Noo Mian 3 - Noo Mian 1748

CAB. III.

¹ Ayns ny laghyn shen haink Ean Bashtey, preacheil ayns faasagh Judea,

² As gra, gow‐jee arrys: Son ta Reeriaght Yee er‐gerrey.

³ Son shoh e va loarit jeh, liorish y Phadeyr Esaias, gra, Coraa fer gemagh ayns yn aasagh, Jean‐jee aarloo raad y Chiarn, jean‐jee ny cassanyn echey kiart.

⁴ As va ec Ean keddyn coamrey dy chlooie chamel, as cryss liare mish ny meeghyn echey; as va e veaghey locustyn as mill feie.

⁵ Eisht hie magh huggey Jerusalem as ooilley Judea, as ooilley’n cheer my‐geart Jordan,

⁶ As va’d er nyn mashtey liorish ayns Jordan, goall rish nyn beccaghyn.

⁷ ¶ Agh tra honnick e ymmodee jeh ny Phariseyn as ny Sadduceyn cheet gys e vashtey, doort e roo, O heeloghe dy ard‐nieughyn, quoi t’er chur raue div, dy hea veih’n chorree ta ry heet?

⁸ Ymmyrk‐jee magh er‐y‐fa shen mess cooie jeh arrys.

⁹ As ny smooinee‐jee dy ghra cheu‐stie jiu hene, Ta Abraham ain son nyn ayr: son ta mee gra riu, dy vel Jee able jeh ny claghyn shoh, cloan y hroggal seose da Abraham.

¹⁰ As nish myrgeddyn ta’n teigh er ny choyrt gys fraue ny miljyn: shen‐y‐fa ta dy chooilley villey nagh vel gymmyrkey magh mess mie, dy ve giarit sheese as tilgit ayns yn aile.

¹¹ Ta mish dy jarroo dyn mashtey shiu lesh ushtey gys arrys; agh ta eshyn ta cheet my yei, ny spooaral ny mish, ny Braagyn echey cha vel mee feeu dy ymmyrkey: Bashtee eshyn shiu lesh y spyrryd Noo as lesh aile.

¹² Ta’n cleayst echey ayns e laue, as nee e dy bollagh e laare‐arroo y ghlenney, as gowee e e churnaght stiagh ayns y thie‐tashtee, agh loshtee e yn choau lesh aile nagh vod v’er ny vooghey.

¹³ ¶ Eisht haink Yeesey veih Galilee gys Jordan gys Ean, dy ve er ny vashtey liorish.

¹⁴ Agh loar Ean noi, gra, Ta feme ayms er ve bashtit liorts, as vel uss er jeet hyms?

¹⁵ Dreggyr Yeesey, as doort e rish, Cur raad dou nish: son shoh myr te cooie dooin dy chooilley chairys y chooilleeney. Eishtagh lig e da.

¹⁶ As hie Yeesey, tra ve’r ny vashtey, seose chelleeragh ass yn ushtey: as cur‐my‐ner va ny Niaughyn er nyn vosley er e skyn, as honnick e spyrryd Yee cheet neose goll rish calmane, as soie er.

¹⁷ As cur‐my‐ner, coraa veih Niau, gra, Shoh my Vac graihagh, jeh ta mee dy moar soiaghey.