Noo Mian 2 - Noo Mian 1748

CAB. II.

¹ Nish tra va Yeesey er ny ve Ruggit ayns Bethlehem, dy Yudea, ayns laghyn Ree Herod, cur‐my‐ner haink deney creeney veih’n Shar gys Jerusalem,

² Gra, Cre vel Ree ny Hewnyn t’er jeet er y teihl? Son honnick shin y Rollage echey ayns y Shar, as ta shin er jeet dy chur ooashley da.

³ Tra cheayl Ree Herod shoh, ve seaghnit as ooilley Jerusalem marish.

⁴ As tra ve er jaglym cooidjagh, ooilley ny ard‐saggyrtyn as scruderyn y pobble, denee e jeu, cre’n raad va Creest dy heet er y teihl.

⁵ As doort adsyn rish, Ayns Bethlehem dy Yudea: Son shoh myr te scruit liorish y Phadeyr;

⁶ As uss Bethlehem ayns talloo Yuda, cha nee oo sloo ta mastey Prinsyn Yudah: Son assyds hig Kianoort nee reill my phobble Israel.

⁷ Eisht hug Herod fys gy follit er ny deney creeney, as, denee e jeu dy imneagh, cre’n tra va’n Rollage er ny akin.

⁸ As hug e ad gys Bethlehem, gra, immee‐jee, as shir‐jee magh dy kiaralagh son y liannoo aeg, as tra vees shiu er gheddyn e, tar‐jee lesh fys hyms, dy voddyms myrgeddyn cheet as ooashley chur da.

⁹ Tra va’n Ree erreish loart, jimmee ad rumboo, as cur‐my‐ner, hie yn Rollage honnick ad ayns y Shar, roue, derrey haink ee as hass ee harrish yn ynnyd, raad va’n liannoo.

¹⁰ Tra honnick ad y Rollage va’d lieent lesh boggey er‐skyn towse.

¹¹ ¶ As tra va’d er jeet stiagh ayns y thie, honnick ad y liannoo aeg marish Moirrey e Voir, as huitt ad sheese as hug ad ooashley da; as tra va’d er vosley ny tashtaghyn oc, heb ad da giootyn, aer, as frankincense as myrrh.

¹² As fakin dy row Jee er chur roue ayns ashlish, nagh row ad dy hyndaa gys Herod, jimmee ad gys nyn jeer hene raad elley.

¹³ As tra va’d er gholl roue, haink Ainle y Chiarn gys Joseph ayns ashlish, gra, irree as gow yn Liannoo aeg as e voir, as gow er‐chea gys Egypt, as furree ayns shen, derrey verryms liam fys hood: Son shirree Herod y liannoo dy stroie e.

¹⁴ Tra ve er nirree, ghow e yn liannoo as e voir ayns yn uy, as hie e roish gys Egypt.

¹⁵ As ve ayns shen, derrey baase Herod: dy voddagh shen ve cooilleenit va’n Chiarn er loart liorish y Phadeyr, gra, Magh as Egypt deie mee er my Vac.

¹⁶ ¶ Tra honnick Herod eisht, dy row e mollit liorish ny deney creeney, ve feer jymmoosagh, as hug e magh sarey, as var e ooilley yn chloan v’ayns Bethlehem, as ayns ooilley ny ardjyn shen, veih daa vleïn dy eash as fo, cordail rish yn earish ve dy imneagh er vriaght jeh ny deney creeney.

¹⁷ Shen y tra va cooilleenit ny va loarit liorish Jeremy yn phadeyr gra,

¹⁸ Ayns Rama va coraa er y chlashtyn, ullaghey as keaney as dobberan moar, Rachel keaney son e cloan, as gobbal dy ve er ny gerjaghey, er‐yn‐oyr nagh row ad er‐mayrn.

¹⁹ ¶ Agh tra va Herod marroo, cur‐my‐ner haink Ainle y Chiarn ayns ashlish gys Joseph ayns Egypt,

²⁰ Gra, irree as gow yn liannoo as e voir, as gow gys talloo Israel, son tar adsyn marroo va shirrey bioys y liannoo.

²¹ As dirree e, as ghow e yn liannoo as e Voir, as haink e gys talloo Israel.

²² Agh tra cheayl e, dy nee Archelaus va reil ayns Judea ayns ynnyd e ayr Herod, va aggle er dy gholl ayns shen, agh hyndaa e, myr va Jee er chur roish ayns ashlish, gys Ardjyn Galilee.

²³ As haink e as ren e vaghey ayns ard‐valley enmyssit Nazareth, dy voddagh ny va loarit liorish ny Phaderyn ve cooilleenit, Bee e enmyssit ny Nazarene.