Aebraniya 1 - Nleehano Nonaanano Imeetto; Moçambique

Yesu Kristu phi muulupale wo waapwaha ancelo

¹ Khalayi, Nluku ahoolumana mayapaapehu imaara cinci wo mananna menci atthumiriki minapiyu,

² nanso ala mahuku oomalihera ala, Nluku nonuulumana antthumiriki Mwanawe. Yooyo hompanka mayowaakhela o citthu cothene, ni mwa yooyo hopattusa ittuninya.

³ Yooyo mwan'oyo phiri waarya wo nttittimiho ni ilatarato yoothoonyera makhalelo a Nluku. Uyo phinlipiha citthu cothene ni woorya wo nuulumo nawe. Naarapihilene atthu itampi caya, honkoma moono wo nlopwana wa Nluku o wirimu ni o'kuru cothene.

⁴ Phimaana hokhala muulupale wo waapwaha ancelo, n'uvahiya ncina no waapwaha yaayo.

⁵ Vano Nluku khaawo ncelo mwiirenlyawe wiira: We uri mwanaka, mi ilelo kihooyara. Ni eeraka tho: Mi kinhala ukhala athumwana ni we unhala ukhala mwanaka.

⁶ Nanso Nluku unruma wawe mwanawe ontthaara mwiilaponi, eenre: Ancelo othene anlapele.

⁷ Nluku, aacaka ancelo, aheera: Nluku nawaatatusa iphyoo ancelo awe, ni arumeyi awe nawaatatusa malimi o mooro.

⁸ Nanso mwa Mwanawe, eenre: Nyu Nluku, ihice enyu iri yoohimala; ni ikopo yo'lamuli wo'mwene enyu uri wo'sariya.

⁹ Vano uhofenta isariya ni uhorusanana coonanara; phimaana Nluku howiitthela makhura ootteeliha nrima wo waapwaha asikhwaa.

¹⁰ Ciicammo cowantikhiya cineera: Wupaceroni, Apwiya nhopattusa itthaya, ni irimu iri nteko wo mmatatani mwinyu.

¹¹ Cothene cinaahala umalamala, nanso nyu nnaakhala woohimala; khweli othene ayo anaahala ukhucuwa toko ikuwo.

¹² Nyu nnokowaapinttaca toko ikuwo, ayo anaahala upittinkuliya; nanso nyu phi nyu ni mahuku inyu khaammala.

¹³ Nluku khamwiirenle hata ncelo mmoca: Wunkome moono aka wo nlopwana, mpaka wanhalaka weesa eenani aa toko ntapita noonyakelela.

¹⁴ Vano ancelo phapani? Ancelo ari minepa cinruminya wiira caarumeele anhala woopwa.