Noo Mian 26 - Noo Mian 1748

CAB. XXVI.

¹ As haink eh gy kione, tra va Yeesey erreish ooilley ny goan shoh y loart, dy doort e roosyn va sheer geyrt er,

² Ta fys eu lurg daa laa dy vel fealley ny caisht dy ve ayn, as dy vel yn mac dooinney er ny vrah dy ve er ny chrossey.

³ Eisht va ny ard‐saggyrtyn as ny scruderyn as shanstyr yn pobble er nyn jaglym cooidjagh gys thie yn ard‐saggyrt va enmyssit Caiaphas,

⁴ As hug ad nyn goyrle dy cheilley, my‐chione Yeesey y ghoall gy follit, as y choyrt e gy baase.

⁵ Agh doort ad, cha nee er laa yn ealley, er aggle dy bee irree magh ayn mastey yn pobble.

⁶ ¶ Nish tra va Yeesey ayns Bethany ayns thie Simon yn lourane,

⁷ Haink huggey ben as box alabaster dy ooill feer deyr eck, as gheyrt ee eh er y chione echey, myr ve ny hoie ec bee.

⁸ Agh tra honnick y vooinjer va sheer geyrt er shoh, va’d jymmoosagh, gra, cre’n fa va yn jummal shoh jeant?

⁹ Son oddagh yn ooill shoh ve’r ny ve creckit son moarane, as er ny choyrt da ny boughtyn.

¹⁰ Tra hoig Yeesey shoh, doort e roo, Kys dy vel shiu boirey yn ven? son tiee er nobbragh obber vie orryms.

¹¹ Son ta ny boughtyn eu kinjagh meriu, agh mish cha vel eu kinjagh.

¹² Son liorish dy vel ee er gheartey yn ooill shoh er my chorp, tiee er nianoo eh gouyr my oanluckey.

¹³ Dy firrinagh ta mee gra riu, raad erbee dy bee yn sushtal shoh er ny phreacheil ayns ooilley’n teihll, bee shoh myrgeddyn ta’n ven shoh er ny yianoo, er ny insh; son cooinaghtyn jee.

¹⁴ ¶ Eishtagh hie fer jeh’n daa ostyl yeig, va enmyssit Yuase Iscariot, gys ny ard-saggyrtyn.

¹⁵ As doort e roo, Cre ver shiu doos, as livreym e hiu? As ren ad coonaant rish son jeih peeshyn as feed dy argid.

¹⁶ As veih’n tra shen ve shirrey caa dy vrah eh.

¹⁷ ¶ Nish er y chied laa jeh fealley yn arran millish, haink y vooinjer va sheer geyrt er Yeesey huggey, as doort ad rish, Cre’n raad sailt shin dy yanoo aarloo er dty hon dy ee yn Eayn caisht?

¹⁸ As doort e, Gow‐jee gys yn ard‐valley gys leid y dooinney shen, as abbyr‐jee rish, Ta’n maishter gra, Ta my earishys ec laue; freillym y chaisht ec dty hie’s marish y vooinjer ta sheer geyrt orrym.

¹⁹ As ren adsyn myr va Yeesey er noardaghey daue, as daarlee ad yn Eayn caisht.

²⁰ Nish tra va’n fastyr er jeet, hoie e sheese marish yn daa ostyl yeig.

²¹ As myr va’d gee, doort e, Dy firrinagh ta mee gra riu, dy jean annane eauish mish y vrah.

²² As va’d feer trimshagh, as ren ad toshiaght dy chooilley annane oc dy ghra rish, Hiarn, nee orryms t’ow cheet?

²³ As dansoor eshyn, gra, Eshyn ta thummey e laue mârym ayns y chlaare, e shen nee mee y vrah.

²⁴ Ta’n mac dooinney goll, myr te scruit jeh: agh smerrick da’n dooinney shen liorish vees yn mac dooinney er ny vrah: veagh eh er ny ve mie son y dooinney shen, mannagh beagh e er jeet er y teihll.

²⁵ Eisht dansoor Yuase ren y vrah e, as doort e, Vaishter, nee mish e? Doort eshyn rish, T’ow er ghra eh.

²⁶ ¶ As myr va’d gee, ghow Yeesey arran, as vannee e as vrish e eh, as hug e eh da ny hostyllyn, gra, Gow‐jee, ee‐jee, shoh my chorps.

²⁷ As ghow e yn cappan, as hug e booise, as hug e eh daue, gra, Iv‐jee ooilley jeh shoh.

²⁸ Son shoh my uill’s jeh’n chymney noa, t’er ny gheartey son ymmodee son leih peccaghyn.

²⁹ Agh ta mee gra riu, nagh niv‐ym maghey shoh jeh mess y villey‐feeney, derrey’n laa ivym eh ass yn noa mêriu ayns reeriaght my Ayrey.

³⁰ As tra va’d er ghoall arrane spyrrydoil, hie ad magh gys cronck ny Olivyn.

³¹ Eishtagh doort Yeesey roo, Failee yn credjue eauish ooilley noght kyndagh rhyms: son te scruit, Bwoaillym’s yn bochilley, as bee kirree yn chioltane er nyn skeylley.

³² Agh erreish dou ve’r nirree reesht, hem reue gys Galilee.

³³ Dansoor Peddyr as doort e rish, Ga dy vail credjue dy chooilley ghooinney kyndagh rhyts, cha vail my chredjue’s dy bragh.

³⁴ Doort Yeesey rish, Dy firrinagh ta mee gra rhyt, yn uy noght, roish my ger yn keillagh, dy nob uss mish three keartyn.

³⁵ Doort Peddyr rish, Dy beïn dy gholl gy baase mârt, cha nobbin oo. As er yn aght keddyn loar ooilley ny ostyllyn.

³⁶ ¶ Eishtagh haink Yeesey mâroo gys ynnyd va enmyssit Gethsemane, as doort e rish ny ostyllyn, Soie‐jee shiuish ayns shoh, choud as hems gys padjer ayns shid.

³⁷ As ghow e marish Peddyr as daa vac Zebedee, as ren e toshiaght dy ve trimshagh as trome‐chreeagh.

³⁸ Eisht doort e roo, Ta my annym feer trimshagh, dy jarroo gys y baase; fuirree‐jee ayns shoh as jean‐jee watchal mârym.

³⁹ As hie e red beg sodjey, as huit e sheese er e eddin, as ghow e padjer, as doort e, O my Ayr, my te possible, lig da’n cappan shoh goll shaghym: ny yei cha nee m’aigneys, agh dt’aigneys dy row jeant.

⁴⁰ As haink e gys ny ostyllyn, as hooar e ad nyn gadley, as doort e rish Peddyr, Kys ta shoh, nagh row shiu able watchal mârym yn oor?

⁴¹ Bee‐jee er nyn dwoai as guee‐jee, nagh duit shiu ayns miolaghey: Ta’n spyrryd eu dy jarroo arryltagh, agh ta’n eihl annoon.

⁴² Hie e roish reesht yn nah cheart, as ghow e padjer, gra, O my Ayr, mannagh vod y cappan shoh goll shaghym, fegooish mee dy iv eh, dt’aigneys dy row jeant.

⁴³ As haink e as hooar e ad nyn gadley reesht, son va ny sooyllyn oc trome.

⁴⁴ As daag e ad, as hie e roish reesht, as ghow e padjer yn tress cheart, gra ny goan keddyn.

⁴⁵ Eishtagh haink e gys e ostyllyn, as doort e roo, Caidle‐jee nish as gow‐jee nyn vea; cur‐my‐ner ta’n oor tayrn er‐gerrey, as ta’n Mac dooinney er ny vrah gys lauyn peccee.

⁴⁶ Irree‐jee, lig dooin goll: cur‐my‐ner, te eshyn er‐gerrey dooin ta dy my vrah.

⁴⁷ ¶ As choud as ve foast loart, cur‐my‐ner, haink Yuase, fer jeh’n daa ostyl yeig, as va sheshaght woar marish lesh cliwnyn as luirg, veih ny ard‐saggyrtyn as shanstyr yn pobble.

⁴⁸ Nish hug eshyn v’er vrah e cowrey daue, gra, Quoi‐erbee verryms paag da, shen e, cum‐jee e dy shicker.

⁴⁹ As chelleeragh haink e gys Yeesey, as doort e, Dy vannee dhyt, Vainshter, as phaag e e.

⁵⁰ As doort Yeesey rish, Charrey, cre’n fa t’ow er jeet? Eishtagh haink ad as hug ad nyn lauyn er Yeesey, as ghow ad e.

⁵¹ As cur‐my‐ner heen fer jeusyn va marish Yeesey magh e laue, as hayrn e e chliwe, as woail e fer‐mooinjerey yn ard‐saggyrt, as yiare e yn chleash jeh.

⁵² Eishtagh doort Yeesey rish, Cur seose dty chliwe reesht ayns e ynnyd; son nee adsyn ooilley ta goall e chliwe, cherraghtyn liorish y chliwe.

⁵³ Vel uss goall ass laue, nagh voddyms nish guee gys my Ayr, as yinnagh e chelleeragh hym er‐skyn daa legion jeig dy ainlyn?

⁵⁴ Agh kys eisht vees ny scripturyn er nyn gooilleeney, dy nee shoh myr te dy ve?

⁵⁵ Ayns yn oor keddyn doort Yeesey rish y pobble, Vel shiu er jeet magh myr noi maarlagh, lesh cliwnyn as luirg dy my ghoal? Hoie mee meriu gagh laa gynsaghey ayns y chiamble, as cha ren shiu my ghoall.

⁵⁶ Agh va ooilley shoh jeant, dy voddagh scripturyn ny phaderyn ve cooilleenit. Eishtagh ren ooilley ny ostyllyn e y hreggeil as cosney rowe.

⁵⁷ ¶ As leeid y vooinjer v’er ghoall Yeesey e ersooyl gys Caiaphas yn ard‐saggyrt, raad va ny scruderyn as y chanstyr er nyn jaglym cooidjagh.

⁵⁸ Agh deiyr Peddyr er foddey ny yei, gys thie yn ard‐saggyrt, as hie e stiagh, as hoie e marish ny shiarvaantyn dy yeaghyn cre veagh y jerrey.

⁵⁹ Nish va ny ard-saggyrtyn as y chanstyr as ooilley’n choonceil shirrey fenish foalsey noi Yeesey dy choyrt e gy baase.

⁶⁰ Agh cha dooar ad veg: ga dy daink ymmodee fenishyn foalsey, foast cha dooar ad veg. Ec y jerrey haink daa enish foalsey,

⁶¹ As doort ad, Te shoh er ghra, Ta mish able chiamble Yee y lieggal, as y hroggal eh reesht ayns three laa.

⁶² As dirree yn ard‐saggyrt seose, as doort e rish, Nagh vel oo cur ansoor? Cre ta’d shoh dy hoilshaghey dt’oi?

⁶³ Agh chum Yeesey e hengey. As dreggyr yn ard‐saggyrt as doort e rish, Ta mee cur currym ort liorish yn Jee bio, oo dy insh dooin, nee oo yn Creest Mac Yee.

⁶⁴ Doort Yeesey rish, T’ow uss er ghra eh: ny yei ta mish gra riu, Ny lurg shoh hee shiu yn Mac dooinney ny hoie er laue yesh yn phooar, as cheet ayns bodjallyn yn aer.

⁶⁵ Eishtagh raip yn ard‐saggyrt e eaddagh, gra, Te er loart goan mollaghtagh, cre’n feme sodjey t’ain er fenishyn? cur‐my‐ner nish ta shiu er chlashtyn e ghoan mollaghtagh.

⁶⁶ Cre ta shiu dy smooinaghtyn? Dansoor ad as doort ad, Te toilchin dy ve er ny choyrt gy baase.

⁶⁷ Eisht chew ad shellaghyn ayns e eddin, as woail ad e, as woail feallagh elley e lesh bassyn nyn lauyn.

⁶⁸ Gra, Jean phaderys dooin, uss y Chreest, quoi e ta dy dty woalley?

⁶⁹ ¶ Nish va Peddyr ny hoie cheu‐mooie jeh’n cheshaght ayns y hall; as haink ben‐aeg huggey, gra, V’ow uss myrgeddyn marish Yeesey dy Ghalilee.

⁷⁰ Agh dob e kiongoyrt roo ooilley, gra, Cha s’aym cre t’ow dy ghra.

⁷¹ As tra ve er gholl magh ayns y phorch, honnick ben‐aeg elley e, as doort ee roosyn v’ayns shen, Ve shoh myrgeddyn marish Yeesey dy Nazareth.

⁷² As reeshtagh dob e lesh loo, Cha nione dou yn dooinney.

⁷³ As tammylt ny lurg shen haink huggey yn vooinjer va nyn shassoo liorish, as doort ad rish Peddyr, Shicker, she fer jeu oo, son ta dty ghlare dy dty vrah.

⁷⁴ Eisht ren e toshiaght dy ghweeaghyn as dy loo, gra, Cha nione dou yn dooinney. As chelleeragh gher yn keillagh.

⁷⁵ As chooinee Peddyr er ny goan va Yeesey er ghra rish, Roish my ger y keillagh, obbee uss mish three cheartyn. As hie e magh as cheayn e dy sharroo.