1 Peturu 1 - Nleehano Nonaanano Imeetto; Moçambique

Isalamu

¹ Mi Peturu, mmitthenka a Yesu Kristu, kinwantikhelani nyu aletto mmwaryeenle uPontu, uKalata, uKapatosiya, wAsiya ni uPitiniya,

² oothanliya toko caalikelenlyawe Nluku Paapa, oottakattifihileni ni Nnepa Nttakattifu, wiira mmwiiwelele Yesu Kristu ni iphome awe yuumwareeleni. Nnema ni isalama wa nyu cikhale cowuncererya.

Nwehereryo wookumi

³ Attottopeliye Nluku, Athumwanaya Apwiy'ehu Yesu Kristu. Wo'kiriri caya ahoniyara wonayeeli n'univaha ukumi wo nwehereryo, nlattu wo wunwelela Kristu wariyari wa atthu ookhwa,

⁴ wiira niphwanye yoohiyeriya yoohikhucuwa, yoohi manepa ni yoohuntta, isunkeriyenyu wirimu.

⁵ Nyu nnosunkiya ni ikuru ca Nluku, toko ciryaya makupalelo wiira mphwanye woopwa utthenkaciye ni uhanle vakani uthoonyiheriya ukati woomalela.

⁶ Phimaana ntteeliye, unookhalaru wiira, nnolamuliya ucukulihaciya wo'kati vakani nlattu woolawihaciya ni mananna menci.

⁷ Vano waneerannya commo waacera wacuwannye wiira, nroromelo nirinenyu nno niri nootepa ifayita woovikana iwooru inkhwelakhwela hata irerihiye ni mooro. Nenno nroromelo nno ninaahala uttittimihinya, uttottopeliya ni wunnuwihiya ukati unhalawe uwa Yesu Kristu.

⁸ Nyu nnohimoonaru, nnaanfenta ni nhonkupali nhinamoona. Vano commo nyu nnaatteeliya n'utthapa venci cinene mpaka wahinooryaya utaphulela,

⁹ maana nyu nneera mphwanyaka inaavyenyu n'ukupali winyu, uri woopwa wo iroho enyu.

¹⁰ Woono woopwa uno, minapiyu cihaavyavya ni ciholalyaa mwaha wo nnema niwiiheriyenyu.

¹¹ Minapiyu nnyo cihaavyavya ukati ni mananna caahalaya ukhala ihaali yo woopwa. Nnepa wa Kristu waarinaya, waahimya yoola ukati wo'lelo ula, uhimyacaka caahalaya ukhala mahuviho a Kristu ni nttittimiho naahalawe waakhela.

¹² Nluku ahoonihera minapiyu wiira nhupi waalalyaya khaaca ayo, nanso waawaacani nyu. Vano nyu nhaakhelela nhupi woorera, nlalyeeriyaka na ale yuhimenryeni ni Nnepa Nttakattifu uruminye wirimu. Mpaka ancelo anaaphavela ucuwela ratta yooyo nhupi uyo.

Nkhale attakattifu

¹³ Phimaana mwiitthenkemanihe ni mwiicinanele, nwehereryaka ni nrima wothene nnema ninhalenyu uwiiheriya wanhalawe uthoonyiheriya Yesu Kristu.

¹⁴ Nkhale asaana o wiiwelela, nhikhanyerere upanka ilema ceettelenyu khalayi wahaacuwelenyu itthu.

¹⁵ Vano, ukhala wiira ule wiihanneni ri nttakattifu, ni nyu ciicammo nkhale attakattifu wo citthu cothene cinvarenyu,

¹⁶ kontha ihantikhiya wiira: Nkhale attakattifu kontha mi ki nttakattifu.

¹⁷ Vano toko cimmwiihanenyu Paapa ule hirina nthanlo na atthu, nanso nohukhumu awehaka nteko wo khula ntthu, ciicammo mweetteke ni ihisima ukati urinyu mwiilaponi mu.

¹⁸ Kontha nnaacuwela wiira khawaari nlattu wo citthu cimmala, toko iparatha, atthuna iwooru, phikhanlenyu owoopoliya mmakhaleloni mwinyu oohiloka, yuuhiyenryayani mayathumwaninyu okhalayi,

¹⁹ nanso moopoliye ni iphome yo'fayita ya Kristu toko yo mwakhontwaa oohipahuwa ni oohi mahirihiri.

²⁰ Uyo cuweliye ihinompiya ittuninya, nanso thoonyiheriye wo yoola ukati woomalela ula, nlattu wo wufentani.

²¹ Nlattu wa Yesu Kristu phinkupanlinyu Nluku, yoole munwelelihile wariyari wa atthu ookhwa ni nvahile nttittimiho. Phimaana ukupali winyu nwo n'uwehererya winyu nwo ukhale mwa Nluku.

²² Vano warapihilenyu mirima cinyu nlattu woottharihelela ikhweli, mweettelaka nifento neekhweli ni noohithepyana, nkhalaneke nifento no wanrimani, nfentanaka venci ntthu ni nkhwawe,

²³ kontha nri ooyariya wonaanano, woohikhala wo ntthu nokhwa, nanso hinkhwa mwa nlattu wo nuulumo na Nluku, nenno niri nikumi ni noohimala.

²⁴ Kontha atthu othene ari toko malasi ni urera waya uri toko ithutu co maluwa. Malasi anawuuma ni ithutu caya nnyo cinaamora

²⁵ nanso nuulumo na Apwiya ninaakhala ukati wothene. Paahi, nna phi nuulumo nilalyeeriyenyu.