Luka 1 - Nleehano Nonaanano Imeetto; Moçambique

Umpaceroni wo nhupi

¹ Nyu oolemelihiya Teyofilu, atthu enci ahophavela wantikha cookhumelela caahiminye, ciiraneele wariyari wihu,

² toko cinihimyacenryaya atthu yaari asaahiti ukhuma wupaceroni, yooneehile ni avanre nteko woohimya nuulumo.

³ Mi ciicammo kihaavya ucuwela ratta citthu ciiraneele ukhuma wupaceroni ni kiholakela uwantikhelani, nyu oolemelihiya Teyofilu,

⁴ wiira ncuweleehe maanaya citthu ciitthucihiyenyu.

Uhimyaciya mayareelo a Yohani Mpattisa

⁵ Heroti, ukati waaryawe mwene o'lapo yo'Yuteya, ahaawo mayasataka eehaninya Sakariya, aari o mphwinko wo mayasataka Apiyasi. Ule ahaana amwaarawe yeehaninya Isapeli, yaari o nloko na Aroni.

⁶ Oyeeli yaari o'sariya wamiithoni wa Nluku, yaanaweettela malamulo ni ikano ca Apwiya woohicovaciya.

⁷ Khayaarina asaana, kontha Isapeli aari mwali eekupa ni oyeeli yahooluvalaca.

⁸ Nkwaha mmoca, mphwinko wa Sakariya unakenle nteko, ahorwaa uvaha isataka wamiithoni wa Nluku.

⁹ Toko caalemalenlyaya mayasataka, Sakariya wahommorela mwaavi wookela inupa ittakattifu ya Apwiya, wiira ampahe lumpani.

¹⁰ Waaphilyaya ukati woopahiya lumpani, mphwinko wothene wa atthu waari vate uvekelaka.

¹¹ Vano ahonweela ncelo a Apwiya eemenle moono nlopwana wo'khipula yoopahiya lumpani.

¹² Sakariya woonnyawe, ahotuthuwa ni ahoopihiya venci.

¹³ Nanso ncelo ahomwiirela: Sakariya uhoove, kontha uvekela waa nwo uheewiya, amwaaraa Isapeli anaahala unnyara mwana, ni unhala unvaha ncina na Yohani.

¹⁴ Yooyo naahala wuutteeliha nrima ni ummootthapa. Ciicammo atthu enci ankotteeliya mwa nlattu wooyaryaa mwan'oyo,

¹⁵ kontha nohala ukhala muulupale wamiithoni wa Apwiya. Uyo khanhala uwurya ivinyu hata yoohapala ni nokoocariya Nnepa Nttakattifu, ikhumelo mmirimani mwa anumwane,

¹⁶ ni naahala waaturusela atthu enci o'Sirayeli wa Apwiya Nluku aya.

¹⁷ Yooyo, nokorwaa uhoolo wa Apwiya. Unaahala uncara nnepa ni ikuru toko caarinawe Eliya, wiira aaturuselihe mirima mayoyara na asaanaya, ni aaturuselihe mirima atthu oohanyuriha wiira yeettele ikano ca anasariya wiira Apwiya atthenkaceriye atthu anhala waakhelela.

¹⁸ Vano Sakariya ahonkoha ncelo ule eeraka: Kinhala ucuwela cani itthu iyo? Kontha mi kihooluvala ni amwaaraka ayo ciicammo.

¹⁹ Vano ncelo ule ahaakhula eeraka: Mi Kapiriyeli, kinkhala wamoca ni Nluku ukati wothene, kihooruminya uwuulumana ni wuuhimyacera nnya citthu nnya.

²⁰ Vano unhala ukhala oohuulumaca mpaka uphiya nihuku ninhalaya ukhumelela nnya citthu nnya, kontha khukupanli moolumo aka, nanso inaahala ukhumelela ihimilyaka waphiyaka ukati aya.

²¹ Vano atthu yammwehererya Sakariya yahotikinihinya nlattu woopica mpaani mo'nupa ittakattifu.

²² Nanso ukhuma wawe khoorya wuulumaca. Vano atthu ale yahocuwelela wiira yahomphwanya iyooni waaryawe mpaani mo'nupa ittakattifu. Phimaana woohimyaca itthu phi itthu, aanthoonyaca ni khoolumaca.

²³ Vano waaphiyenryaya mahuku o wiinuwa nteko, ahorwaa uwannyawe.

²⁴ Uvira waya ale mahuku ale, amwaarawe yeehaninya Isapeli yahorupala irukulu ni yaheevithavitha ukati wo myeeri mithanu ni yaheera:

²⁵ Apwiya ahokiwehanana woorera wiira atamihe ihaaya caka wamiithoni wa atthu othene.

Uhimyaciya mayareelo a Yesu

²⁶ Waaphiyeraya myeeri siita, Nluku ahonveleeliha ncelo Kapiriyeli wiira arwee isittatti yo'Kalileya, yeehaninya Nasaree,

²⁷ wiira amphwanye mwali oopakaneliya ni nlopwana eehaninya Yusufu aari o nloko na Taviti. Mwali uyo eehaninya Mariya.

²⁸ Vano waaphilyawe ncelo ule mpaka waaryawe Mariya, aheera: Salama Mariya, uhovahiya nnema, Apwiya ari ni we!

²⁹ Nanso ule, wiiwa wawe nuulumo nno, ahotuthuwa venci ni ahoopuwela eeraka: Hinsalamani yeela?

³⁰ Vano ncelo ule aheera: Mariya, uhoove! Kontha uhovahiya nnema wamiithoni wa Nluku.

³¹ Maana unaahala urupala irukulu n'unnyara mwana, nohalaa unvaha ncina na Yesu.

³² Yooyo nohala ukhala muulupale ni nokowiihaninya Mwana o wirimu, ni Mwanene Nluku naahala unvaha ihice yo'mwene wa Taviti, athumwane.

³³ Ni naahala ulamula woohimala nloko na Yakopi ni umwene awe khummala tho.

³⁴ Vano Mariya ahonkoha ncelo ule, eeraka: Wanhala ukhala cani? Mi, kakhaleru akinatoko unthukumanana nlopwana.

³⁵ Vano ncelo ule ahomwaakhula eeraka: Unawukhuruwela Nnepa Nttakattifu, ikuru ca Nluku o wirimu ni irunku awe inawuukhunela. Ciicammo Nttakattifu nohalaa unnyara, nohala wiihaninya Mwana a Nluku.

³⁶ Vano ucuwele wiira, nloko aa Isapeli horupala irukulu nooluvanlene. Ula phi mweeri wonasiita nari ni irukulu, yoole eereliya ule mwali eekupa.

³⁷ Kontha Nluku khiiwo itthu inoolwanawe.

³⁸ Vano Mariya ahaakhula eeraka: Phi mi va karumeya a Apwiya. Ikiirannyee toko cuulumacilyaa. Ni ncelo ule ahokhuma waaryawe Mariya vale.

Mariya naanthotola Isapeli

³⁹ Yaayo mahuku ayo, Mariya ahokhuma wowaakuvyaca wene ni ahorwaa nttetthe wo'myaakoni, uryaya isittatti imoca yo'Yuteya,

⁴⁰ ahorwaa uwannyawe Sakariya ni ahonsalameeha Isapeli.

⁴¹ Vano ule wiiwa wawe isalama ya Mariya, mwana ule ahowunawuna mmirimani mwa Isapeli ni Isapeli wahoncara Nnepa Nttakattifu.

⁴² Vaavale ahokhuwela venci eeraka: Uhoreriya we wariyari wa athiyana othene ni horeriya mwana nohalaa unnyara uyo!

⁴³ Kimpani mi owiira kithotoliye na anumwanaya Apwiya aka?

⁴⁴ Kontha wiiwa waka ncu no'salama enyu, mwanaka uyo howunawuna n'utteeliya mmirimani mwaka mmo.

⁴⁵ Horeriya ule kupanli, kontha cinaahala utthariheleliya cuulumacilyaya Apwiya.

Ncipo na Mariya

⁴⁶ Vano Mariya aheera: Nnepa aka unawonnuwiha Apwiya,

⁴⁷ ni iroho aka ihotteeliya wamiithoni wa Nluku Moopoli aka.

⁴⁸ Kontha hommwehanana karumeya awe owiiyeviha; phimaana ukhuma nenna va atthu othene anhala ukiihana ooreriya.

⁴⁹ Kontha Ule ri o'kuru cothene hokipankela citthu cuulupale; ncina nawe ri Nttakattifu.

⁵⁰ Ni ikiriri cawe naahala waathoonyera ale ammoova, wo khula nloko.

⁵¹ Ni moono awe, hopanka citthu cuulupale. Haamwarusa ale yaacariha moopuwelo owiisamiha wanrimani waya.

⁵² Haawulusa wahiceni atthu o'kuru ni haaweliha atthu owiiyeviha.

⁵³ Haacariha nhakhu amasikiini ni hoomola woohi itthu mathaciri.

⁵⁴ Honkavihera Sirayeli karumeya awe, wiira oopuwelele ikiriri cawe,

⁵⁵ anfentelelaka Aparahamu ni ucuulu awe, ukati woohimala, toko caakhuluvelihilyawe mayapaapehu.

⁵⁶ Vaavale Mariya ahokhala wamoca ni Isapeli wookhalaka myeeri miraru ni wahoolo ahoturuwela uwannyawe.

Uyaryaa wa Yohani Mpattisa

⁵⁷ Vano Isapeli ahopiihera mahuku oorukurerya nipirothi ni ahonnyara mwana mwanlopwana.

⁵⁸ Aattamanani awe ni alokwawe yaheewa wiira Apwiya ahomunnuwiha Isapeli ni ikiriri caya ni atthu othene yaananthyana.

⁵⁹ Waapiihenryawe mahuku naane, mwana ule ahoolihiya icantto ni aaphaveliya uvahiya ncina na athumwane yeehaninya Sakariya.

⁶⁰ Nanso anumwane yahoolumaca yiiraka: Mena, uyo nolamuliya wiihaninya Yohani.

⁶¹ Atthu ale yaheera: Khaawo nlokwaa rina nenno ncina nno.

⁶² Vano atthu ale yahonkoha Sakariya athoonyacaka yiiraka: Unonvaha ncinani?

⁶³ Vaavale, Sakariya aholepela nipawu ni ahantikha coo: Yohani phi ncina nawe. Ni othene yahotikinihinya.

⁶⁴ Wowaakuvya wene, Sakariya yahonhulya malaku ni nahontthukuwa nlimi nawe, ni ahopacera wuulumaca anttottopelaka Nluku.

⁶⁵ Vano aattamanani awe othene yahoova, ni caanahimyaciya nnya citthu nnya nttetthe wothene wo'myaakoni co'Yuteya.

⁶⁶ Atthu othene yeewa, yaanasunka wanrimani waya yiiraka: Nohala ukhala cani yoola mwana ula? Kontha ntata na Apwiya naari ni yoole.

Ncipo na Sakariya

⁶⁷ Vaavale Sakariya athumwane mwana ule, wahaacara Nnepa Nttakattifu ni yahopacera ulalya yiiraka:

⁶⁸ Attottopeliye Apwiya Nluku o'Sirayeli, kontha ahaathotola ni waataphula atthu aya.

⁶⁹ Aniwiihenre woopwa wo'kuru ukhuma nloko na Taviti, karumeya aya,

⁷⁰ toko cuulumacilyaya wamalakuni wo minapiyu cittakattifu ikhumelo khalayi;

⁷¹ wiira anoopole mmatatani mweenani ihu na ale annirama,

⁷² wiira yaathoonyihere ikiriri mayapaapehu ni yuupuwele nleehano naya neettakattifu,

⁷³ ni wiilupelela waapankenlyaya athumwanihu Aparahamu,

⁷⁴ unoopola mmatatani mweenani ihu naavarelaka nteko wohoova,

⁷⁵ nikhalaka n'uttakattifu ni isariya wamiithoni wawe mahuku othene o'kumi ihu.

⁷⁶ Vano we mwanaka, unhala wiihaninya nnapiyu a Nluku o wirimu, kontha unaahala urwaa uhoolo wa Apwiya, wiira utthenkace iphiro caya,

⁷⁷ wiira avahe unethi awe ucuwelaci wo woopwa n'uleveleliya wo'tampi caya,

⁷⁸ phimaana Nluku ihu ri oocara ikiriri, maana honootola, toko cinkhumaya ncuwa khula wicisu,

⁷⁹ wiira aamwaleele ale yuunkomile wiipiphini ni wantthuucini wo nookhwa; ni eettihe inyaa cihu iphiro yo salama.

⁸⁰ Phimaana mwana ule aanawunnuwa ni aanakhomaala munnepani, ni aakhala ntakhwani mpaka nihuku naapacenryawe wiithoonyihera uSirayeli.