Noo Mian 7 - Noo Mian 1748

CAB. VII.

¹ Ny briwnys‐jee, as cha bee shiu er nyn mriwnys.

² Son lesh y vriwnys ta shiu briwnys, bee shiu hene er nyn mriwnys. As lesh y towse ta shiu towse, bee eh er ny howse diu reesht.

³ As cre’n fa t’ow cronnagh yn brenneein t’ayns sooyl dty vraar, agh cha vel oo smooinaght er y beam t’ayns dty hooyl hene?

⁴ Ny kys jir oo rish dty vraar, Lig dou yn brenneein y ghoall ass dty hooyl, as cur‐my‐ner ta beam ayns dty hooyl hene?

⁵ Er‐crauee‐oalsey, tilg hoshiaght yn beam ass dty hooyl hene, eisht bee soilshey ayd dy ghoal yn brenneein ass sooyl dty vraarey.

⁶ ¶ Ny cur‐jee ny ta casherick da ny moddee, cha‐moo hilgys shiu ny pearlyn eu roish muckyn, er aggle dy stamp ad ad fo nyn gassyn, as dy jyndaa ad reesht as dy lot ad shiu.

⁷ ¶ Yearree‐jee, as yiow shiu: shir‐jee as nee shiu feddyn; bee‐jee aignagh fosley gheddyn, as bee eh er ny osley diu.

⁸ Son ta dy chooilley annane ta gearree, geddyn; as y fer ta shirrey, feddyn: as eshyn ta aignagh fosley gheddyn, bee eh er ny osley da.

⁹ Ny quoi’n dooinney nyn mast eavish, ver clagh da e vac, [my hirrys e meer?]

¹⁰ [Ny] my hirrys e eeast, der e ard‐nieu da?

¹¹ My ta toiggal er‐y‐fa shen eavish ta olk, kys dy choyrt giootyn mie da nyn gloan, cre woad smoo nee’n Ayr eu t’ayns Niau reddyn mie y choyrt dauesyn ta janoo aghin huggey.

¹² Shen‐y‐fa dy chooilley nee cre‐erbee balliuish deney dy yanoo riuish, jean-jee shiuish myr shen roosyn: son shoh yn leigh as ny phaderyn.

¹³ ¶ Gow‐jee stiagh er y yiat coon; son liane ta’n giat, as moar ta’n raad ta leeideil gys toyrt‐mow, as shimmey ta goll er:

¹⁴ Er‐y‐fa dy nee chion ta’n giat, as coon ta’n raad ta leeideil gys bea, as schiark ta dy gheddyn magh eh.

¹⁵ Cur‐jee twoai jeh phaderyn foalsey, ta cheet hiu ayns coamraghyn keyrragh, agh cheu‐stie ta’d nyn moddee‐oaldey jollyssagh.

¹⁶ Ver shiu enney orroo liorish nyn mess: vel mess y villey‐feeney er ny heiy jeh drinyn, ny mess y villey-figgagh jeh onnanyn?

¹⁷ Myr shen ta dagh billey mie tilgey mess mie, agh ta drogh villey tilgey drogh vess.

¹⁸ Cha vod billey mie drogh vess y chur magh, ny drogh villey mess mie.

¹⁹ Ta dy chooilley villey, nagh vel gymmyrkey magh mess mie, dy ve giarit sheese as tilgit ayns yn aile.

²⁰ Shen‐y‐fa liorish nyn mess ver shiu enney orroo.

²¹ ¶ Cha nee dy chooilley annane jir rhyms, Hiarn, Hiarn, hed stiagh ayns reeriaght niau: agh eshyn ta janoo aigney m’ayrey t’ayns Niau.

²² Jir ymmodee rhyms ’sy laa shen, Hiarn, Hiarn, nagh vel shin er nianoo phaderys ayns dt’ennyms? as ayns dt’ennym er hilgey magh drogh spyrrydyn? as ayns dt’ennym er nianoo ymmodee obbraghyn Yyndyssagh?

²³ As eishtagh focklyms magh daue, Cha ren mee rieau goall riu, immee‐jee voym, ghrogh yantee.

²⁴ ¶ Quoi‐erbee er‐y‐fa shen ta clashtyn ny goan shoh ayms, as ta janoo ymmyd mie jeu, soyllee‐ym e gys dooinney creeney hrog e hie er creg:

²⁵ As haink y fliaghey neose, as dhatt ny tuillaghyn, as heid ny geayghyn, as chaeu ad er y thie shen. As cha huitt eh, son dy row yn undin echey er creg.

²⁶ As bee dy chooilley annane ta clashtyn my ghoan shoh, as nagh vel janoo ymmyd mie jeu, er ny hoylagh gys dooinney ommijagh, hrog e hie er y gheinnagh:

²⁷ As huitt y fliaghey, as dhatt ny tuillaghyn, as heid ny geayghyn, as chaeu ad er y thie shen: as huitt eh, as moar va’n toyrt‐mow echey.

²⁸ As haink eh gy kione, tra va Yeesey erreish ny goan shoh y livrey, dy ghow yn pobble yyndyss moar jeh’n ynsaghey echey.

²⁹ Son dynsee e ad, myr fer va pooar echey, as cha nee myr ny scruderyn.