1 Corintios 10 - Wounaan Meu

Parhoobam nemta ẽwandam awia agʉmʉg jeeupiba jaautarr

¹ Hermanonaan, warr jooingar aawai sĩi õor maba aajem ee ni dojã chukag ee Moisés dʉi maach jooin wenʉrrarr chan oob pãrau khĩir okhoomiet. Amach thum sĩi jʉʉnthumie naarjo jĩu jorrom eegarta wenʉrrʉmua phũas Chi Phur eejã thumaa bʉʉupai dʉrba dichjierram.

² Amau amach thumaam khʉʉnau ʉdʉraata Moiseeg amach porkhapijierram, ichdeu arrmpierr amach wai wenʉrramkhĩir. Magta am Phũas Phur eejã sĩi bʉʉu dʉrbagkha dichwi jʉʉnthumie naarjo jĩumamua am jaau warrjim õor chukag eejã. Mag thumaam khʉʉnau Moiseeg amach porkhapi nʉmta i gaaita por choo nʉmjo naajim.

³ Amau amach thumaam khʉʉnau ĩchab ich Ẽwandamau nem deemamjã khoojeejim.

⁴ Maimua thumaam khʉʉnau ĩchab ich Ẽwandam jua dojã dojierram. Mag amau do dotarr Cristoou amag dee sim ajim, mag do chukag ee wenʉrrʉmjã mokdau eem doou am obichag meeupieg ichta am dʉi sĩerr aawai. Mag mok eemua amag do deewia am wenʉrrʉmpierr am dʉi sĩejeejim, amau nem ig nʉm deeg.

⁵ Mamʉ Ẽwandamau mag thumaam khʉʉnag ich jua oopiejerr ãba, peer thumaam khʉʉnauta i dau na nem khaigba waaujeejim. Amachdeu mag nem ãrtarr gaaimua ich mag õor chukag durrpai pa bepjierram, Ẽwandamau durr iiur deeju atarr aarjã barba.

⁶ Ẽwandamau am dʉi magtarr gaaimua maadeu khaphʉ nʉm, pod maadeu amau arrjo nem khaigbamta waum khõsi aju khaba nʉm.

⁷ Oob amau arrjo juaupai nem parhoobam wau sĩsidʉmta ẽwandam awi agʉmʉg jeeumiet. Am igwia Ẽwandam iek phã sim gaai, “Phak chaaita phĩr den waunaa agʉg jeeu nʉmua ohood aphobaadewi thach khonaa dojã dojierram” a sim; “maimua mag ohood thʉnʉʉ awia deeu bʉjãau paaukhawi jemkha phobaadejim” a phã sim.

⁸ Oob amau arrjo dich ʉʉin khabam dʉita parhooba dich ʉʉin dʉímjo khapes amiet. Amau Ẽwandamjã ogkhaba magwia warre ãbam edpai veintitres mil khechjierram anaabá.

⁹ Oob ĩchab am eem ãaur khʉʉnau arrjo khaphʉ nʉmta juau ogthom maach Por Cristo jũur iekhamiet pãach Porkhapimaaugau. Amau maach Por ogkhaba i ichaaur magwia, nemeu khaamamjã äpba ich aguapai khechmajierram anaabá.

¹⁰ Oob pãach pornaanau nem mag aawai am ichaaur serereu amiet; magba akhiin Ẽwandamau israelnaan dʉi arrjo ich chog pʉiwia chi mag narr khʉʉn khechpʉitarrjo pãachjã agjo khechpʉidukham.

¹¹ Chadcha Ẽwandamau am dʉi maagjerran, ĩs ewag pawiajã maadeu amau aajerrjo aju khaba nʉm a khap amkhĩrau. Ya mʉg jẽb eegar paimʉʉ pamaawai ĩs ewagam khʉʉnagjã mag khaphʉ amkhĩirta Ẽwandamau ich iek gaai mag phãpijim.

¹² Magua mua ĩsjã pãrag mag chirʉm: Pãach Ẽwandam dʉi ubʉ nʉm awia oob pãach thomiet, pekau ee burrju chan pom khabam.

¹³ Pãrag jaaukhim, ũrbat: ¿Khar pãrau nem khaigbam waum khõsi aadeba aajẽ? Jãg nʉm chan mag pod õrau ãwatbajojoom nem khabam. Õor pom ich agjo thʉnʉmta magbamjoo thʉnaajem. Mamʉ Ẽwandam maach dʉi ogdʉba khitaajeewai irua maadeu ãwatbaju atchajã maachig prueba deebam. Mag prueba pom maadeu ãwatbaju atcha maachig deeju khãyau, ĩchab irua khaphʉ apiju, jãga ʉdʉʉr dich thʉ aupiba ãwatpʉiju aai nʉ.

¹⁴ Magua, Cristo gaaimua khodamnaan, mua chadcha pãar khõsi chitaawai pãach ʉu wenʉrramkhĩirta mag chirʉm: Pãach khapeen Ẽwandam chaar khabamʉg jeeu nʉm aar pãach eeurrwai oob am aar wetmiet.

¹⁵ Pãrau khaphʉ naawai magan cha mua jaau chirʉm jaaubat, magá wa mag khabá.

¹⁶ Ẽwandamau maachig dopi jaautarrjo Santa Cena khaawai irig ʉu ajim anaa doowai, ¿jãg nʉm aig maach Cristo bag ãrtarr gaaimua ãba Cristo denkha nʉm a sim khabá, chi do nʉm khʉʉn? ¿Wa mag khabáwa? Maimua chi panjã agjo jua ee aunaa irig ʉu ajim anaa khoowai, ¿ĩchab Cristo mor gaaimua maach ãba i denkha nʉm a sim khabá?

¹⁷ Maach khapan thʉnaawiajã, ãbam panpai kho nʉm gaaimua maachin õor ãbpaimta kha nʉm Cristo gaai.

¹⁸ Maimua ĩchab pãade khĩirjubat israelnaanau Ẽwandamag jewaag nemchaain khechwia khoojem: ¿Nemchaain khechwia chi phaajem nasãd gaai nemek wai narr gayam chi kho nʉm khʉʉnjã mag kho nʉmua amachdeuchata, “Maarjã Ẽwandam chaainaugui” anʉm khabajĩ? ¿Wa mag khabajĩwa?

¹⁹ Mua mag chirʉm chan mag jãg juau wautarrta Ẽwandam chi iwamʉu aba chirʉm. Mag iiuba sĩsid aawai par mag am khĩirphee wai narr nemek mod awiajã tagam nemek mod khãai ajapchajã khaba ni khĩethuujã khaba sim.

²⁰ Mua mag chirʉm aiguin, jãg parhoobam nem juau wautarragta nemekjã thõonaa ẽwandam awia agʉg jeeu nʉm khʉʉnan meperagta jeeu nʉm ata chirʉm. Mua chan meperag chan bʉ̃ʉrjã pãrag ee apimapha chirʉm.

²¹ Magua Pod Santa Cena kha nʉm aig Cristo jarr eem donaa jũrr meperag jeeu nʉm khʉʉnau do nʉm jarr eejã doju khaba nʉm. Pod maach Por Jesucristo mes gaaim pan khonaa agjo dosãt mes gayamjã au khoju khaba nʉm.

²² ¿Jãg warre õor numiim khʉʉnagta jeeum khõchkha nʉm aig, juau ogthom maach Por dʉi khujʉr nʉm khabá? I dʉi khujʉrju khaba nʉm. Í maach dʉi meeukhakhiin, maadeu pod i jua jʉmbaju.

Nem thum Ẽwandam onee amkhĩirta wauju aai nʉm

²³ Pãar ee ãaur khʉʉnau maagjeebma: “Muan mʉchdeu nem waum aig wau chitʉm. Magʉm paarjã khaíu mʉrʉg magʉm abarju” aajem. Chadcha ich magma; mamʉ maadeu nem wau nʉm thum maach athee ʉu khaba sĩerrʉm, magua muajã mag mʉchdeu nem waum aig pod waubam. Mua magkhiin bithurgam khʉʉn khĩirjugjã Ẽwandam iek gaai bãaupiba sim.

²⁴ Magua, oob dich appaita warm khʉʉn khãaijã wajapha wenʉrraju khĩirjumiet. Mag khãai jãga akhiin maach khapeenjã ʉucha nʉisiju aju khĩirjugta khĩirjubat.

^25-26 Mamʉ sĩi merrkau ee mawia per autarr nemek mod chan oob khoju khaba sim amiet. ¿Jãgwi mua mag chirʉ́? Ẽwandam iek gaai jaauwai, “Mʉg durr maimua ag gaai nem thʉnʉmjã thum maach Por Ẽwandam deneu” a jaau sĩewaima. Mag jaau sĩewai pãrau nemek parhooba per auwia khoju aai nʉm, “¿Ĩsin mʉg nemek modjã am ẽwandam anʉm khĩirphee wai narr khãijã agamjã?” aba.

²⁷ Ẽwandam iek ʉkhaba aajem khʉʉnau khãijã thach khomkhĩir pãach thʉ̃ʉrwai wetam khõsim khai wetju aai nʉm. Maimua pãachig nemdam deemam khĩu khobat, “¿Mʉg nemek mod pãach ẽwandamag jeeu nʉmua i khĩirphee wai narr khabá?” a jeeuba.

²⁸ Pari ãbmua khãijã pãachig, “Jãg nemeken ẽwandam anʉmʉg jeeu narr nemek modou” amʉn, chi jaau simua oowai khoju khaba simta khobaadem a khĩirjupimaaugau, oob warag khomiet.

²⁹ Mag chirʉm chan pãar ar Ẽwandam iek gaai ubʉ durrum khʉʉn khĩirjuwia khaba, ar agtha Ẽwandam iek gaai ubʉ khaba khitheem khʉʉn khĩirjuwiata mag chirʉm. Pari ãbmua khãijã, “¿Jãga mag chikhamnau khĩirju simjota awia pod maadeu dichdeu khaphʉgpierr aju khaba nʉ?” aju.

³⁰ “Mua mʉch thach khoowai Ẽwandamag ʉu ajim anaa kho chirʉmta, jãga mag sĩi bigaaumua khoju khaba sim khĩirju sim gaaimuapai muajã khoju aai khaba chirʉ́” aju.

³¹ ¿Jãgwi mag sĩ? Maan mʉgta aju aai nʉm: Dich thach khoowai, do doowai maimua mag tag nem inagdam waauwaijã, mag dich nem wau nʉm gaaimua õrau warag Ẽwandam wajapha tho iyʉʉ amkhĩirta nem wauju aai nʉm.

³² Ni ãbamʉgjã oob ejemplo khaigba oopimiet. Judionaan najã nem khaigba wauba, judionaan khabam khʉʉn najã nem khaigba wauba, ni ya Ẽwandam iek ʉkha nʉm khʉʉn najã oob nem khaigba waumiet.

³³ Mʉʉn mʉchin magta chitʉm. Mʉchdeu nem wau chirʉmjã thumaa õor dawagaata apim khõsi chitʉm; maimuajã mʉchpaita wajapha chitajujã khĩirjuba, bigaaum khʉʉndamta ʉ̃rcha mʉ gaai masi aajem, mʉchdeu am dʉi mag chitʉm gaaimua amjã ĩchab ʉu peerdʉtkhamkhĩir.