Wiicoonihera 1 - Nleehano Nonaanano Imeetto; Moçambique

Moolumo oopacera

¹ Wiicoonihera wa Yesu Kristu, uvahiyawe ni Nluku wiira aathoonyere arumeyi awe citthu cinhala ukhumelela woohipica. Uyo honruma ncelo awe wiira ancuwelihe nrumeyi awe Yohani.

² Yohani ahottonka citthu cothene coonnyawe, maanaya wiira, nuulumo na Nluku ni usaahiti wa Yesu Kristu.

³ Horeriya ule nosoma cowantikhiya cooniheriye ni ahoreriya ale aneewa, asunkaka yantikhiye maana ukati uhanle vakani uphiya.

Usalamihiya wo'kereca saapa

⁴ Mi Yohani, kinantikhela ikereca saapa co'lapo yo wAsiya. Mwaakhele nnema ni isalama, cinkhuma wa ule ri, aari ni nohala uwa, wo minepa saapa caattamananne wahiceni wawe,

⁵ ni Yesu Kristu, ri saahiti eekhweli, oopacera mwa atthu ookhwa ni muulupale o mamwene o mwiilaponi. Uyo naanifenta ni honitaphula ntampini mwihu ni iphome awe.

⁶ Yooyo honipanka umwene ni mayasataka a Nluku athumwane. Wa yooyo, nikhale nttittimiho ni ikuru mahuku othene! Ameni.

⁷ Mmooneke uyo, nowa ni mahutte, ni atthu othene anaahala umoona, mpaka na ale yaanhomile. Unethi wothene wo mwiilaponi unaahala ucukulaca nlattu wa yooyo. Commo phinhalaya wiirannyaa! Ameni.

⁸ Apwiya Nluku aneera: Mi ki Alfa ni Omeka, oopacera ni oomalihera, ayo ari, yaari, ni anhala uwa, ari owoorya cothene.

Wiicoonihera wa Kristu

⁹ Mi, Yohani, munninyu ni nkhunaninyu o mmahuvihoni, mumweneni ni wookhanyerera mwa Yesu, kaari iciviri yo'Patimu nlattu wo nuulumo na Nluku ni usaahiti wa Yesu Kristu.

¹⁰ Nihuku na Apwiya, kahokhala muNnepani, kaheewa uttuli waka ncu noonyakula cinene toko nipalapatta,

¹¹ neera: Wantikhe nliivuruni itthu inoonaa ni uveleelihe mmakereca saapa, ciri nnya: wEfesu, uSimirina, uPerkamu, uTiyatira, uSarte, uFilatelfiya ni uLawutiseya.

¹² Vaavale kahorukunuwa wiira kimoone ule nokuulumiha. Waarukunuwilyaka, koonne isamaninya saapa co'wooru;

¹³ ni iriyari yo'samaninya nnyo, ahaawo ntthu oolikana Mwana a Pinatamu ni yoowara yaaphiya mpaka nnyaani mwawe ni ncako wo'wooru wakhakaacani.

¹⁴ Muru awe ni ikharari cawe nnyo caari cootteela cinene toko ntthoce, ni miitho awe ayo yaari toko malimi o mooro.

¹⁵ Inyaa cawe nnyo caari toko ncukhuma woohaninya, ni ncu nawe nno naari toko uruma wo maasi menci.

¹⁶ Vano ntata nawe no nlopwana nahovarela itthoottwa saapa, ni wamalakuni wawe yaakhuma ikatana yo wiitha miphantte coomiili. Wiitho wawe nwo waari toko ncuwa wanaaryaya venci.

¹⁷ Vaavale wamoonnyaka, kahowuluwela wamettoni wawe toko ntthu ookhwa. Vano uyo ahokithatela ntata nawe nonlopwana ni aheera: Uhoove. Phi mi oopacera ni oomalihera.

¹⁸ Mi phi mi, ule ri nkumi. Kahokhwa, nanso vano ki nkumi ukati wothene! Ni kihaana mitthukulo co nookhwa ni co mmahiye.

¹⁹ Paahi, wantikhe citthu coonnyaa, ukhuma conaanano mpaka cinhala wiirannyaa.

²⁰ Ila phiri isiiri yo'tthoottwa saapa coonnyaa muntatani mwaka no nlopwana ni isamaninya saapa: Itthoottwa saapa nnyo, ari ancelo o'kereca saapa, ni isamaninya saapa nnyo, ciri ikereca saapa.