Yakopu 1 - Nleehano Nonaanano Imeetto; Moçambique

Isalamu

¹ Mi Yakopu, ipottha ya Nluku ni ya Apwiya Yesu Kristu, kinasalameeha mahimo khumi na meeli, amwarenle mwiilaponi mothene.

Nroromelo noomalela

² Asunnaka, nkhalane utteeliya cinene woophwanyakani ukati woottehattehiya,

³ ncuwelaka wiira nroromelo ninyu nno nalawihiyaka phinkhalanaya nlipihero.

⁴ Nlipihero nihaana nivaraka nteko woomalela wiira nyuva nkhale oomalela, weeyiintthu ni woohihaleela itthu.

⁵ Wakhala wiira haawo hirina ankhili, anlepele Nluku, naavaha atthu othene woohimatthepwa ni nawaakawa.

⁶ Nanso alepele n'uroromela woohaakanyaca, kontha ule nakanyaca ri toko mawimpi o mpahari, ankusiya ni wuutuwanyinya ni iphyoo.

⁷ Uyo huupuwele wiira nawaakhela itthu ya Apwiya,

⁸ maana ri ntthu oohilakela ni oohilipelela iphiro cothene cineettawe.

Oothwennya ni oopuha

⁹ Munnihu oothwennya atteeliye nlattu wowunnuwihiya,

¹⁰ ni oopuha atteeliye nlattu wowiiyeviha, kontha naacuwela wiira mahuku awe ari vakani toko ithutu contakhwani.

¹¹ Ncuwa noopaka ni nivihaka, yowaaliya inawuuma, ni ithutu aya inanyaala ni urera waya unaamala. Ciicammo, mayopuha naakhala oonyaala mphironi mwawe.

Utthema uttehattehiya

¹² Horeriya ntthu noovilela waphiyaka ukati woottehattehiya, kontha, alawihiyaka, nowa uvahiya ikhwerempa yo'kumi, yeeyo Apwiya yaroromelihilyaya ale anaafenta.

¹³ Hikhale neera, attehattehiyaka eeraka: Nluku phinkitteha. Kontha Nluku khanttehattehiya ni itthu yoonanara, ni uyo khanonttehatteha ntthu.

¹⁴ Uhiya commo, khula ntthu nottehattehiya ni wunlela wawe citthu, vano wunlela wawe nwo wantepelaka unamooryaca.

¹⁵ Vano wunlela nwo wanttokotthelaka untothola itampi, ni itampi iyo inontothola nookhwa.

¹⁶ Asunnaka oofentiya, nhithepiye.

¹⁷ Khula ivahiya yoorera ni khula itthuvo yoomalela inkhuma wirimu, cikhuruwaka wa Athumwanaya o waarya, ahinrukunuwa toko mitthuuci cihirina nipuro noweemela.

¹⁸ Ni wotthuna wawe, ule honipattusa ni nuulumo neekhweli, wiira nikhale nlipu no'khiyumpe cawe.

Wuulumaca ni weettela nuulumo na Nluku

¹⁹ Asunnaka oofentiya, nkiiwe. Nyu ncuweleke nnya citthu nnya, wiira ntthu phi ntthu nolamuliya ukhala owaakuva wiiwa, oohipuphela wuulumaca, ni oopica uviruwa.

²⁰ Kontha uviruwa wa ntthu khunphwanyiha isariya ya Nluku.

²¹ Phimaana, nhiye iharamu cinyu ni coonanara cimpankenyu nnyo, mwaakhele ni imaani nuulumo niphattyeliyenyu, nno nihaana ikuru co woopola iroho cinyu.

²² Vano, nkhale oweettela nuulumo, nhimakele wiiwa paahi, mwithepyaka veekhenyu.

²³ Kontha, ntthu eewaka nuulumo nno ni heettelaka, nolikana toko ntthu neewehera waloolani, oonaka ikhove awe yeephattuwelo.

²⁴ Wahoolo neewehenrene naathama, ni wowaakuvyaca naaliyala weenryaya ikhove awe iyo.

²⁵ Nanso ule nohelelela aviriyanaka nlamulo noomalela, nlamulo nowoopola, akhanyereraka weettela, wohiira wiiwa n'uhiya, nanso woorya uvarela nteko, ula ntthu ula nokhala oorerihiya mpaka ni nteko umpankawe uyo.

²⁶ Ntthu eehelaka ukhala nattiini, ahiyaka ulokiha nlimi nawe, nanso phiithepyaka, ittiini awe iyo iri yo mahala.

²⁷ Ittiini yomaana ni yeekhweli inoncivela Nluku Athumwanihu, phi ila: Waathotola akhwaacuni ni minankhwele ukati unhuvaya ni wiisunka umwanene woohinyala toko cineettiyaya nttuniyani.