1 Corintios 1 - Wounaan Meu

Salud

¹ Mʉʉn Pabloou, maach Por Jesucristo iek jaaujem khamkhĩir ich Ẽwandamaucha jʉr autarr. Cristo gaaimua maach khodam Sóstenes dʉimua

² mʉg ẽsap phã deepʉi chirʉm, pãar jam Corinto phobor eem iglesia ee Ẽwandam iek ʉkha nʉm gaaimua maach khodkhanaa ar Cristo gaaimua sĩi ãba i atheepai wenʉrrʉmua i phoborkha nʉm khʉʉnag, maimua mag tag ar parhooba amach nʉnʉidʉmpierr maach denjo maach Por Jesucristoog jeeujem khʉʉnagjã agjo khap amkhĩirta mʉg ẽsap phã deepʉi chirʉm.

³ Muan maach Aai Ẽwandamagjã jeeunaa maach Por Jesucristoogjã jeeu chiraajem, pãar ʉu wai nʉm dʉi ĩchab khõinaa wai wenʉrramkhĩir.

Jesucristo gaaimua Ẽwandamau maach dʉi ʉu anʉm

⁴ Muan jeeub khaba ich mag Ẽwandamag ʉu ajim a chitaajem pãar kõit. Jãg Jesucristo gaaimua Ẽwandamau pãach ʉu wai sim paarjã ĩchab mua ʉu ajim aajem.

⁵ Ich jãg Jesucristo gaaimuata Ẽwandamau ʉu ich iek jaau khaug apiwia khĩirjug pomjã deebarm aig, pãrag phatkhon pomta deebarm khãaijã ʉuchata ajim pãar dʉi.

⁶ Mag deebarmua Cristoou maach peerdʉ aaujem a pãrag jaau chirarrjã chadcha mʉchdeu jaautarrjo abarm pãar dʉi.

⁷ Mag gaaimua ĩchab pãrau mʉg jẽb gaai maach por Jesucristo beeju nʉ nʉm orajã nem khĩirpierr Ẽwandamau waupiju ayaam nem wawaag ichdeucha ag jua theegjã thum deetarr aawai tag deeum jua theeg igba nʉm.

⁸ Mag maach Por Jesucristo beem ed ni ãbmuajã pãachdeu nem khaigba wautarr igwia pãach khĩir iekham ugua, ich mag Ẽwandamauta pãar ich dʉi ubʉ phe wai nʉrraju.

⁹ Ẽwandamau ichdeu nem magju a iekhatarran, bʉ̃ʉrjã seukhaba chadcha ich mag nem wau sĩerrʉm. Ẽwandam mag sĩerrʉmuata pãar thʉ̃rkha aujim, ich Iewaa anaa maach Por Jesucristo dʉita ogdʉba wenʉrramkhĩir.

Õor amach iglesia eepai sĩi pappierr thʉnʉmjo thʉnarr

¹⁰ Khodamnaan, muan pãragan maach Por Jesucristoou apiejemjo ihãbata abat a chirʉm, sĩi jãg dich iglesia eepaijã pappierr thʉnʉmjo khaba. Magju khãai khajapha khõinaa nʉmua khĩirjug ãbata aajeethʉ̃.

¹¹ Khodamnaan, mua pãrag mag chirʉmʉn, mau maach khodam Cloe aiguim khʉʉnau mʉrʉg jaaucheewai mag pãar khõinaajã khaba jũrr chikham ipeer ahau aajem anaawaita mag chirʉm.

¹² Am iek mag pãar ee ãaur khʉʉnau, “Mʉʉn Pablo deneu” aajem anʉm; wa “Mʉʉn Apolos deneu” abaawai, jũrr ãbmua “Mʉʉn Pedro deneu”; wa magbam khai tagam khʉʉnau jũrr, “Maran Cristo deneugui” aajem anʉm mua maumua ũurwai.

¹³ Pãrau oowai, ¿Cristo nem thoophem khapanta sĩ mag iekhaag? ¿Wa mʉch cha pãrag iekha chirʉmta pãar kõit pakuls gaai meerphe thõjĩwa? Wa magbam khai pãar por choowai, ¿pãar mʉ thʉ̃r gaaita por choojierrá?

¹⁴ Jãgju khaphʉmjo ʉuchata jãg pãar eem khʉʉn mua khapan por choobajim. Ãba mua por chootarr khʉʉnan, Crispo Gayo dʉipaita mua por choojim.

¹⁵ Magtarr aawai ni ãbmuajã mʉ thʉ̃r gaaita por choojim aju khaba sim.

¹⁶ (Ãaa, maimua ĩchab mua por chootarran, Estéfanas di aiguim khʉʉnjã mua por choojim. Maimua mag tag mua õor por chootarr khai, khĩir ee paba chirʉm.)

¹⁷ Mag nʉm dʉi õor por choomkhĩirjã Cristoou mʉ pʉibajim. Irua mʉ pʉitarran, sĩi ichdeu õor peerdʉ aaujem iek jaaumkhĩirta mʉ pʉijim. Mag jaau chitʉmjã, mamʉ mʉchdeu jaau khaphʉ chirʉm awia sĩi thethemnaanau iekhaajemjo iekhamamuajã jaaubajim, eeu magba akhiin õor jʉ̃gdaar ũrimʉ iekhabaadeewai warag pakuls gaai Cristo meerphe thõotarr iekta igba mʉchta tho iekham ugua awia.

Cristota Ẽwandam jua theeg anaa i khĩirjugau

¹⁸ Jesucristo pakuls gaai meerphe thõotarr ag iek jaau nʉmʉn, ar mʉg jẽb gaaiwe okhoo nʉm khʉʉnau ũurwai, sĩi parhooba khĩir lokoom khʉʉnau nem jaau nʉmjota ũurjerram. Mamʉ mag sim jũrr ya mʉg maach ʉu peerdʉwi nʉm khʉʉnagan, wajapcharan maachigma, maachigan maata ante warag Ẽwandam jua theegau.

¹⁹ Ich mag iek igwia Ẽwandamau ich iekhamam phãpitarr gaai jaauwai, Ẽwandamau ich igwi, “Õor amach khĩirjugpai thowia mʉch igba aajem khʉʉnjã warag khĩirjug chukhumjo apʉinaa ideu ich por ophergau khĩirjug pom sĩewiajã igba warag mua am khĩirjug isegpʉimaju” a iekhamajim ich Ẽwandamau. (Is. 29:14)

²⁰ Magtarr aawai khan wajaug sĩ ar amachta chi khaphʉm khaphʉm aajem khʉʉn khĩirjug wa chi machnaan khĩirjug khãijã, maimua khan wajaug sĩ ar sĩi amach khĩirjug jawaag sĩi parhoobam nem ig iyʉʉ nʉmua amach khapeen khĩupaa sĩsiu aajem khʉʉn khĩirjug. Mʉg jẽb gaai õor khĩirjug khaug sĩsidʉm khʉʉn khĩirjug Ẽwandamau ichdeu õor peerdʉ aaujem iek dʉi oowain, sĩi bʉ̃ʉrjã serbiibamjota sĩsidʉm, mʉgʉm khĩirjugau i aar õor barpieg irig chan bʉ̃ʉrjã maadeu nem igba sĩsid aawai.

²¹ Wajapcharan Ẽwandamau õrau amach khĩirjugaupai chan ich khaugbaju khaphʉ sĩerr aawai ich iek jaau nʉm ʉkha nʉm gaaimuata õor peerdʉ aaujem. Amau amach khĩirjugta wajaug thowi jũrr Ẽwandam iekta serbiibag pheejeeb mamʉ, mag amau serbiibag phe nʉm ʉkha nʉmuata Ẽwandamau õor peerdʉ aaujem.

²² Judionaanaun sĩi amach dakhĩir ag na õrau nem ooba aajemta amach dakhĩir waupim khõchkha thʉnʉm; pari mag wauba aawaita mag maach peerdʉajem iek jaauwaijã ʉkhaba thʉnʉm. Maagwai jũrr griegonaanau warag nem thum khaphʉm aajem khʉʉn iek ũrm khõchgauta amachig maach peerdʉajem iekdam jaauwaijã ʉkhaba thʉnʉm.

²³ Mamʉ maraun ãba õrau Cristo pakuls gaai meerphe thõotarr iekta jaau wenʉrrʉm. Mamʉ mag iek judionaanau ũurwain, amagan amau khĩirjuawai Cristo ajim anaawai meeju khaba sĩerr meetarr aawaita marau i iek jaau wenʉrrʉm ũurwaijã sĩi chad khabamjota ũurjem. Maimua jũrr judionaan khabam khʉʉnau ũurwai, amagan maar sĩi serbiiba khitheem khʉʉnau nem jaau nʉmjota sim.

²⁴ Mamʉ par amau mag naawiajã, judionaanau wa judionaan khabam khʉʉnau awiajã ar ich Ẽwandamaucha thʉ̃r autarr khʉʉnagan mag Cristo cha marau jaau wenʉrrʉmta ich Ẽwandam jua theegau, aguata õor peerdʉ aaujeewai. Mag Cristo meebarmua maach peerdʉjuuta Ẽwandamau ag nawe khĩirju wai sĩerr aawai cha marau jaau nʉmjã chadcha ich Ẽwandam khĩirjugta jaau naabahab.

²⁵ Wajapcharan mag Ẽwandam khĩirjug anʉmjã sĩi serbiiba khitheem khĩirjugjo simta õor khĩirjug chi wajapham anʉm khãaijã chi wajapcharamʉu. Wajapcharan mag Cristo Ẽwandam jua theeg anʉmta serbiibamjo ʉdʉraa ich thõopibarmua jũrr mʉg jẽb gayam khʉʉn jua theeg khãaijã nem jua theeg ʉ̃rpai sĩsijim.

²⁶ Ẽwandam gaaimua khodamnaan, pãrau khaphʉ nʉm, pãar eem khʉʉn chadcha pãach khapeen mʉg jẽb gayam khʉʉn daarjã khĩirjug athee chi machnaan chan khapanjã khaba, ikhotoota durrum dʉi chi thierrnaanjã wajappai chukhu, ni sĩi bigaaum khʉʉnau tho iyʉʉ aajem khʉʉnjã chukhum. Pari mag serbiibamjo durrab mamʉ, pãarta Ẽwandamau igjim.

²⁷ Wajapcharan khĩirjug meraam khʉʉnta Ẽwandamau jʉr aujim, jũrr mʉg jẽb gaaim khĩirjug athee chi machnaan anʉm khʉʉnta jũurwia am khĩir naaupieg. Maimua sĩi serbiibamjo sĩsidʉm khʉʉnta jʉr aujim agjo ich Ẽwandamau, jũrr makhʉʉn gaaimua chi jua thierrnaan anʉm khʉʉnta khĩir naaupieg.

²⁸ Mag bʉ̃ʉrjã nem igba sĩsidʉm khʉʉnta õrau kha isee aajem khʉʉn dʉi jʉr aujim, wajapcharan mʉg eegarpai aawain ar sĩi pasurjopai khitheem khʉʉnma, makhʉʉnau jũrr nem wajaphamjo sĩsidʉm khʉʉnta isegpʉiwia am khãaijã wajapcha aag.

²⁹ Magtarr aawai ni iwiir ãbmuajã ich khĩirjug khaug chirʉm awia Ẽwandam na ich tho iekhaju aai khaba sim.

³⁰ Maimua pãachin chadau ich Ẽwandamauchata pãar Jesucristo bʉ ogdʉba phe wai sĩebma. Ich mag Cristo gaaimuata ĩchab maadeu Ẽwandam khĩirjug wai nʉm; i gaaimuata ya peerdʉwia sĩi pekau chukhu arrjo nʉm; i gaaimua ĩchab Ẽwandam iek ʉkha nʉmua warag bãau wetum; ich Jesucristo gaaimuata Ẽwandamau maach per autarrjo naawai i denkha nʉm; mag i denkha naawai ãba ichigpaita jeeupiejem.

³¹ Maguata ĩchab Ẽwandam iek phã sim gaai jaau simjo, “Ãbmua khãijã wir aig ichpai tho iekhaju khĩirju sim khai, warag maach Por Ẽwandamta tho iekhaju aai sim.” (Jr. 9:23-24)