1 Corintios 11 - Wounaan Meu

¹ Keena, pãrau oowai mua jãg ãba Cristoou nem waupi simpaita wau chitʉmjo, ich agjo pãraujã mua nem wau chitʉm oonaa mʉ denjota abat.

Ʉʉin culto ee weetwai jãga aju aai nʉ

² Cristo gaaimua khodamnaan, pãar gaaimua mʉ onee chirʉm, chadcha ʉu pãrau mʉ khĩirjunaa mua pãachig Ẽwandam iek jaautarrjã isegba agpierr wenʉrraawai.

³ Mag naawai ĩs mua pãrag khĩir eyaa apim khõsi chirʉm: Ich jãg Ẽwandamta Cristo porkha simjo, Cristota maach Porou, emkhooin awiajã; maagwai maach emkhoointa jũrr dich ʉʉin porkha nʉm.

⁴ Mag maach chi emkhooin dich ʉʉin porkha nʉmta Ẽwandamag jeeu nʉm aig, wa sĩi ich Ẽwandamau ich iek jaaupitarr khãijã jaau nʉm aig, ʉʉinjo putiu por borrnaata jaaumʉn, magan Cristota wajap khĩir naaupi nʉm, Cristoogta dich Porkhapiju aai nʉmta jũrr deeum khʉʉnagta dich porkhapi nʉmjo naawai.

⁵ Wa magba ʉʉin khãijã Ẽwandamag jeeu nʉm aig, wa sĩi ich Ẽwandamau ich iek jaaupitarr khãijã jaau nʉm aig putiu por borrba nʉmuata jaau nʉmʉn, magan amach jaai amach porkha simta khĩir naaupi nʉm, amachta jũrr emkhooin khãaijã ʉ̃rpai am khõchgauta mag nʉmjo naawai. Maguata ʉʉin putiu por borrba õor ee iekhaawain, por bichnaa iekha nʉmjo chigaata aju aai nʉm.

⁶ Ʉʉinta õor khapanag ee maag bʉ̃ʉrjã putiu por borrba nʉm khai, magan warre amach por khõipʉiju aaita nʉm. Mamʉ amau oowai mag por khõibapäaiwai am chigaacha aju nʉm khai, magan õor ee iekhaagpaawaijã ichiita putiu por borrju aai nʉm.

⁷ Pari jãg ich Ẽwandamta maach thumaam khʉʉn Porkha sĩerrʉmjo warr maach ompaawaijã maach emkhooiragta jũrr mʉg jẽb gaai nem thʉnʉm thum porkhapitarr aawai, emkhooi chan pod putiu por borrju khaba sim. Pari ʉʉiran ichiita putiu por borrju aai sim. Mag ich por borr sim aig, pod irua ich jaai khãai ichta ʉ̃rpai aju khaba sim a sim.

⁸ Pãrau khaphʉ nʉm, warrcha Ẽwandamau maach jooin ompaawai chan ʉʉi gaaimuata emkhooi ompaabajim. Magju khãai ʉʉita emkhooi gaaimua Ẽwandamau ompaajim.

⁹ Mag emkhooi ompaatarr chan ʉʉirau ig sĩerr aawai khabajim, ich Adanta chi ʉʉi khãai na omparr aawai. Magju khãai Ẽwandamau oowai chi emkhooirau ʉʉi ig sĩerr aawaita i athee ompaa deejim, i daumaai nʉrramkhĩir.

¹⁰ Magtarr aawaita ʉʉinan ichiita putiu por deebaju aai nʉm. Mag nʉm aig amau chadcha ʉdʉraa emkhooinagta amach phẽethʉgpi nʉm a jaau nʉm. Mag putiu por deebaawai õor dakhĩirpai khaba, ĩchab Ẽwandam chog angelnaan aig nʉm khʉʉn dakhĩirjã ʉu sim.

¹¹ Pari ĩchab khaphʉ abat: Maach mʉg Ẽwandam iek ʉkha nʉm khʉʉn ee chan ni iwiram ãbmuajã jũrr chikham igbam aju khaba nʉm. Emkhooi khurau khaba akhiin, ʉʉijã chukhu akham; maimua ich agjo ʉʉi khurau khaba akhiin, emkhooijã chukhu akham.

¹² Iin warrjã chadcha emkhooi gaaimuata ʉʉijã ompaajim. Mamʉ ich magtarrjo ewag pawiajã ʉʉirau chaai oo nʉm gaaimuata emkhooijã khitʉm. Mag naab mamʉ amach numwe emkhooi ʉʉi dʉi Ẽwandamauta ompaajim.

¹³ Pãar khĩirjugau jãga sĩ keena: ¿Ʉʉin bʉ̃ʉrjã putiu por deebaba õor khapanag dakhĩir Ẽwandamag jeeuju aai nʉ? Jaaubat.

¹⁴ Maadeu khaphʉ nʉm, warrgarwe maach emkhooin porbʉ durag bãaupiewai ʉu khaba sĩejem.

¹⁵ Pari mag sim jũrr ʉʉin porbʉ duraata wajapha sĩejem, bʉ̃ʉrjã chigaa khaba. Ẽwandamau warrgarwe amag porbʉ duraa deejim, aguapaita putiu por borr nʉmjo wenʉrramkhĩir.

¹⁶ Ãbmua khãijã mua jaau chirʉm ũrmaaugau mʉ ichaaur iekhaju khai, ideu mag sim ich iphithur. Pari mua chan deeum phobor ee Ẽwandam iek ʉkha durrum khʉʉnaujã khĩet jaau nʉm ũrba chitʉm. Ichiita thumaam khʉʉnau oowai ʉʉinan putiu por borrju aai nʉm, culto ee weetwai.

Santa Cena kha nʉm aig athuucha aajerr

¹⁷ Maimua mʉchdeu ũurwai Santa Cena khaawaijã mʉch jʉ̃gaag khaba ũr chiraawai, ag atheejã pãrag mʉ iekhaagpam. Mua ũurwai mag Santa Cena khaawaijã, maach Por Jesucristo maach gaaimua thõotarrta khĩirjuju khãai, sĩi parhooba pãachdeu am aig aawai pãachdeupaita pãach khaibag waunaa nem ãr nʉm anʉm ũr chirʉm.

¹⁸ Chi oo nʉm khʉʉnau mʉrʉg jaauwai, mag chi ʉkha durrum khʉʉn apha biirdʉ nʉm anʉmjã sĩita mag khĩkhĩratdojã phʉʉrphobaadep aajem anʉm. Amau jaau nʉm thum chan mua chadcha aba chirʉm. Pari magdaman chadau mua mʉchdeujã ʉkhapai chirʉm.

¹⁹ Chadcha mag pãar pãach agdaujom khʉʉn appai chum phʉʉr ohood aadephʉm, khaíu meraa sĩ. Pari mag pãach khĩkhĩratdo biirdʉbaadephʉm gaaimua sĩi õrau pãachta wajapcha Cristo igar nʉm amkhĩirta pãar mag nʉm khabahab. Pari wajapcharan ar pãarjo magba nʉm khʉʉnta chi chadcha agpierraa nʉm khʉʉnau.

²⁰ Pari mag pãar ãba biirdʉ nʉm anʉmjã pãach appai khĩkhĩratdo chum poso phʉʉr ohood aadepnaata maach Por Jesuu Santa Cena jaau pʉatarrjo khaawaijã chadcha ich agjojã khaba, sĩi thach khom khõchgauta pãar maagjem.

²¹ Mag aawaita ya khoogpaawaijã agdaujo pãachdeu nem waibeemarrpierr pãachdeu khom aig khowia, dojã dowia, sĩi warag khech thʉnʉisiphʉm. Mag thʉnʉm ee pogkha jãsoojã khekhedʉm, mag khoju chukhu aawai.

²² ¿Jãgáwa, pãar di chukhuta nʉ pãach di aarwe thach khowia dojã dowia beeg? ¿Jãgwia pãrau tagam khʉʉndam ʉu agjo Ẽwandam iek ʉkha durrum khʉʉnta kha iseemjonaa ar nem waibeeju chukhu durrum khʉʉndamjã khĩir naaupim khõchgaujota jãg nʉ? Pãach jãg nʉm paar chan oob mua pãach eugar wajapha ig iyʉʉ aju amiet.

Jesuu Santa Cena waupi jaau pʉatarr

²³ Nawe mua pãrag jãgata Santa Cena khaju aai nʉ a jaautarr aawai pãrau jãg nʉm aig pod mua pãar eugarjã wajapha ig iyʉʉ abam. Cha mua pãrag jaau chirʉmʉn, ich maach Por Jesuucha mʉchig jaautarrta jũrr mua pãrag jaau chirʉm: Maach Por Jesús ar Judaau chi thethemnaanag i pʉr deetarr ed ya edaar ãbmiecha ich khapeen dʉi thach kho sĩewai, ich juaucha ich jua ee pan auwia,

²⁴ ag paar nacha Ẽwandamag ʉu ajim anaa thorreupʉijim aajem. Magnaa ʉapʉiwia, “Pãach juau au khobat, mʉʉn mʉ morou” ajim anʉm ich khapeenag. “Wajapcharan mʉg pandam thorreubarmʉn mʉ cha chirʉmta pãar peerdʉ aum khõchgau dau aphʉʉ ajuuta jaau sim. Mʉg atag pawiajã mʉg pãachdeu mʉ jua ootarrjo khabat, mʉ thõotarr khĩir eyaa aag” ajim aajem, maach Por Jesuu ich khapeenag.

²⁵ Maimua ĩchab ya mag thach kho aaipabaadeewai, chi jarrdamjã jua ee auwia agjo amag, “Mʉg jarr eem vinodam dobarmta warrgarwe Ẽwandamau õor dʉi iek deeju aajerrau; mamʉ mʉg iekhan iek iiuriugui” ajim anʉm. “Mʉ bag mʉg vinojo ãrbarmuata Ẽwandamau, ĩsmua atagan chadau pãar peerdʉ wenʉrraju aai nʉm a jaau simgui” ajim anʉm. “Pãachdeu mʉg khanaa do nʉmpierr mʉ pãach kõit dau aphʉʉ arr khĩirjunaata dobat” a jaaujim aajem ĩchab ich Cristoou.

²⁶ Maguama, pãrau mag khanaata panjã khonaa chi jarr eemjã do nʉmʉn, magan mag nʉmua maach Por Jesús maach gaaimua thõotarrta jaau nʉmjo nʉm. I beebam aig chan mag kha nʉm oob khĩir okhoomiet ajim aajem ich Jesuucha.

Parhooba nʉm chan Santa Cena khaju khaba nʉm

²⁷ Wajapha ũrbat mua jaau chirʉm: Ãbmua khãijã ich khaigba sim gaaimua Santa Cena wau nʉm khoju khaba simta khomʉn, magan ichdeupaita wir aig Ẽwandamag ich gaai mas amkhĩir ich ʉmkha sim. Mag sim aiguin maach Por Jesús ich kõit dau aphʉʉ bag ãrtarrjã i gaai mas khaba sim a sim.

²⁸ Magam uguata chi pan khowia chi jarrdam eemjã doju nawe agdaujo wajapha khĩirjuju aai nʉm. Pua khĩirjuawai Ẽwandam dau na pʉch khaigba arr gaaimua khojã khoba ni dojã dobaju aai sim khai, warag Ẽwandamag mag pekau chugpaapi jeeunaata chi pan khowia dojã dobá.

²⁹ Mamʉ magba mag Cristo dau aphʉʉ arr jaau simta wajaphajã khĩirjubanaa mag khonaa domʉn, sĩi dichdeupaita dich gaai mas amkhĩir Ẽwandamag dich ʉmkha sim.

³⁰ Pãach mag nʉm gaaimuata jãg pãach ee sĩi õor mor masim khʉʉn khapan thʉnʉm dʉi sĩi kha thũum khʉʉn pomjã thʉnʉm. Ãaur khʉʉn amach mag nʉm gaaimua ya khechwia nʉm.

³¹ Chadcha ag nawe maadeu dich thumaa khĩirjunaa dichdeu mag nem khaigba wautarr paarjã Ẽwandamag chugpaapi jeeunaata khokhiin, khan gaaimua irua mag maach gaai jua khʉaba abarju.

³² Pari mag Ẽwandamau maach gaai mas deewaijã sĩi maach wawiewaiu, õor pom ich iek ʉkhaba thʉnʉm khʉʉn dʉi ãba maach jua khẽgkhapʉimaaugau.

³³ Wajapcharan muan magta pãrag jaau chirʉm khodamnaan. Ĩsmua atag pãach ãba biirdʉnaa maach Por Jesuu jaau pʉatarrjo khoogpaawai, pãach khapeen nʉbat, maimua thumaa ãba nʉisiewaita khobat.

³⁴ Mag nʉm ee ãb khãijã jãsog thʉnaawai pod nʉbaju khĩirju sim khai, warre ich di aarwe khowia beeju aai sim, mag ãbam aig biirdʉnaa thach kho naawiajã Ẽwandamag pãach gaai mas apim ugua. Tagam nem pãrau jeeu narr okhar mʉchcha pãar aar barimaawaita mʉchdeu khap jaauwimaju.