Namako 1 - Nleehano Nonaanano Imeetto; Moçambique

Ulalya wa Yohani Mpattisa

¹ Wiipaceroni wo nhupi woorera wa Yesu Kristu, Mwanawe Nluku.

² Uhantikhiya ni nnapiyu Isaya wiira: Kinaanveleeliha wamiithoni waa mayanhupi aka, uyo naahala wulokiherani iphiro.

³ Ncu na ntthu nokhuwela ntakhwani, Nlokihe iphiro ya Apwiya, mookole mittala caya.

⁴ Ciicale, Yohani Mpattisa aari ntakhwani wiira eetthucihe upattiso woorukunusa nrima wiira itampi cileveleliye.

⁵ Atthu othene o'lapo yo'Yuteya, na atthu ankhala uYerusalemu, yaanarwaa ni yaanapattisiya ni yooyo umoolokoni Yortani, alaphululaka itampi caya.

⁶ Yohani aawara ikuwo co mapururu o'nkamira, eetthukela nnyununi mmo isintu yo nrapala ni iyolya awe yaari mattettentte ni urawo wo ntakhwani.

⁷ Ni wo waalaka aanahimya coo: Uttuli waka mi naawa nkinaku rina ikuru impwaha yawaka, ni mi akimphwanela wooroma wiira kitthukule miripwe co'kwakwatta cawe.

⁸ Mi kinoopattisani ni maasi, nanso uyo naahala wuupattisani ni Nnepa Nttakattifu.

Upattisiya n'uttehattehiya wa Yesu

⁹ Waheerannyaa, mahuku ale, Yesu ahowa uNasaree yo'Kalileya, mpaka upattisiya ni Yohani umoolokoni Yortani.

¹⁰ Waakhumawe mmaasini mmo, ahoona irimu ihulyaka, ni Nnepa, woonnya toko ikhuntta inkhuruwelaka.

¹¹ Ni ukhuma wirimu naheewiya ncu neera: We uMwanaka oofentiya, unkitteeliha nrima.

¹² Wahoolo Nnepa Nttakattifu wahonrweha utakhwani.

¹³ Ahokhala wonwo mahuku arupayini (40) ni ahottehattehiya ni Sotwani. Wonwo yahaawo masene ni ancelo yahonrumeela.

Yesu naweehana eetthuci awe oopacera

¹⁴ Utthukiya wawe Yohani, Yesu ahorwaa uKalileya waalaleera atthu nhupi woorera wa Nluku, eeraka:

¹⁵ Ukati uhophiya ni ciicammo umwene wa Nluku uri wakhiviru. Nrukunuse nrima, nkupalelaka nhupi woorera!

¹⁶ Aviraka nceresere ntthiya no'Kalileya, ahomoona Simoni ni Anteree nhimawe, yaavonyeraca matthavi mpahari, kontha yaari mayototha ihopa.

¹⁷ Yesu aheerela: Nkitthare mi, ni mi kinkowupankani mayowaatotha atthu.

¹⁸ Wowaakuvyaca wene yahohiyaca matthavi aya, yahonttharaca Yesu.

¹⁹ Napwahilene vakani, ahomoona Yakopu mwana a Sepeteu ni Yohani nhimawe, alokihacaka matthavi aya nkalawani.

²⁰ Aheehanaca ni ale yahonhiya nkalawani Sepeteu athumwanaya ni ananteko aya, ni yahonttharaca.

Uvonihinya wa ntthu o nnepa woonanara uKafarnaumu

²¹ Yahorwaa uKafarnaumu. Nihuku no ntivela ahokela nsinakoka, ni aheetthuciha atthu.

²² Na atthu othene yahotikinihinya mananna ceetthucihawe, kontha aheetthuciha atthu ni ulamuli, khaari toko mayowantikha.

²³ Ahaawo nsinakoka mmwe nlopwana aarina nnepa woonanara. Uyo ahokhuwela eeraka:

²⁴ Iri isiyani we ni hi, Yesu o'Nasaree? Waaweenle unoomola? Mi kihoocuwela we, uNttakattifu a Nluku!

²⁵ Nanso Yesu aholamulela eeraka: Umaale ni ukhume mwa ntthu ula!

²⁶ Vano, nnepa woonanara, wahontatha ni ikuru, ni ukhuwacaka, wahokhuma mwa ntthu ule.

²⁷ Othene yahotikhinaca, mpaka ukohana ayaayoru yiirelanaka: Isiyani ila? Meetthuciho onaanano, ni o'lamuli! Mpaka ulamulela minepa coonanara ni nnya phimwiiwelelaka!

²⁸ Ni ihapari cawe cahomwareela nttetthe wothene wo'Kalileya.

Uvonihinya wa amaathi awe Peturu

²⁹ Waakhumacilyaya nsinakoka, yahokela mpaani mwa Simoni ni Anteree, anari ni Yakopu ni Yohani.

³⁰ Amaathi awe Simoni yaarupile wankorini awerennyaka ikopo. Nananoru yahonhimerya Yesu itthu ile.

³¹ Yesu ahaattamerya ni ahaavarela ntata mpaka waawusa. Ikopo yahaahiya, ni yahopacera waatafiti.

³² Wiila waya, ncuwa ninakwattuwile, yahommwiihera aretta ni anamacini,

³³ na atthu othene o watthokoni yahothukumana wankhora.

³⁴ Ahaavoniha aretta enci, yahoosiye ni coowerya, ni ahoomola macini menci, nanso khaatthunihera wuulumaca nlattu yaanancuwela.

Yesu naalalya nhupi woorera

³⁵ Wicisuru, uhinasa ahonwa ni ahokhuma phurwaka ntakhwani wiira aswali.

³⁶ Simoni, na ale yaari ni Yesu yahontthara.

³⁷ Umphwanya waya, yahomwiirela: Atthu othene anawuphavela.

³⁸ Nanso ahaakhula: Nirwee ncoko nkina, itthoko co wakhiviru, neetthucihe wonwo. Nlattu wo yeela phikumenlyaka.

³⁹ Ni ahorwaa ilapo yothene yo'Kalileya, eetthucihaka mmasinakokani, ni aanoomola minepa coonanara.

Uvonihinya wa namakuttula

⁴⁰ Namakuttula ahonrwela Yesu, ahonkhoromela ni ahonlepela eeraka: Mwatthunaka, nawoorya ukivoniha!

⁴¹ Amoonelaka ikiriri, Yesu ahonthatela ntata mpaka unkwanya, eeraka: Kinaatthuna, uvone!

⁴² Nananoru, makuttula yahonhiya, ni irutthu yahokhala toko khalayi.

⁴³ Yesu ahonleeha phunlakaka ni ala moolumo ala:

⁴⁴ Ukiviriyane, uhinhimerye ntthu ila itthu ila. Nanso urwee wa mayasataka wavahe itthuvo yoovonihinya waa ilamunlyawe Musa, wiira ikhale saahiti wamiithoni wa atthu.

⁴⁵ Ule, mweeco, urwaa wawe ahopacera ulattula ni uhimya itthu yeeranele, mpaka Yesu uhoorya ukela ooniyaka mmawaani phukhalaka ntakhwani; na atthu o'lapo ile yaananrwela.