1 Zwan 1 - Nuni Southern

Zwezi yɩ mɩɩ sʋgʋ

¹ Nə cʋgʋ lìù kori. Nə nɩ wá də nə yɩ́á. Nə balʋ wá zəni. Nə dwen ʋ yɩra də nə jɩ̀àn. Ʋ mʋ̀ nə yɩ lìù tə, ʋ nə yɩn lá, kʋ jɩjʋ mama. Kʋ lìù təntə nə yɩ sʋgʋ tə, kʋ pɩn mɩɩ lɩ̀à nə.

² Lìù tə, ʋ nə yɩ mɩɩ, bɩrɩ ʋ tɩ̀àn nəba. Yá nə mʋ̀ nɩ wá. Mə ʋ yoo nə nə dàń swɩ̀n, nə bɩrɩ aba. Nə swɩ̀n ʋ mʋ̀ lìù təntə yoo á con. Ʋ mʋ̀ nə yɩ mɩɩ tə, kʋ nə ba zwɛ̀e Yɩɩ con. Ʋ mʋ̀ yà nə yɩn də nə nyɩna Yɩɩ tə. Ʋ mʋ̀ lìù tə ʋ nə bɩrɩ ʋ tɩ̀àn nəba,

³ nə nɩ wá, nə ga nì ʋ kori. Ʋ mʋ̀ yoo nə, nə swɩ̀n á də con, sə á də ja nimarʋ də nəba. Nə də con nə, nə də jə *nimarʋ də nyɩna Yɩɩ, ʋ də ʋ bìú Zwezi-*Kərisə.

⁴ Tə yìə̀n tə yɩ, nə pʋ́pʋ́nɩ́ tə á nə, sə kʋ pa nə pupwən tə sú.

Á yana poni lɩ̀à

⁵ Á nəŋə sʋgʋ tə, nə nə nì ʋ con, yá nə dàń ga pɩ̀à nə swɩ̀n kʋ nə bɩrɩ aba. Sʋgʋ təntə nə yɩ: Yɩɩ yɩ poni Yɩɩ. Yá yikunu tə̀lə́ ʋ con.

⁶ Nə nə swɩ̀n də, nə jə *nimarʋ də Yɩɩ, yá nə ga tʋŋa yikunu wa yìə̀n, nə yɩ kʋnkʋna, nə ga ba cɩ́gá tə nii nə twá.

⁷ Yɩɩ yɩ poni Yɩɩ. Yá nə nə yɩ poni lɩ̀à ndə ʋ nə, nə wá ja nimarʋ duən pwərə wa. Yá Yɩɩ bìú Zwezi jana tə, tə nə nan ʋ tɩan tə máŋá wa, dàń wá sɩn nə cʋna tə mama, tə lɩ.

⁸ Nə nə swɩ̀n də, nə ba cʋna tʋŋa, nə yɩ nə gɩgarɩ nə tɩ̀àn, cɩ́gá ga tə̀lə́ də nəba.

⁹ Nə nə swɩ̀n nə bɩrɩ də, nə fwa cʋna, Yɩɩ wá sɛ̀e ʋ kwɛn tə cʋna tə, nə mʋ̀ də wá pwərə wa. Yá ʋ ga wá sɩn nə kʋnkʋn yìə̀n tə mama. Yɩɩ wá fwa kʋ, ʋ yoo nə yɩ pùə́ nədʋ tíú, ʋ ga yɩ cɩ́gá tíú tə yɩrɩ.

¹⁰ Yá nə nə swɩ̀n də, nə ba cʋna tʋn, kʋ yɩ nə bɩrɩ də, ʋ yɩ kʋnkʋnʋ, ʋ sʋgʋ tə ga tə̀lə́ nə waa.