Miteko 1 - Nleehano Nonaanano Imeetto; Moçambique

Yesu naawela wirimu

¹ Yoowe Teyofilu, kihaantikha iliivuru yoopacera, kittonkaka citthu cothene cipacenryawe Yesu upanka ni wiitthuciha

² mpaka nihuku niwelihiyawe wirimu, naavahilene malamulo amitthenka yaathanlilyawe, mwa Nnepa Nttakattifu.

³ Ukhwa wawe, ahonwelela ni aheethoonyihera wa amitthenka nari nkumi ni woonihera mithoonyero cinci coohivaanyihaninya. Ahaakhumelelaca mpaka mahuku arupayini (40) oolumacaka ihaali co'mwene wa Nluku.

⁴ Vano aalyaanak'ono, ahaalamulela wiira: Nhikhumace uYerusalemu, nanso nwehererye nkhuluveliho wa Apaapa, toko wakiiwilenyu.

⁵ Kontha, Yohani aapattisa ni maasi, nanso nyu nnohala upattisiya ni Nnepa Nttakattifu, woohittalivana ala mahuku ala.

⁶ Vano, ale yaathukumanne yahonkoha, yiiraka: Pwiya, yoola ukati ula phinhalenyu uwusawusa umwene wo'Sirayeli?

⁷ Vaavale ahaakhula eeraka: Khuwaacileni ucuwelaca ukati atthuna mahuku Apaapa yeesilyaya ni ulamuli aya.

⁸ Nanso nnaahala waakhela ikuru wankelaya wuukhuruwelani nyu Nnepa Nttakattifu, ni nnohala ukhala asaahiti aka ukhuma uYerusalemu, mpaka uYuteya wothene n'uSamariya ni mpaka umalenlyaya ilapo.

⁹ Vano wuuluma wawe nnya citthu nnya, Yesu ahowelihiya uculu, ni ammwehacak'ono, nihutte nimoca nahaattiyelela wamiithoni waya.

¹⁰ Vano aweheehak'ono uculu, Yesu aanawela. Nananoru yahowaaca alopwana eeli anawaracile ikuwo cootteela,

¹¹ ni yaheerelaca: Alopwana akalileya, mweemelacenreni va mmwehacaka uculu? Yesu yooyo thamihiye wariyari winyu uyo, awelihiyaka wirimu, naahala uwa tho toko ciicammo cimoonnenyu arwaaka wirimu.

Uthanliya wa Matiya

¹² Vaavale, yahoturuwelaca uYerusalemu, akhumacaka umwaakoni uneehaninya Olivera, uri wakhiviru n'uYerusalemu, mattalivelo aya yaari o malinca ilufu.

¹³ Vano uphiyaca waya usittatti nwo yahorwaa mpaka nsana no'culu yaathukumanesa aya: Peturu, Yohani, Yakopu, Anteree, Filipe, Tomee, Partolomeu, Mateu, Yakopu mwana a Alfeu, Simoni o mphwinko wa aseloti, ni Yuta mwana a Yakopu.

¹⁴ Othene ala yaakhala avekelaka, wamoca na athiyana, ni Mariya anumwane Yesu, na asunnawe.

¹⁵ Yaayo mahuku ayo aheemela Peturu iriyari ya asunna nenno nipuro nno, yahothukumana wookhalaka iminya wo sirini (120) ni uyo aheera:

¹⁶ Asunnaka, caalamuliya utthariheleliya cowantikhiya toko caahimilyaya Nnepa Nttakattifu wamalakuni wa Taviti, nlahanya wa Yuta, aahoolenle mphwinko waantthukile Yesu.

¹⁷ Kontha ahaalikeleliya ni hi, ni aanapanka mphantte wo yeela iyuulupale ila.

¹⁸ Uyo ahophwanya nthala wo'hisapu yo'khirini, ni amorelaka vathi, ahophulya iriyariru. Marupo awe othene yahomwareela vathi.

¹⁹ Yeeyo itthu iyo yahocuwelaciya na atthu othene yaakhala uYerusalemu, mpaka waavahiyaya nthala nno ncina, ni nuulumo naya neehaninyaka Akelitama, maanaya wiira Nthala No'phome.

²⁰ Kontha ihantikhiya nliivuruni yo Macipo, wiira: Itthoko awe iyo khinhala ukhaliya, ni hikhale tho nohala ukhala, ni: Aheliye nkina uhooleli waarinawe uyo.

²¹ Vano wanlamuliya wiira, alopwana yaale yeettanehu ukati wothene, Apwiya Yesu waaryaya ni hi,

²² ikhumelo upattiso wa Yohani, mpaka nihuku nikhumilyawe Yesu wariyari wihu awelihiyaka wirimu, mmoca wo yaala akhale saahiti wamoca ni hi, oohimyaca wunwelela wawe.

²³ Vano yahothoonyiheriya eeli: Yusufu, eehaninyaka Parsapa, eehaninya tho Yustu, ni Matiya.

²⁴ Vaavale, ukati waavekelaya, yaheeraca coo: Nyu Apwiya, nnocuwela mirima ca atthu othene, nnithoonyere wo yaala eeli ala, ule nthanlilenyu,

²⁵ wiira attiye nipuro neeyuulupale yoomitthenka, yolwannyawe Yuta, arwaaka nipuro nawe.

²⁶ Wahoolo, yahopankaca mwaavi woovonyinya, ni iparakha iyo yahommorela Matiya. Uyo nathanliyene, ahotakaniheriya na amitthenka khumi na mmoca ale.