1 Akorintu 1 - Nleehano Nonaanano Imeetto; Moçambique

Isalamu

¹ Mi Paulu, kiihaninye wootthuna wa Nluku, wiira kikhale mmitthenka a Yesu Kristu, wamoca ni munna aka Sostene,

² kinaasalamiha ikereca ya Nluku iri uKorintu, na ale oottakattifihiya mwa Yesu Kristu, yiihaninye wiira akhale attakattifu, na ale ari mapuro othene aromolaka ncina na Apwiy'ehu Yesu Kristu ri Apwiya aya ni Apwiy'ehu:

³ Nnema ni isalama cinkhuma wa Nluku Athumwanihu ni wa Apwiy'ehu Yesu Kristu cikhale ni nyu.

Iparakha cinkhuma mwa Yesu Kristu

⁴ Vano, ukati wothene, kinaansukuru Nluku aka nlattu wa nyu ni nlattu wo nnema nawe nivahiyenyu mwa Yesu Kristu.

⁵ Kontha mwa cothene nnyo nhothacirihiya mwa yooyo, nnuulumoni ni muucuwelacani mothene.

⁶ Ciicammo, usaahiti wa Kristu uri woocuwannya mwa nyu,

⁷ wiira ukati unwehereryenyu uwa wa Apwiy'ehu Yesu Kristu, ihuuhaleleni mena ivahiya imoca.

⁸ Ayo ammowulipihani mpaka ummaleloni, wiira nhicovaciye naphiyaka nihuku na Apwiy'ehu Yesu Kristu.

⁹ Nluku ri oororomelyaa, yooyo wiihanneni wiira mwaatane mwa mwanawe Yesu Kristu Apwiy'ehu.

Uhawulannya wo'kereca yo'Korintu

¹⁰ Asunnaka, kinawulepelani mwa ncina na Apwiy'ehu Yesu Kristu, wiira othene muulumace itthu imoca ni nhiihawulanace, nanso nkhale wamoca, mmoopuweloni ni mmawoonini.

¹¹ Kontha, kihoohimeriya ni ntthoko na Kolowe wiira nnaanyakulihana ayaayoru.

¹² Kontha akina wa nyu aneera: Mi a Paulu. Nkin'oyo neera: Mi a Apolu. Nkin'oyo neera: Mi a Peturu. Ni nkin'oyo neera: Mi a Kristu.

¹³ Kristu ri ookawannyaca? Paulu hokhomeliya mwa nlattu wa nyu? Mpattisiye mwa ncina na Paulu?

¹⁴ Mi kinaansukuru Nluku, maana mwa nyu khaawo kimpattisilyaka, ari hikhanle Krisipu ni Kaiyu,

¹⁵ waacera wiira hikhale nohala wiira mpattisaciye mwa ncina naka.

¹⁶ Ciicammo kihaapattisa amuci o ntthoko na Estefana; waahiya ala, akimmoona tho nkina kimpattisilyaka.

¹⁷ Maana Kristu khakirumile wiira kipattise, nanso wiira kilalyee nhupi woorera; woohikhala nlattu wa ankhili a pinatamu, waacera wiira ikuru co nookhwa a Kristu wansalapani cihikhale cithiru.

Kristu ri ikuru ni ankhili a Nluku

¹⁸ Khweli, nhupi wo wansalapani uri woovyaavyaa wa atthu arimenle, nanso wa hi niri owoopwa, uri ikuru ca Nluku.

¹⁹ Maana ihantikhiya wiira: Kinaahala waakwanyulaca ankhili a atthu ni kinaahala umalihaca ucuwelaca wa acuweli.

²⁰ Vano mayankhili ri vayi? Nsomi ri vayi? Mayocuwelaca ilapo ila ri vayi? Nluku haapanka ankhili o mwiilaponi ukhala alolo.

²¹ Vano Nluku n'ankhili awe, khaahiyerenre atthu wiira ancuwelele n'ankhili aya. Uhiya commo, Nluku aholakela woopola ale ankupali ni pankile ni nhupi woorera unlalyehu, yooyo unheliya ukhala nlolo.

²² Kontha ayuta anlepela mitikiniho, ni akereku anaavya ankhili;

²³ nanso hi ninonlalya Kristu khomeliye, ri nkakathulo wa ayuta ni ulolo wa amalaponi;

²⁴ nanso wa ale yiihaninye, upacera akereku mpaka ayuta, Kristu phiri ikuru n'ankhili a Nluku.

²⁵ Maana ile inkhala toko ulolo wa Nluku, phiri ankhili oovikana a atthu; ile inkhala toko ukenkennya wa Nluku, phiri yootepa ulipa woovikana ikuru ca atthu.

²⁶ Vano asunnaka, muupuwele mananna caarinyu nhineehaninya ni Nluku. Atthu vakani phaari oocuwelaca, atthu vakani phaari okuru ni atthu vakani phaari o maloko oocuwannyaa.

²⁷ Uhiya commo, Nluku hothanla citthu cooneliya ukhala cilolo co mwiilaponi, wiira aapattihace ihaaya aankhili. Nluku hothanla citthu cooneliya ukhala cookenkennya co mwiilaponi, wiira aapattihace ihaaya okuru ayo.

²⁸ Nluku hothanla citthu cowiimaaliha ni coothanyinya co mwiilaponi ni nnye cihiri ittiitthu, wiira akhwelakhwelihe ciri ittiitthu nnyo;

²⁹ waacera wiira hikhale nohala wiittottopa wamiithoni wa Nluku.

³⁰ Nlattu wa Nluku, phirinyu mwa Yesu Kristu, yooyo ri ankhili a Nluku wa hi, maanaya wiira, isariya, uttakattifu, ni woopola,

³¹ toko cantikhiyaya wiira: Ule neettottopa, eettottopeke mwa Apwiya.