Ebərə-ba 1 - Nuni Southern

Yɩɩ twá ʋ bìú Zwezi-Kərisə tə nə, ʋ ma swɩ̀n nə con

¹ Dí yáá nə, Yɩɩ twá ʋ nii *sʋ̀sʋ̀nà tə nə, ʋ ma swɩ̀n nə nɩbara-ba con, nɛɛ kapʋpʋ. Ʋ twá coŋi yirə yirə də nə, ʋ ma swɩ̀n ba con.

² Sɩ́ʋ́n nə, Yɩɩ dàń twá ʋ bìú tə nə, ʋ ma swɩ̀n nə con nə, zə̀n máŋá kʋ tə wa. Yɩɩ twá də ʋ mʋ̀, ʋ ma fwa lʋʋ, Yɩɩ ga lɩ wá ʋ tún, ʋ ga tún máŋá də, sə ʋ pa ʋ tɩnɩ wiən tə mama.

³ Yɩɩ twá ʋ bìú təntə nə, ʋ pa ʋ dun tə pɩpɩlɩ. Ʋ mʋ̀ nə yɩ Yɩɩ nyɩnyɩga cɩ́gá cɩ́gá. Ʋ nii sʋgʋ jə dɩ̀àn. Kʋ twá kʋ mʋ̀ sʋgʋ təntə nə, ʋ ma pa lʋʋ wiən tə mama zɩga tə bwálá nə. Ʋ mʋ̀ nə sɩn ləzoni cʋna, ʋ lɩ ba yuu wa. Kʋ kwa nə, ʋ dɩga Yɩɩ sàń nə, ʋ jə̀ə́ Yɩɩ jɩzən vàn nə, ʋ də́ pàrɩ̀ də Yɩɩ tə, ʋ nə yɩ pɩ̀ʋ́ nəfarʋ, ʋ wulə tə mɛ yuu wa.

Zwezi-Kərisə dwə malɩkɛ

⁴ Kʋ mʋ̀ bìú təntə jə dun, ʋ doni *malɩkɛ. Kʋ twá nətʋ, Yɩɩ ma pa wá yɩrɩ, kʋ nə dwə malɩkɛ yɩrɩ.

⁵ Kʋ yɩ cɩ́gá, Yɩɩ tə wà malɩka con swɩ̀n, ʋ wʋ́: «À pɩ̀à à bɩrɩ də, n mʋ̀ nə yɩ à bìú. Zə̀n kʋ tə, à mʋ̀ Yɩɩ nə yɩ n nyɩna». Yɩɩ ma kʋ́ʋ̀ wà malɩka con swɩ̀n, ʋ wʋ́: «À mʋ̀ wá yà n nyɩna. N də ga wá yà à bìú».

⁶ Yɩɩ nə kʋ́ʋ̀ pɩn ba lʋrɩ ʋ təntən bìú tə tɩa yuu wa, ʋ swɩ̀n ʋ yoo, ʋ wʋ́: «Malɩka mama mɛ, sə ka bà ka pa wá dun».

⁷ Á nəŋə, kʋ tə Yɩɩ nə swɩ̀n malɩkɛ tə yuu wa. Ʋ swɩ̀n, ʋ wʋ́: «Malɩkɛ tə tʋŋa tə pɩn nə. Tə yɩ ndə voo nə, tə ga yɩ ndə mənvoo də nə».

⁸ Yá Yɩɩ dàń swɩ̀n ʋ bìú tə mʋ̀ yoo, ʋ wʋ́: «N yɩ Yɩɩ, yá n ga wá yà pɩ̀ʋ́ wuuu, kʋ máŋá nə ba zwɛ̀e. N wá də́ pàrɩ̀ n lɩ̀à tə yuu wa, cɩ́gá cwəŋə wa.

⁹ N swə won tə, kʋ nə tì cɩ́gá cwəŋə, n ga culi kʋ tə nə yɩ yokʋkwɩʋn. Mə kʋ mʋ̀ nə pɩn, n *Yuu-Tiu kúrí n mʋ̀, ʋ pa ʋ tɩ̀àn nə. Ʋ kúrí mʋ́, ʋ lwá pupwən nʋga n yuu wa, sə ʋ pa n ya pɩ̀ʋ́. Ʋ sóní, sə ʋ kúrí mʋ́, ʋ ga yá n dabara».

¹⁰ Yɩɩ tə kʋ́ʋ̀ swɩ̀n, ʋ wʋ́: «Kʋ jɩjʋ mama wa, kʋ yɩ n mʋ̀ Yuu-Tiu nə fwa tɩa tə, də lanworu tə də n jɩ̀àn.

¹¹ Tə wiən tə mama wá jén lá. Lanworu tə də tɩa tə wá kwɩn, ndə gànʋ̀ nə kwɩn nətʋ. Yá n mʋ̀ ga wá yà lá wuuu.

¹² N wá pəpəni tə ndə lìù nə pəpəni ʋ gangwɩrʋ, ʋ dʋgʋ vàn nə. N ga wá lwàń tə yuu nə də lanworu nədʋn, ndə lìù nə lwàń gandʋra. Yá n mʋ̀ wá yà nətʋ wuuu, n bá lwàń mama, n mɩɩ bá zwɛ̀e».

¹³ Yɩɩ tə wà malɩka con swɩ̀n, ʋ wʋ́: «Bàá yəbə n jə̀ń à jɩzən vàn nə, də à ma kəni n dʋŋa n nɛɛ də̀ń nə». Yá ʋ swɩ̀n kʋ nətʋ ʋ bìú tə mʋ̀ con.

¹⁴ Yá malɩkɛ tə mama yɩ siŋə, tə nə tʋŋa, tə pɩn Yɩɩ nə. Yɩɩ yàá tʋn tə, ʋ pa, tə saŋa lɩ̀à tə nə, ba nə mɛ, sə ʋ jon ba, ʋ kə mɩɩ wa, kʋ nə ba zwɛ̀e ʋ con.