Natito 1 - Nleehano Nonaanano Imeetto; Moçambique

Isalamu

¹ Mi Paulu, ipottha ya Nluku ni mmitthenka a Yesu Kristu, toko ciryaya nroromelo na atthu oothanliya a Nluku ni ucuwelaca ikhweli inthoonyera waamini wihu,

² munwehereryoni wookumi woohimala, yooyo, Nluku hinootha uroromelihilyawe ukati uhinaya.

³ Nanso, mukatini mwawe, uyo howiiha nuulumo nawe mulalyani ukhuluveliyaka ni nlamulo na Nluku moopoli ehu.

⁴ Mi kinaawantikhela Titu, mwanaka eekhweli, toko ciryaya nroromelo nihu: Nnema ni isalama, cinkhuma wa Nluku Athumwanihu ni wa Yesu Kristu, moopoli ihu.

Makhalelo a ahooleli o nkereca

⁵ Mi kuuhiyenre uKereta, wiira ulokiherere citthu caahaleela ni waatthapela mahumu wo khula iparasa, toko culamulenlyaka:

⁶ Humu, nolamuliya ukhala oohicovaciya, ookhalana amwaarawe amoca paahi, akhalane asaanawe owaamini ni yaayo ahikhale oopanka citthu co wuuliha muru ni oohileelyaa.

⁷ Nhooleli nolamuliya ukhala oohicovaciya, toko mayanikhupi a Nluku, ni oohiittottopa, oohiviruwaca, oohihapaliya, oohinanthola, ni oohimilili.

⁸ Nanso, akhaleke mayowaakhela aletto, ooncivela coorera, owiiwacawaca, nasariya, mayannema ni owiivaraca,

⁹ akhaleke mayovarecesa ikhweli, toko ciryaya mmiitthucihoni, wowiira akhalane ikuru muulalyaani wo miitthuciho comaana, ni wiira ooryace mayovaanyiha.

¹⁰ Kontha ahaawo enci oohileelyaa, oorekama nlimi ni mayowootha, venci venci ale ankhuluvela ikano ca ayuta.

¹¹ Unlamuliya waamaaliha, maana ammakela upahula itthoko cinci, yiitthucihaka citthu cithiru nlattu wo milili.

¹² Ciicammo, nnapiyu aya mmoca o'Kereta aheera coo: Akereta ukati wothene ari mayowootha, masene ooluwa, ananlula owoolwaa.

¹³ Ula usaahiti ula weekhweli. Phimaana, waakuphulace venci, wiira akhale oolipa munroromeloni,

¹⁴ ni ahivarecese ithele ca ayuta, hata ni malamulo a atthu oohapuwa ikhweli.

¹⁵ Citthu cothene ciri coorera mwa ale ari oorera, nanso, mwa ale oohirera ni oohikupali, khiiwo yoorera, maana hata moopuwelo n'ankhili aya ahotthunttuwana.

¹⁶ Ayo aneera anaancuwela Nluku, nanso, anaankhotta mwa coopanka caya. Phimaana wakhanlyaya atthu oopanka co miikho ni oohitthuna uhimeriya, maana khaanoorya upanka itthu yomaana mena vakani.