Namatayo 1 - Nleehano Nonaanano Imeetto; Moçambique

Mayaranacelo o nrukulu na Yesu

¹ Iliivuru yo mayaranacelo o nrukulu na Yesu Kristu, mwana a Taviti, mwana a Aparahamu.

² Aparahamu ahonnyara Isaki; Isaki ahonnyara Yakopi; Yakopi ahonnyara Yuta wamoca na asunnawe.

³ Yuta ahonnyarana Tamari asaana yeehaninya Peresi ni Seraa; Peresi ahonnyara Esiromi; Esiromi, ahonnyara Aramu;

⁴ Aramu ahonnyara Aminatapi; Aminatapi ahonnyara Naasomi; Naasomi ahonnyara Salimomi;

⁵ Salimomi ahonnyara Powasi, anumwane Rahapi; Powasi ahonnyara Opete, anumwane Ruti, ni Opete ahonnyara Yesee;

⁶ Yesee ahonnyara mwene Taviti ni mwene Taviti ahonnyara Salomoni, na athiyana yaari amwaarawe Uriya;

⁷ Salomoni ahonnyara Ropowau; Ropowau ahonnyara Apiyasi; Apiyasi ahonnyara Asa;

⁸ Asa ahonnyara Yosafaa; Yosafaa ahonnyara Yoramu, Yoramu ahonnyara Usiyasi;

⁹ Usiyasi ahonnyara Yotamu, Yotamu ahonnyara Akasi, Akasi ahonnyara Esekiya;

¹⁰ Esekiya ahonnyara Manasesi; Manasesi ahonnyara Amoni; Amoni ahonnyara Yosiya;

¹¹ Yosiya ahonnyara Yekoniya ni asihimawe, ukati waavariyaya athamiheriyaka uPapiloniya.

¹² Wahoolo anathamiheriyene uPapiloniya, Yekoniya ahonnyara Salatiyeli, ni Salatiyeli ahonnyara Soropapeli;

¹³ Soropapeli ahonnyara Apiyuti; Apiyuti ahonnyara Eliyakimi; Eliyakimi ahonnyara Asori;

¹⁴ Asori ahonnyara Satoki; Satoki ahonnyara Akimu; Akimu ahonnyara Eliyuti;

¹⁵ Eliyuti ahonnyara Eleyaseri; Eleyaseri ahonnyara Mathani; Mathani ahonnyara Yakopi.

¹⁶ Yakopi ahonnyara Yusufu, awannyawe Mariya annyanre Yesu, neehaninya Kristu.

¹⁷ Maanaya maloko othene, ukhuma Aparahamu mpaka Taviti, ari khumi na macese; ukhuma Taviti mpaka aathamiheriyaya atthu uPapiloniya, ari khumi na macese, ni ukhuma waatamiheriyaya atthu uPapiloniya mpaka Kristu, ari khumi na macese.

Uyaryaa wa Yesu Kristu

¹⁸ Uyaryaa wa Yesu Kristu weeranele coo: Mariya anumwane Yesu napakaneliyene ni Yusufu, ahinaya waathukmanana, ahorupala irukulu mo'kuru co Nnepa Nttakattifu.

¹⁹ Nanso Yusufu mayopakanela, ukhala wiira aari ntthu nasariya ni khaatthuna unvenwihaca, aholakela unhiya mmwiitihoni.

²⁰ Nanso oopuwelacaka manhiyero, ahophwanyinya munttorani ni ncelo a Apwiya amwiirelaka: Yusufu, mwana a Taviti, uhoove unkusa Mariya ukhala mwaaraa, kontha irukulu irinawe iyo iri yo Nnepa Nttakattifu.

²¹ Uyo naahala unnyara mwana ni ummonvaha ncina na Yesu, kontha naahala woopola atthu awe ntampini mwaya.

²² Cothene nnyo ciiraneenle wiira itthariheleliye ile yaahimilyaya Apwiya anleeheraka nnapiyu yiiraka:

²³ Mwali oohincuwela nlopwana, naahala urupala irukulu ni unnyara mwana, ni yooyo nohala wiihaninya Emanueli, maanaya wiira: Nluku ri ni hiyano.

²⁴ Yusufu wunwa wawe waarupawe, ahopanka toko caalamuleliyawe ni ncelo a Apwiya, ni ahomwaakhelela Mariya ukhala amwaarawe.

²⁵ Nanso khaanthukumananne mpaka waannyanryawe mwana, ni ahonvaha ncina na Yesu.