Akalata 1 - Nleehano Nonaanano Imeetto; Moçambique

Isalamu

¹ Mi Paulu mmitthenka, ooruminya woohikhala wookhuma wa atthu ni mena wo mphantte wa pinatamu, nanso wa Yesu Kristu ni Nluku athumwanihu, amunwelelihile mwa atthu ookhwa,

² ni asunna othene ari ni mi, nantikhelaka ikereca co'Kalata, niiraka:

³ Nnema ni isalama wa nyu, cinkhuma wa Nluku Athumwanihu ni wa Yesu Kristu,

⁴ eevaherenre nlattu wo'tampi cihu wiira anoopole nttuniyani nrihu moohiloka mu, toko cintthunawe Nluku Athumwanihu,

⁵ ri onttittimiho noohimala. Ameni.

Khuuwo nhupi woorera nkina

⁶ Vano kinawutikhinacani nyu nlattu woonsempa woohipica ule wiihanneni ni nnema na Kristu, mpaka utthara nhupi nkina uneereliya nhupi woorera,

⁷ uhiri nhupi weekhweli. Itthu ineerannya va iri yowiira atthu akinaku anawukukureehani, aphavelaka uttinttaniha nhupi woorera wa Kristu.

⁸ Hata nikhale hi atthuna ncelo o wirimu oolalyeerakani nhupi woovirikana wuulaleenryakani, alaphiye!

⁹ Vano toko cihimilehu, kinawaakuleliha: Akhala wiira haawo nolalya nhupi woovirikana waakhenlenyu, alaphiye!

¹⁰ Nnoona wiira kimphavela uttottopeliya na atthu atthuna ni Nluku? Atthuna kimphavela waaciveliha atthu? Yiiriyaka kaaphavelaca waaciveliha atthu, akaakhala nrumeyi a Kristu.

Paulu, eehaninye ni Nluku

¹¹ Asunnaka, kimphavela ncuwele wiira nhupi woorera unlalyaka mi khunkhuma wa ntthu.

¹² Maana mi ciicammo, akaakhenle mwa ntthu ni akiitthucihiye. Uhiya commo, mi kaakhenle mwa Yesu Kristu ni wooniheriya.

¹³ Vano nyu nheewa mananna ceettaaka nttiinini ya ayuta ni coomolanihacaka wo nkhitto ikereca ya Nluku, kiphavelaka wiira kikwanyulace.

¹⁴ Nttiinini ya ayuta, mi kaamwaapwaha ayuta enci o macusa aka, ni kaari mayovarecesa ilema co mayapaapa.

¹⁵ Nanso Nluku hokaawayaniha ukhuma munthuukwani mwa amaama ni hokiihana wo nnema nawe. Vano wancivenlyaya

¹⁶ ukithoonyera Mwanawe wiira kinlalye iriyari ya amalaponi, khakinkohakohile hata ntthu mmoca.

¹⁷ Akirweele uYerusalemu wiira koonanane ale yaari amitthenka mi kihinaya ukhala, nanso kahorwaa wArapiya, ni kahohokoleela tho uTamasiku.

¹⁸ Wahoolo cinavinrene myakha miraru, kahorwaa uYerusalemu wiira kancuwele Peturu coo ni coo, ni kahokhala ni yooyo mahuku khumi na mathanu.

¹⁹ Nanso akoonne amitthenka akina tho, ari hinookhala Yakopu, munnaya Apwiya.

²⁰ Vano itthu inowantikhelakani iri yeekhweli, wamiithoni wa Nluku kinhimyaca wiira akinootha.

²¹ Wahoolo kahorwaa mittetthe co'Siriya ni uSilisiya.

²² Mi akaacuweliya mmakereca co'Yuteya ciri mwa Kristu.

²³ Nanso yaaneera wiiwa paahi wiira: Yoole aanoomolanihaca khalayi ule, vano neera alalyaka nroromelo nenno naaphavelawe ukwanyulaca nno.

²⁴ Ayo yaananttittimiha Nluku nlattu wawaka.