Noo Mian 27 - Noo Mian 1748

CAB. XXVII.

¹ Tra va’n moghrey er jeet, hug ooilley ny ard-saggyrtyn as shanstyr yn pobble nyn goyrle dy cheilley, dy choyrt e gy baase.

² As erreish daue ve’r chiangley e, leeid ad e ersooyl, as livrey ad e gys Pontius Pilate yn kianoort.

³ ¶ Tra honnick eisht Yuase ren y vrah e, dy row e er ny gheyrey, ghow e arrys, as hug e lesh reesht ny jeih peeshyn as feed dy argid gys ny ard-saggyrtyn as y chanstyr,

⁴ Gra, Ta mee er nianoo peccah, ayns dy vel mee er vrah yn uill niau‐chyndagh. As doort adsyn, Cre ta shen dooinyn? jeagh uss da shen.

⁵ As hilg e sheese ny peeshyn argid ayns y chiamble, as jimmee e roish, as hie e, as ren e e hene y chroghey.

⁶ As ghow ny ard-saggyrtyn ny peeshyn argid as doort ad, Cha vel [eh] lowal dy choyrt ad mastey tashtaghyn y chiamble, er‐yn‐oyr dy nee leagh folley eh.

⁷ As ghow ad coyrle, as chionnee ad lieu magher fer ny craie, dy oanluckey joarreeyn ayn.

⁸ Shen‐y‐fa va’n magher shen enmyssit [yn] magher folley gys y laa t’ayn jiu.

⁹ (Shen y tra va cooilleenit ny va loarit liorish Jeremy yn phadeyr, gra, As ghow ad ny jeih peeshyn as feed dy argid, yn phrice echyssyn v’er ny phriceil, e ren adsyn jeh cloan Israel y phriceil.

¹⁰ As hug ad ad son magher fer ny craie, myr va’n Chiarn er noardaghey doos.)

¹¹ As hass Yeesey kiongoyrt rish y kianoort, as denee yn kianoort jeh, gra, Nee uss ree ny Hewnyn? As doort Yeesey rish, T’ow uss dy ghra eh.

¹² As tra ve er ny chassid liorish ny ard-saggyrtyn as y chanstyr, cha dug e ansoor erbee daue.

¹³ Eishtagh doort Pilate rish, Nagh vel oo clashtyn, cre wheelleen red ta’d shoh dy hoilshaghey dt’oi?

¹⁴ As cha dug e yn ockle dy ansoor da, ayns wheesh as dy ghow yn kiannoort yyndyss moar.

¹⁵ Nish ec yn ealley shen va’n kiannoort cliaghtey feysley daue pryssoonagh erbee dy bailloo.

¹⁶ As va oc ec y tra shen ard phryssoonagh va enmyssit Barabbas.

¹⁷ Shen‐y‐fa tra va’d er nyn jaglym cooidjagh, doort Pilate roo, Quoi sailliu mee dy eysley diu? Barabbas, ny Yeesey ta enmyssit Creest?

¹⁸ Son va fys echey dy nee ayns goanlys va’d er ny livrey seose e.

¹⁹ Tra ve erreish soie sheese er stoyl y vriwnys, hug e ven fys huggey, gra, Ny bee veg ayds dy yanoo rish y dooinney cairagh shen: son ta mish er hurranse ymmodee dy reddyn jiu ayns my chadley kyndagh rish.

²⁰ Agh choyrlee ny ard-saggyrtyn as y chanstyr yn pobble ad dy yanoo aghin son Barabbas, as Yeesey y choyrt gy baase.

²¹ Dansoor y kiannoort as doort e roo, Quoi jeh’n jees sailliu mee dy eysley diu? Doort adsyn, Barabbas.

²² Doort Pilate roo, Cre neem eishtagh rish Yeesey ta enmyssit Creest? Doort ad ooilley rish, Lig da ve’r ny chrossey.

²³ As doort y kiannoort, Cre’n oyr, cre te er nianoo dy holk? Agh deie adsyn ny smoo, gra, Lig da ve’r ny chrossey.

²⁴ ¶ Tra honnick Pilate nagh row geill er ny chur da, agh dy row ad aarloo dy irree magh, ghow e ushtey, as niee e e lauyn kiongoyrt rish y pobble, gra, Ta mish niau‐chyndagh jeh fuill yn persoon cairagh shen, jeagh‐jee shiuish da.

²⁵ Eishtagh dansoor ooilley’n pobble, gra, Yn uill echey dy row orrinyn, as er nyn gloan.

²⁶ ¶ Eisht deysle e Barabbas daue; as tra ve er chustey Yeesey, livrey e e dy ve er ny chrossey.

²⁷ Eisht hug sidooryn y chiannoort lieu Yeesey gys hall y vriwnys, as deie ad er y slane sheshaght jeh ny sidooryn.

²⁸ As rooisht ad e as hug ad er coamrey dy ghorrym‐jiarg.

²⁹ ¶ As tra va’d er fee crown dy ghrinyn, hug ad eh er y chione echey, as cuirtlagh ayns y laue yesh echey: as chroym ad nyn ghlioonyn kiongoyrt rish, as chraid ad mish, gra, Dy vannee [dhyt,] Ree ny Hewnyn.

³⁰ As chew ad shellaghyn er, as ghow ad y chuirtlagh, as woail ad e er y chione.

³¹ As erreish daue ve’r chraidey mish, ghow ad yn coamrey reeoil jeh, as hug ad e gharmad hene er, as leeid ad e ersooyl dy chrossey e.

³² As myr haink ad magh, hooar ad dooinney jeh Cyrene, va enmyssit Simon; eshyn ren ad y eaginaghey dy ymmyrkey e chrosh.

³³ As tra va’d er jeet gys ynnyd ta enmyssit Golgotha, ta shen dy ghra, ynnyd bollag,

³⁴ ¶ Hug ad da vinegar dy iv, as gall ny‐chione; as tra ve er vlashtyn eh, cha ballish giv.

³⁵ As ren ad e y chrossey, as reyn ad e gharmadyn, tilgey lottyn; dy voddagh shen ve cooilleenit va loarit liorish y phadeyr, Reyn ad my gharmadyn nyn mast oc, as er my chooat ren ad lottyn y hilgey.

³⁶ As hoie ad sheese as watch ad e ayns shen.

³⁷ As hoie ad harrish e chione yn vriwnys echey scruit, SHOH YEESEY REE NY HEWNYN.

³⁸ Eisht va daa vaarlagh er ny chrossey marish; yn derrey yeh er y laue yesh, as y jeh elley er y laue chiare.

³⁹ ¶ As chraid y vooinjer va goll shiaghey mish, cra nyn ging,

⁴⁰ As gra, Uss ta lieggal y chiamble, as dy hroggal eh reesht ayns tree laa, saue oo hene; my she Mac Yee oo, tar neose jeh’n chrosh.

⁴¹ Myr shen myrgeddyn ren ny ard-saggyrtyn craidey mish, marish ny scruderyn as y chanstyr, as doort ad,

⁴² Haue e feallagh elley, e hene cha vod e hauail: my she ree Israel e; lig da cheet neose jeh’n chrosh, as nee mad credjal ayn.

⁴³ Hreisht e ayns Jee; lig da e y livrey nish my sallish e: son doort e, She Mac Yee mee.

⁴⁴ Hilg ny maarlee myrgeddyn v’er nyn grossey marish yn leid keddyn er.

⁴⁵ Nish veih yn cheyoo oor, va dorraghys harrish ooilley’n cheer, gys yn nuyoo oor.

⁴⁶ As my‐geart yn nuyoo oor, deie Yeesey lesh ard choraa, gra, Eli, Eli, lama sabacthani? ta shen dy ghra, My Yee, My Yee, cre’n fa t’ow er my hreggeil?

⁴⁷ Doort part jeusyn va nyn shassoo ayns shen, tra cheayl ad shen, Ta’n dooinney shoh gemagh er Elias.

⁴⁸ As chelleeragh roie fer jeu as ghow e spunge, as lieen e eh lesh vinegar, as hug e eh er cuirtlagh, as heen e eh huggey dy iv.

⁴⁹ Doort y vooinjer elley, Faag‐jee eh, hee mad jig Elias dy hauail e.

⁵⁰ ¶ Tra va Yeesey er nemagh reesht lesh ard choraa, phaart e.

⁵¹ As cur‐my‐ner, va’n coodaghey va eddyr y chiamble as yn ynnyd casherick rapit veih my chielley, veih’n vullagh gys y laare, as ren y talloo cra, as ny creggyn scoltey.

⁵² As va ny oaiaghyn er nyn vosley, as ren ymmodee jeh kirp ny nooghyn va nyn gadley, girree seose,

⁵³ As cheet ass ny hoaiaghyn oc, lurg yn irree-seose-reesht echey, as goll stiagh ayns yn ard‐valley casherick, as ad hene y hoilshaghey da ymmodee.

⁵⁴ Nish tra honnick yn captan‐keead as adsyn va marish watchal Yeesey, yn cra-tallooin as ny reddyn v’er jeet gy kione, ghow ad aggle moar, gra, Dy firrinagh shoh va Mac Yee.

⁵⁵ As va ymmodee mraane ayns shen va dy akin e foddey vow, va er neiyrt er Yeesey veih Galilee as er hirveish er.

⁵⁶ Nyn mast oc va Moirrey Malaine, as Moirrey moir Jamys as Joses, as moir cloan Zebedee.

⁵⁷ Tra va’n fastyr er jeet, haink dooinney berchiagh jeh Arimathea va enmyssit Joseph, va myrgeddyn e hene er chredjal ayns Yeesey.

⁵⁸ Hie e shoh gys Pilate, as ren e aghin son corp Yeesey; eishtagh hug Pilate sarey yn corp dy ve er ny livrey.

⁵⁹ As tra va Joseph er ghoall yn corp, hoill e eh ayns aanrit glen,

⁶⁰ As doanluck e eh ayns yn oaie noa echey hene, v’er ny chley ayns creg, as roull e clogh woar er beeal yn oaie, as jimmee e roish.

⁶¹ As va Moirrey Malaine as Moirrey elley nyn soie jeeragh er yn oaie.

⁶² ¶ Nish yn nah laa lurg laa yn aarlaghey, haink ny ard-saggyrtyn as ny Phariseyn cooidjagh gys Pilate,

⁶³ Gra, Vainshter, ta cooinaghtyn ain dy doort yn moaltere shen, choud as ve foast bio, Lurg three laa neems girree reesht.

⁶⁴ Cur sarey, er‐y‐fa shen, yn oaie dy ve jeant shicker, derrey yn tress laa, er aggle dy jig yn vooinjer t’er ve sheer geiyrt er, ayns yn uy, as dy geid ad e ersooyl, as dy jir ad rish yn pobble, Te er nirree veih ny merriu; myr shen bee yn oill stierree ny smessey ny’n chied oill.

⁶⁵ Doort Pilate roo, Ta watch eu, immee‐jee reue, jean‐jee cha shicker jeh as oddys shiu.

⁶⁶ Myr shen hie ad as ren ad yn oaie shicker, sealal y chlogh as soiaghey watch.