Akolosi 1 - Nleehano Nonaanano Imeetto; Moçambique

Isalamu

¹ Paulu, mmitthenka a Yesu Kristu, wootthuna wa Nluku, ni munnihu Timotiyu,

² wa attakattifu ni asunna ookhuluvelyaa mwa Kristu, ari uKolosi: Nnema ni isalama wa nyu, cinkhuma wa Nluku Athumwanihu.

Paulu nawaavekelela akolosi

³ Ninaansukuru Nluku Athumwane Pwiy'ehu Yesu Kristu, ukati wothene unoovekelelehuni,

⁴ toko ciiwilehu nroromelo ninyu mwa Yesu Kristu ni waafenta winyu attakattifu othene,

⁵ nlattu wo nkhuluvelo usunkeriyenyu wirimu. Yooyo wiiwilenyu wupaceroni wo nuulumo neekhweli no nhupi woorera,

⁶ wuuphwanyileni nyu, toko cimwareenlyaya nttuniyani mothene. Unaahala wiima mihokorokho ni wunnuwa, ciicammo phineerannyaya mwa nyu, ikhumelo nihuku niiwilenyu ni ncuwelaka weekhweli nnema na Nluku.

⁷ Nyu mwiitthucile ni Epafra, nkhunanihu oofentyaa, ri nanteko eekhweli a Kristu wa nyu.

⁸ Yooyo nihimenrye nifento ninyu no Nnepa Nttakattifu.

⁹ Phimaana, hata hi ikhumelo nihuku nimwiiwilehu, khaneemelenle wuuvekelelani n'ulepela wiira wuucareni ucuweleeha wotthuna wa Nluku, mwaankhilini ni ucuwelaca wo munnepani.

¹⁰ Commo, nnaahala weettela utthuna wa Apwiya, toko cinaacivelaya, nkhalanaka mihokorokho co miteko cothene comaana, munnuwaka ni muncuwelaka Nluku.

¹¹ Ciicammo ninaawuvekelelani wiira nkhale oolipiheriya ni ikuru cothene, toko ciryaya ikuru co waarya wawe, wiira mwa cothene nkhale oopisa nrima woohihiyerera, n'utteeliya,

¹² mwaasukuruku Apaapa, anipankile oophwanelannya waakhela coohiyeriya ca attakattifu wumweneni wo waarya.

¹³ Uyo honikumiha mpiphini ni honirweeha wumweneni wa Mwanawe oofentiya.

¹⁴ Nlattu wo'phome awe uyo, nihaakhela woopwa, ukhanle uleveleliya itampi cihu.

Iyuulupale ya Kristu

¹⁵ Kristu phiri oolattana ni Nluku hinoonnya, muulupale o citthu cothene cipattusiye.

¹⁶ Kontha mwa yooyo citthu cothene cihopattusiya, ciri wirimu ni vathi, cowoonnyaa ni cohoonnyaa, umwene ni ikuru, iyuulupale ni ulamuli. Nluku hopattusa cothene mwa Kristu; cothene cipattuseriye yooyo.

¹⁷ Uyo nenne nenne ri yooyo, citthu cothene cihinapattusiya. Mwa yooyo cothene cihaawo.

¹⁸ Uyo ri muru wo'rutthu iri ikereca. Yooyo phiri oopacera, ntthaara mwa atthu ookhwa, wiira mwa citthu cothene akhale oopacera.

¹⁹ Kontha commo phaancivenlyaya Nluku, wiira mwa Kristu, ikhale iyuulupale awe yothene,

²⁰ wiira napankilene nnema ni iphome awe wansalapani, aatanihe citthu cothene, ukhuma ciri mwiilaponi mpaka ciri wirimu.

²¹ Ni nyu ciicammo, khalayi mwaari uttayi ni Nluku ni mwaari eenani nlattu wo moopuwelo enyu wo miteko cinyu coonanara.

²² Vano howaatanihani ni irutthu awe, nlattu wo nookhwa awe, waacera wiira oothoonyihereni wamiithoni wawe nnari attakattifu, oohikosi ni oohicovaciya,

²³ mwakhalaka nanlelo oothipelyaa ni oohittinka munroromeloni, nhiihiyerere uhapusiya munwehereryoni wo nhupi woorera wiiwilenyu ni ulaleeriyaya atthu othene o vathi, yooyo, ukipankile nrumeyi mi Paulu.

Nteko ni nhupi wa Paulu

²⁴ Vano kinaatteeliya mmahuvihoni mwaka nlattu wawinyu ni kinaakwanihera inhaleela mmahuvihoni mwa Kristu mwirutthuni mwaka, nlattu wo'rutthu awe iri ikereca.

²⁵ Kihokhala nrumeyi o'kereca toko Nluku cikivahilyawe nteko nlattu wawinyu nyu, wiira kilalyee nuulumo na Nluku woohihiya itthu,

²⁶ isiiri yaavithiye myakha cinci ni maloko maloko ene, nanso vano ihothoonyiheriya wa attakattifu awe.

²⁷ Kontha Nluku hotthuna waathoonyera ciryaya nhakhu wo waarya wo yeela isiiri ila iriyari ya amalaponi, maanaya, Kristu mwa nyu, ri uwehererya wo waarya.

²⁸ Yooyo nonlalyehu hi, naalopolaka ni naasomihaka na ankhili atthu othene, wiira naathoonyihere atthu othene anari oomalela mwa Kristu.

²⁹ Phimaana kiikurumicaka nlattu wo yeeyo, kaanaka ikhotto toko ciryaya ikuru cawe cimmara nteko mwa mi.