2 Akorintu 1 - Nleehano Nonaanano Imeetto; Moçambique

Isalamu

¹ Mi Paulu, mmitthenka a Yesu Kristu nlattu wootthuna Nluku, ni munnaka Timotiyu, kinaantikhela ikereca ya Nluku iri uKorintu, wamoca na attakattifu othene o wAkaya:

² Nnema ni isalama, cinkhuma wa Nluku Athumwanihu ni a Apwiy'ehu Yesu Kristu, cikhale ni nyu.

Nluku phi mpepeci ihu

³ Attottopeliye Nluku ni Athumwanaya Apwiy'ehu Yesu Kristu, Apaapa o'kiriri ni Nluku o nipepeco nothene,

⁴ nonipepeca mmasakhani mwihu mothene, wiira, ni nipepeco naakhenlehu wa Nluku, ciicammo naapepece ale ankhuna masakha.

⁵ Maana toko cincivilyaya mahuviho a Kristu mwa hi, ciicammo mwa Kristu, ninawinciva nipepeco.

⁶ Nanso hi nahuvihiyaka, uri wo wiira nyu mpepeciye ni moopoliye. Hi napepeciyaka, uri wo wiira ni nyu mpepeciye ni nenno nipepeco nno nimmwaana upisa nrima, wiira nvilele mahuviho ankhunehu ayo.

⁷ Commo, nwehereryo urinehu wa nyu uri woolipa, maana ninaacuwela wiira, wo yaayo mananna ampankenyu mphantte mmahuvihoni mwihu, ciicammo nnaapanka mphantte mumpepeconi mwihu.

⁸ Asunnaka, khanintthuna wiira ntikhinace masakha akhunnehu wAsiya. Yaayo masakha ayo yaari moolupale wahinooryehu uvilela, ni khanaarina nwehereryo wowiira ninaakhala akumi.

⁹ Khweli nahoona wiira niholakeliya wiiviya, wiira hi nihiikhuluvele naasinene, nanso ninkhuluvele Nluku, nonweleliha atthu ookhwa.

¹⁰ Uyo honaakihera ni naapwaherera unaakihera mwa cowoopiha co nookhwa. Khweli hi nihaana nanlelo nwehereryo mwa yooyo, nikupaleelaka wiira uyo naapwaherera unaakihera,

¹¹ nyu nnikaviheraka ni mavekelo enyu. Commo enci anaahala usukuru nlattu wo hi, wanooneliyehu ikiriri nlattu wo waakhuliya mavekelo a atthu enci.

Paulu naarukunusa coopuwenlyawe uvara

¹² Uno phi wiittottopa wihu, kontha ankhili ihu anaavaha usaahiti, mananna ankhalehu mwiilaponi, venci venci wiiwanana urinehu ni nyu, unhooleliya n'uttakattifu ni ikhweli cinkhuma wa Nluku, woohikhala nlattu wa ankhili wa ntthu nanso toko ciryaya nnema na Nluku.

¹³ Maana khiiwo iwantikhenlehuni inhalenyu uhoorya usoma n'uhiiweeha. Kinaakupali wiira,

¹⁴ toko cinrenyu wooniiweeha mphantte nkina, nnaahala wiiweeha wiira, pooti wiittottopa nlattu wo hi, toko hi cinhalehu wiittottopa nlattu wo nyu nihuku na Apwiya Yesu.

¹⁵ Ni yoola nkhuluvelo ula, kiholakela uwa uwoonananani toko nyu, wiira nrerihiye imaara yonayeeli.

¹⁶ Kahotthuna wiira kiwootoleni woorwa uMasetoniya, ni wooturuwa wonwo, wiira nkikavihere ikwaha aka yorwaa uYuteya.

¹⁷ Vano walakenlyaka commo, maanaya wiira akuupuwenle sana? Atthuna kakhalanaka mawooni, kimpanka toko o nttuniyani, mpaka ukhalana moolumo meeli aneeriya aye, aye, ni mena, mena?

¹⁸ Nanso, toko Nluku ciryawe ookhuluvelyaa, nhupi unoovahehuni khunakhala wowiira: aye ni mena.

¹⁹ Maana Yesu Kristu, Mwana a Nluku, laleeriyenyu ni mi, Sila ni Timotiyu, khawaari wo aye ni mena, nanso mwa yooyo waari aye.

²⁰ Maana, mikhuluveliho cothene cipankilyawe Nluku, enci ari mwa Kristu aneera khweli. Phimaana mwa yooyo, noromoliya Ameni wiira Nluku attittimihiye.

²¹ Khweli Nluku phintthuna wiira hi ni nyu nikhale oolipa mwa Kristu. Uyo honitthapela

²² n'unitthitta toko awawe n'unihela Nnepa awe munrimani mwihu toko nkhuluveliho.

²³ Nluku phi saahiti aka, maana uyo naacuwela nrima aka. Kiholakela uhituruwela uKorintu kaaceraka wuunemecerani.

²⁴ Kuhimweni wiira nimphavela ulamula nroromelo ninyu, nanso nimphavela uvaraca nteko wamoca, wiira ntteeliye, maana nroromelo phinoolipihani.