Afilipu 1 - Nleehano Nonaanano Imeetto; Moçambique

Isalamu

¹ Mi Paulu ni Timotiyu, ipottha ca Yesu Kristu, wa attakattifu othene mwa Yesu Kristu wamoca na ahooleli ni matiyakonu ari uFilipu:

² Nnema ni isalama wa nyu, cinkhuma wa Nluku Athumwanihu ni wa Apwiy'ehu Yesu Kristu.

Paulu nawaavekelela aamini o'Filipu

³ Vano kinaansukuru Nluku aka imaara cothene cinwupuwelakani.

⁴ Ukati unoovekelelakani nyu othene, kinkhala ootteeliya

⁵ nlattu woonitakaneelana mulalyani nhupi woorera ukhuma nihuku noopacera mpaka nna va.

⁶ Kihokupalela ukhala ikhweli wiira, yoole pacenre nteko womaana mwa nyu, naahala umalihera mpaka nihuku na Yesu Kristu.

⁷ Maana ila itthu ila iri yo'sariya uwupuwelelani nyu othene, kontha kihoohelani wanrimani waka ni nyu nhopanka mphantte muntekoni ukivahilyawe Nluku ni nnema nawe, muutthukiyani mwaka, mpaka caakihilyaka ni kithoonyenryaka nhupi woorera.

⁸ Kontha Nluku phiri saahiti muunukheliyani urinaka wa nyu othene, ni ikiriri ca Apwiya Yesu Kristu.

⁹ Vano mi kinaanvekela Nluku wiira nifento ninyu nno nuncererye cinene muucuwelacani ni mwaankhilini mothene,

¹⁰ waacera wiira nthanle citthu comaana ni nkhale atthu eekhweli ni oohicovaciya mpaka nihuku na Kristu,

¹¹ nnacanrene mihokorokho co'sariya cinhalawe uttittimiheriya n'ulapeliya Nluku mwa Yesu Kristu.

Ukumi ri Kristu

¹² Asunnaka, kimphavela ncuwele wiira, citthu cikikhumelenle cihokavihera wiira nhupi woorera urwee uhoolo.

¹³ Kontha wamiithoni wo mayorontta o'hano ni atthu othene, uhocuweliya wiira kiri nkalaposo nlattu wa Kristu.

¹⁴ Nlattu wootthukiya waka, asunnaka enci aholipa irima n'ukhuluvela mwa Apwiya, anaalalya nuulumo woohoova.

¹⁵ Weekhweli akina ayo anonlalya munttimani ni nhaceni, nanso akina anonlalya Kristu ni nrima wo'raati.

¹⁶ Ale anlalya wo'raati, anlalya wo nifento, kontha ahocuwela wiira kiheesiya ukhala mwaakihi o nhupi woorera.

¹⁷ Nanso akina ayo anonlalya Kristu woohi ikhweli yaavyaka imphavelaya. Ayo anooniha toko anoncerera mahuviho o matthukeliyo aka.

¹⁸ Vano iyo irina maanani? Nanso imphavelaka iri yowiira, mananna phi mananna, hata ukhale yeeriyaru, atthuna pooti ukhala weekhweli, Kristu alalennye. Commo, nanlelo kinaatteeliya ni kinaavira kitteeliyaka.

¹⁹ Maana kinaacuwela wiira iyo inaakiwiihera utaphuliya, nlattu weeswali cinyu ni wookaviheriya ni Nnepa wa Yesu Kristu.

²⁰ Toko commo, kinaawehererya n'uroromela wiira khiiwo inhala ukuulihiiha muru. Nanso, n'ukhuluvela wothene, Kristu nohala ukhala owunnuwihiya mwirutthuni mwaka, ukhuma khalayi mpaka nna va, pooti ukhala nkumi atthuna ukhwa.

²¹ Maana wa mi, ukumi ri Kristu, ni ukhwa iri ifayita.

²² Nanso wakhalaka wiira ukumi wo mwirutthuni unwiiha nhokorokho wo miteko caka, vano akincuwela yoothanla.

²³ Vano miphantte coomiili cinaakaameleliha, kiphavelaka ukhuma wiira kakhale ni Kristu, maana iyo phi itthu yoorera venci.

²⁴ Nanso nlattu wa nyu, itthu yoorerela iri ukhala mwirutthuni.

²⁵ Kinarinene ula nkupalelo ula, kihocuwela wiira kinaahala ulokela ni nyu othene, waacera wiira nrwee uhoolo ni utteeliya munroromeloni,

²⁶ wiira kawaaka tho nwo, wiittottopa winyu mwa Yesu Kristu wuncererye nlattu wawaka.

Upwaherera ni upisa nrima

²⁷ Nanso nnolamuliya paahi weetta toko ciinryaya nhupi woorera wa Yesu wiira, hata wanhalaka uwa wuwehani, pooti uhikhala ni nyu, kiiwe wiira nri nnepa mmoca, mwaanaka wamoca ni nroromelo no nhupi woorera.

²⁸ Nhikhale owoopopihiya na ale anoovaanyihani. Wo yaayo uri nthoonyero wookwanyuwa, nanso wa nyu, uri nthoonyero wo woopwa, ni iyo inkhuma wa Nluku.

²⁹ Maana nyu nhovahiya ihathuwa kahi paahi yoonkupali Kristu, nanso ciicammo yoohuva mwa yooyo.

³⁰ Kontha nyu nnaana yeele ikhotto yaakoonnenyu kaanaka ile, nanlelo kineera kaanaka toko cineewenyu.