Yohani 1 - Nleehano Nonaanano Imeetto; Moçambique

Nuulumo nihothatuwa irutthu

¹ Wupaceroni naari nuulumo. Nuulumo nno naari ni Nluku, ni nenno nuulumo nno naari Nluku.

² Nenno wupaceroni naari ni Nluku.

³ Citthu cothene cipankiye ni nenno, ni khiiwo itthu ipankiye woohikhala nenno.

⁴ Mwa nenno waari ukumi ni ukumi uyo waari waarya wa atthu.

⁵ Waarya unaamwaleela mpiphini, ni ipiphi khayoonrye usintta waarya nwo.

⁶ Ahowa nlopwana aaruminye ni Nluku; ncina nawe naari Yohani.

⁷ Ule aawile ukhala saahiti wiira avahere usaahiti wo waarya, wiira mwa uyo, atthu othene akupali.

⁸ Ule khaari waarya, nanso aawile uvaha usaahiti wo waarya.

⁹ Nenno nuulumo nno phi waarya weekhweli, wawilyaya nttuniyani ninawamwaleela atthu othene.

¹⁰ Nno naari mwiilaponi, ilapo ipankiye ni nenno, nanso ilapo iyo khicuwenle.

¹¹ Naaweenle ale ari awaya, ni awaya ale khayaakhelenle.

¹² Nanso ale othene yaakhelenle ni akupanli ncina naya, ahovahiya ikuru yookhala asaana a Nluku,

¹³ yaale ahiyariye ni iphome, hata utthuna wo'rutthu ni woohikhala utthuna wa ntthu, nanso utthuna wa Nluku.

¹⁴ Nuulumo nno nihothatuwa irutthu ni nihokhala ni hiyano, ni nihoona nttittimiho naya, nttittimiho niri toko na mwana mmoca ookhuma wa Athumwane, oocara nnema ni ikhweli.

¹⁵ Yohani naavaha usaahiti awe ni naakhuwela eeraka: Ula phi yooyo aanhimyaaka wiira: Nohala uwa uttuli waka, phiri muulupale kontha ahaawo mi kihinaya.

¹⁶ Maana hi othene nihaakhela uthaciri woocara nnema nawe.

¹⁷ Kontha Nlamulo nivahiye ni Musa; nnema ni ikhweli ciwile ni Yesu Kristu.

¹⁸ Khaawo tokile umoona Nluku, nanso mwanawe mmoca yooyo, ri iriyari ya Athumwane, yooyo phincuwaneehile.

Yohani naavaha usaahiti wa Yesu

¹⁹ Ula phiri usaahiti wa Yohani, ayuta waaveleelihilyaya mayasataka ni alevi ukhuma uYerusalemu wiira yankohe yiiraka: We tupani?

²⁰ Uyo ahohimya ikhweli ni khaarunne; ahohimya eeraka: Mi akihimwe Kristu.

²¹ Vaavale ahokohiya: Vano we tupani? We Eliya? Ule ahaakhula eeraka: Akihimwe. We uNnapiyu nonwehereryehu? Ahaakhula eeraka: Mena.

²² Wahoolo yahomwiirelaca tho: Unihimerye, we tupani, wiira naakhule ale anirumile; uneeciirela pani?

²³ Vano ule ahaakhula eeraka: Mi ki ncu ninkhuwela ntakhwani: Nlokihe iphiro ya Apwiya, toko caahimilyawe nnapiyu Isaya.

²⁴ Vano yaaruminye ale, yaari mafarisi,

²⁵ ni yahonkohaca yiiraka: Vano umpattiserani uhiri Kristu, mena Eliya, mena Nnapiyu?

²⁶ Yohani ahaakhula eeraka: Mi kimpattisa ni maasi, nanso wariyari winyu va haawo hinoncuwelenyu.

²⁷ Yooyo nohala uwa uttuli waka, himphwanelaaka utthukula miripwe co'kwakwatta cawe.

²⁸ Nnya citthu cothene nnya ceeranele uPetaniya, mphantte nkina wo'Yortani, waapattisawe Yohani.

Yesu, Mwakhontwaa a Nluku

²⁹ Waasilyaya, Yohani ahomoona Yesu anweelaka, ni aheera: Mmooneke Mwakhontwaa a Nluku notamiha itampi mwiilaponi!

³⁰ Ula phi yoole aanhimyacaaka kiiraka: Uttuli waka mi naawa nlopwana ri muulupale, kontha ahaawo mi kihinaya.

³¹ Hata ni mi akaancuwela, nanso kiwile upattisa ni maasi wiira athoonyeriye uSirayeli.

³² Vano Yohani ahovaha usaahiti eeraka: Kihoona Nnepa ukhuruwaka wirimu toko ikhuntta.

³³ Mi akaancuwela; vano ule kirumile wiira kipattise ni maasi hokiirela coo: Ule nohalenyu umoona ummorelaka Nnepa, yooyo phimpattisa ni Nnepa Nttakattifu.

³⁴ Vano mi khweli kihoona ni kinaavaha usaahiti wiira uyo ri Mwana a Nluku.

Eetthuci oopacera a Yesu

³⁵ Usa waya, Yohani aari tho wamoca n'eetthuci awe eeli.

³⁶ Umoona waya Yesu aviraka, aheera: Mmooneke Mwakhontwaa a Nluku!

³⁷ Eetthuci awe eeli ale, umwiiwa waya oolumacaka commo, yahontthara Yesu.

³⁸ Yesu ahorukunuwa ni ahoona wiira yaanantthara, ahaakohaca eeraka: Nnaavyani? Yahomwaakhula: Rapi, umakile vayi? Rapi maanaya wiira mwalimu.

³⁹ Ahaakhulaca eeraka: Mmwe ni moone. Yahorwaa ni yahoona waamakilyawe Yesu, ni yahonkhalanaca nenno nihuku nno, ni yaari iwora yoneecese yocoocilo.

⁴⁰ Anteree, nhimawe Simoni Peturu, aari mmoca mwa ale eeli yeewile yaahimilyawe Yohani ni yaantthanre Yesu.

⁴¹ Ule aapacenre umphwanya munnawe Simoni ni ahomwiirela: Nihomphwanya Mesiya, maanaya wiira Kristu.

⁴² Vaavale ahonrwana wa Yesu. Yesu ammwehecesaka ule, ahomwiirela: We Simoni, mwana a Yohani; we unkowiihaninya Sefa, maanaya wiira Peturu.

Yesu naamwiihana Filipe ni Natanayeli

⁴³ Waasilyaya, Yesu aholakela urwaa uKalileya, ahomphwanya Filipe ni ahomwiirela: Ukitthare.

⁴⁴ Filipe aari o'Petesayita, isittatti ya Anteree ni Peturu.

⁴⁵ Vano Filipe ahomphwanya Natanayeli ni ahomwiirela: Nihomphwanya ule aantikhiye ni Musa muNlamuloni, ni aahiminye ni minapiyu: Yesu o'Nasaree, mwana a Yusufu.

⁴⁶ Natanayeli ahonkoha eeraka: Inaakhuma itthu yoorera uNasaree? Filipe ahomwaakhula eeraka: Uwe wawoone.

⁴⁷ Yesu ahomoona Natanayeli amwaattameryaka ni ahomwiirela: Ula phiri nsirayeli eekhweli ni oohaakaakiya!

⁴⁸ Natanayeli ahonkoha eeraka: Waakicuwela vayi? Yesu ahomwaakhula eeraka: Hinaya uwiihana Filipe, mi kahowoona, unari wa mwirini wo nfikera.

⁴⁹ Vano Natanayeli aheera: Mwalimu, we uMwana a Nluku, we uMwene o'Sirayeli!

⁵⁰ Yesu ahomwiirela: Nlattu wowiirela kahowoona wantthuucini wo nfikera, phinkupalyaa? Vano unaahala woona citthu cuulupale coovikana nnya.

⁵¹ Ahopwaherera eeraka: Khweli khweli kinawuhimeryani wiira, nnaahala woona irimu inahulyeele ni ancelo a Nluku awelaka ni ankhuruwelaka Mwanawe Pinatamu.