉm khʉʉnan, maachta i morou. Mamʉ thumaam khʉʉnau ãbam phidagpai wauba naawai dichpierr nem wau nʉm gaaimua ãb sĩi i juajo sim; deeum phidag wau sim gaaimua ãb i bʉjo sim; ãb i daujo; ich mag nʉmua maimua mag tag ich mag thum i mor enter.

²⁸ Ich Ẽwandamaujã ich iek ʉkha nʉm khʉʉn ee ʉ̃rcha paraa apijim: Ich iek aaidʉ jaaumkhĩir ichdeucha jʉr aumam khʉʉn, ich iek jaaumamta jũrr warm khʉʉnag jaaujem khʉʉn, maimua ich iek jawaag maestronaan. Mag tag agjo paraa apijim: ichdeu juapá deebaawai õor dauderraa nem waaujem khʉʉn, ĩchab ich jua theegau õor monaaujem khʉʉn, sĩi chikham khĩir jãsenkhaag nem par daúa ooba aajem khʉʉn, iglesia ee dirijiijem khʉʉn, maimua ich Ẽwandam Akharau iekhapibaawai deeum meúa iekhaajem khʉʉn. Magʉm khʉʉnta ich iek ʉkha nʉm khʉʉn ee paraa apijim.

²⁹ Pari magʉm khʉʉn thum sĩi Ẽwandam iek aaidʉ jaaujem khʉʉn khaba, ni thumaam khʉʉnauta mag Ẽwandam iek jaaujem khʉʉnjã khaba, ni thumaam khʉʉnta mag Ẽwandam iek jawaag maestronaanjã khaba nʉm. Thumaam khʉʉnauta mag Ẽwandam juapaau õrau ooba aajemjã õor dauderraa nem waaujem khʉʉnjã khaba,

³⁰ ni thumaam khʉʉnauta mag õor mor masim khʉʉn monaaujem jua theegjã chukhu nʉm. Thumaam khʉʉnagta mag Ẽwandam Akharau bʉ̃ʉrjã amachdeu meu khaugbamjã iekhapiba, ni thumaam khʉʉnta mag warmua deeum meúa nem jaautarrjã jũrr khaphʉ warm khʉʉnag jaaujem khʉʉnjã khabam.

³¹ Mag ãbpaimʉgta thum magamkhĩir Ẽwandamau ich jua theeg deeba sĩeb mamʉ, wajapha khĩirjunaa i jua theeg chi wajapcharam khʉʉnta aum khõsi irig jeeubat, agua pãach eejã thumaam khʉʉnta warag Ẽwandam iek gaai ubʉ paaukhamamkhĩir. Pari magʉm khĩirjuju khãai, ãb ag khãyau wajapcharam sim: ma, dich khapeen kha khõsi nʉmʉu. Maata pãrag jawaagpam.