Noo Mian 21 - Noo Mian 1748

CAB. XXI.

¹ As tra va’d tayrn er‐gerrey da Jerusalem; as dy row ad er jeet gys Bethphage, gys cronck ny Olivyn, hug Yeesey jees jeusyn va kinjagh geyrt er, er chaghteraght,

² As doort e roo, Immee‐jee gys y balley beg ta shiu dy akin, as chelleeragh yiow shiu assyl kainlt as lhie mâree: feysle‐jee as cur‐jee lieu ad hyms.

³ As my loarys dooinney erbee veg riu, abbyr‐jee shiuish, Ta feme ec y Chiarn orroo, as chelleeragh liggee e yn raad daue.

⁴ Va ooilley shoh jeant, dy voddagh shen ve cooilleenit va loarit liorish y phadeyr, gra,

⁵ Insh‐jee da inneen Sion, Cur‐my‐ner, ta dty Ree cheet hood, dy imlee, as ny hoie er assyl, as er lhie sharragh assyl.

⁶ As hie adsyn rumboo, as ren ad myr va Yeesey er noardaghey daue.

⁷ As hug ad lieu yn assyl as y lhie, as hug ad orroo nyn eaddagh, as hug ad eshyn ny hoie er yn eaddagh.

⁸ As ren earrooyn moarey dy leih skeylley nyn gharmadyn er y raad; yiare feallagh elley banglanyn jeh ny biljyn, as skeyl ad ad er y raad.

⁹ As deie yn pobble hie roish, as adsyn haink ny yei, gra, Hosanna gys mac Ghavid, bannit ta eshyn ta cheet ayns ennym y Chiarn, Hosanna ayns yn yrjid.

¹⁰ As tra ve er jeet gys Jerusalem, va ooilley’n ard‐valley jymmoosagh, gra, Quoi e shoh?

¹¹ Doort y pobble, Shoh Yeesey yn phadeyr, ta veih Nazareth ayns Galilee.

¹² ¶ As hie Yeesey stiagh ayns chiamble Yee, as deiyr e magh ooilley adsyn va creck as kionnaghey ayns y chiamble, as hilg e harrish ny buird ocsyn va caghlaa argid, as ny stuill ocsyn va creck calmanyn.

¹³ As doort e roo, Te scruit, Bee my hies enmyssit thie yn phadjer, agh ta shiuish er nianoo eh ny ooig dy vaarlee.

¹⁴ As haink ny doal as ny croobee huggey gys y chiamble, as ren e ad y leihys.

¹⁵ As tra honnick ny ard‐saggyrtyn as ny scruderyn ny reddyn yyndyssagh ve dy yianoo, as y chloan gemagh ayns y chiamble, as gra, Hosanna gys mac Ghavid, va’d feer jymmoosagh,

¹⁶ As doort ad rish, Vel oo clashtyn cre ta’d shoh dy ghra? Doort Yeesey roo, Ta mee, nagh lhaih shiuish rieau, magh ass beill ooikanyn as cloan er y cheeagh t’ow er gheddyn moylley firrinagh?

¹⁷ As daag e ad, as hie e magh ass yn ard‐valley gys Bethany, as ghow e aight ayns shen.

¹⁸ Nish ayns y voghrey, myr ve goll reesht gys yn ard‐valley, ve accryssagh.

¹⁹ As tra honnick e billey‐figgagh er y raad, haink e huggey, as cha dooar e nee erbee er, agh ynrycan duillagyn, as doort e rish, Nar aase mess erbee orts veih shoh magh er son dy bragh. As chelleeragh ren y billey figgagh fioghey ersooyl.

²⁰ As tra honnick yn vooinjer va sheer geyrt er shoh, ghow ad yyndyss, gra, Cre cha leah as ta’n billey figgagh er fioghey ersooyl?

²¹ Dreggyr Yeesey, as doort e roo, Dy firrinagh ta mee gra riu, My vees credjue eu, as mannagh jean shiu dooteil, nee shiu cha nee ynrycan shoh, ta jeant rish y billey‐figgagh, agh my jir shiu rish y slieau shoh, Bee er dty scughey, as er dty hilgey ayns y cheayn, bee eh er ny yianoo.

²² As dy chooilley nee, cre‐erbee nee shiu y hirrey ayns padjer, my vees eh lesh credjue, nee shiu y gheddyn eh.

²³ ¶ As tra ve er jeet stiagh ayns y chiamble, haink ny ard‐saggyrtyn as shanstyr yn pobble huggey, myr ve gynsaghey, gra, Cre’n phooar t’ayds dy yannoo ny reddyn shoh? as quoi hug yn phooar shoh dhyt?

²⁴ As dreggyr Yeesey as doort e roo, Fênyms jiuish yn red, as my inshys shiu dou eh, inshyms myrgeddyn diuish, cre’n phooar t’aym dy yanoo ny reddyn shoh.

²⁵ Bashtey Ean, cre woish ve? veih niau, ny veih deney? As loar ad nyn mast oc hene, gra, My jir mad veih niau, jir eshyn rooin, Cre’n fa eisht nagh chred shiu eh?

²⁶ Agh my jir mad, Veih deney; ta aggle ain roish y pobble; son ta dy chooilley ghooinney goall Ean son phadeyr.

²⁷ As dreggyr ad Yeesey, as doort ad, Cha vel shin able insh. As doort e roo, Cha‐moo inshyms diuish, cre’n phooar t’aym, dy yanoo ny reddyn shoh.

²⁸ ¶ Agh cre ta shiu dy smooinaghtyn? Va dooinney dy row, as daa vac echey, as haink e gys y chied vac as doort e, Vac, gow as obbree jiu ayns my gharey‐feeney.

²⁹ Dreggyr eshyn, as doort e, cha jem: agh ny lurg shen ghow e arrys as hie e.

³⁰ As haink e gys yn nah vac as loar e rish myrgeddyn. As dreggyr eshyn, as doort e, Hem, vainshter, as cha jagh e.

³¹ Quoi jeu shoh nyn neesht ren aigney e ayrey? Doort adsyn rish, Yn chied vac. Doort Yeesey roo, Dy firrinagh ta mee gra riu, dy jed ny publicanee as ny streebaghyn stiagh ayns reeriaght Yee, reuish.

³² Son haink Ean hiuish ayns raad y chairys, as cha chred shiu eh: agh chred ny publicanee as ny streebaghyn e. As tra honnick shiuish shoh, cha ghow shiu arrys ny lurg shen, dy voddagh shiu e y chredjal.

³³ ¶ Easht‐jee rish coraa dorraghey elley: Va far‐thie dy row, ren garey‐feeney y hoiaghey, as ren e cley y mish, as chley e press‐feeney ayn, as hrog e toor, as hoie e e rish fir‐hie, as hie e gys cheer foddey.

³⁴ As tra va earish ny mess tayrn er‐gerrey, hug e e ir‐mooinjerey gys ny fir‐hie, dy voddagh ad geddyn jeh’n mess echey.

³⁵ As ghow ny fir‐hie e ir‐mooinjerey, as woail ad fer, as var ad fer elley, as chlagh ad fer elley.

³⁶ Reeshtagh hug e magh shiarvaantyn elley ny sliee ny’n chied eallagh; as ghell ad roosyn er yn aght keddyn.

³⁷ Agh er jerrey ooilley hug e huc e vac, gra, Bee ad arrymagh da my vac.

³⁸ Agh tra honnick ny fir‐hie yn mac, doort ad nyn mast oc hene, Shoh’n Eirey, tar‐jee, lig dooin e [y] varroo, as bee’n eiraght echey lien hene.

³⁹ As ghow ad e, as hilg ad e magh ass y gharey‐feeney, as var ad e.

⁴⁰ Tra hig er‐y‐fa shen chiarn y gharey‐feeney, cre nee e rish ny fir‐hie shen?

⁴¹ Doort adsyn rish, Stroie‐ee e fegooish myghin ny drogh gheney shen, as soiee e yn garey‐feeney rish fir‐hie elley, livrey‐ys ny messyn da, ayns nyn imbaghyn.

⁴² Doort Yeesey roo, Nagh lhaih shiuish rieau ayns goo Yee, Yn chlagh ren adsyn va troggal y thie y vee‐lowal, ta’n chlagh cheddyn er jeet dy ve yn ard-chlagh chorneilagh: shoh janoo yn Chiarn, as te yyndyssagh ayns ny sooyllyn ainyn?

⁴³ Shen‐y‐fa ta mish gra riu, Dy bee reeriaght Yee er ny ghoall veuish, as er ny choyrt da ashoon, ymmyrkys magh yn mess echey.

⁴⁴ As quoi‐erbee huittys er y chlagh shen, bee e er ny vroo: agh quoi‐erbee huittys y chlagh shen er, nee ee cha meen as joan jeh.

⁴⁵ As tra va ny ard‐saggyrtyn as ny Phariseyn erreish ny coraaghyn dorraghey echey y chlashtyn, dennee ad dy nee jeusyn ve loart.

⁴⁶ Agh tra va’d aignagh dy ghoall e, ghow ad aggle roish y pobble, er‐yn‐oyr dy row ad jeaghyn er dy ve ny adeyr.