Noo Mian 16 - Noo Mian 1748

CAB. XVI.

¹ As haink ny Phariseyn as ny Sadduceyn, dy violaghey e, as hir ad er, e dy yeaghyn cowrey ennagh daue veih niau.

² Dreggyr eshyn as doort e roo, Tra ta’n fastyr ayn, ta shiuish gra, Bee emshir aalin ayn: son dy vel jirgid ’sy’n aer.

³ As ayns y voghrey, Bee emshir vroghe ayn jiu; son ta’n aer jiarg as bodjallagh. Chrauee‐foalsey, ta toiggal eu, kys dy chur tastey da neeal yn aer; as nagh vod shiu tastey choyrt da cowraghyn ny earishyn?

⁴ She sheeloghe dy ghrogh yanoo as dy vrishey poosey ta shirrey cowrey, as cha bee cowrey er ny chur daue, agh cowrey’n phadeyr Jonas. As daag e ad, as jimmee e roish.

⁵ As tra var adsyn va kinjagh geyrt er, er jeet gys y cheu elley, va’d er yarood arran y chur lieu.

⁶ ¶ Eishtagh doort Yeesey roo, Cur‐jee twoai as gow‐jee tastey jeh soorit ny Phariseyn as ny Sadduceyn.

⁷ As loar ad eddyr ad hene, gra, Ta shoh er‐yn‐oyr nagh dug shin lien arran.

⁸ Tra hoig Yeesey shoh, doort e roo, Gheney faase‐chredjuagh, cre’n fa ta shiu imneagh ayndiu hene er‐yn‐oyr nagh dug shiu lieu arran?

⁹ Nagh vel shiu foast toiggal, as nagh vel cooinaghtyn eu er ny queg bwilleenyn ren magh ny queg thousanyn, as cre chooilleen basket d’ooillagh v’eu?

¹⁰ Ny er ny shiaght bwilleenyn ren magh ny kiare thousanyn, as cre woad basket hrog shiu?

¹¹ Kys te, nagh vel shiu goall eu hene, nagh nee my‐chione arran loar mee riu, agh shiu dy chur twoai jeh soorit ny Phariseyn as ny Sadduceyn.

¹² Eishtagh hoig ad, nagh doardee e daue ad dy chur twoai jeh soorit yn arran, agh jeh ny va ny Phariseyn as ny Sadduceyn dy ynsaghey.

¹³ ¶ Tra va Yeesey er jeet gys ardjyn Cesarea Philippi, denee e jeusyn va sheer geyrt er gra, Cre ta deney dy ghra my my‐chiones, mac y dooinney, quoi mee?

¹⁴ Doort adsyn, Ta part gra, dy nee Ean Bashtey oo, as part Elias, as ta feallagh elley gra dy nee Jeremias oo, ny annane jeh ny phaderyn.

¹⁵ Doort eshyn roo, Agh quoi ta shiuish dy ghra mee?

¹⁶ Dreggyr Simon Peddyr as doort e, Oo yn Creest, mac y Jee bio.

¹⁷ Dansoor Yeesey as doort e rish, Bannit t’ow uss, Simon Bar‐jona: son cha nee feill as fuill t’er hoilshaghey shoh dhyts, agh my Ayr, ta ayns niau.

¹⁸ As ta mee myrgeddyn gra rhyt, Dy nee uss Peddyr, as dy nee er y chreg shoh hroggyms m’agglish; as cha vow giattyn nivrin yn varriaght urree.

¹⁹ As verryms dhyts ogheryn reeriaght niau, as cre‐erbee chianglys oo er y talloo, bee eh kainlt ayns niau; as cre‐erbee eyslys oo er y talloo, bee eh feyslit ayns niau.

²⁰ Eishtagh hug e currym dauesyn va kinjagh geyrt er, gyn ad dy insh da dooinney erbee dy nee eshyn va Yeesey yn Creest.

²¹ ¶ Veih’n tra shen magh, ren Yeesey toshiaght dy hoilshaghey dauesyn va kinjagh geyrt er, kys dy begin da goll seose gys Jerusalem, as ymmodee dy reddyn y hurranse veih’n chanstyr, as ny ard‐saggyrtyn, as ny scruderyn, as dy beagh e er ny choyrt gy baase, as dy nirragh e reesht kione y tress laa.

²² Eishtagh ghow Peddyr e, as ren e toshiaght dy chur oghsan da, gra, Foddey dy row eh woid, Hiarn, leid shoh dy haghert dhyt.

²³ Agh hyndaa eshyn, as doort e rish Peddyr, Ass my eanish, Noid anmey, t’ow cur rybbey ayns my raad: son cha vel ennaghtyn ayd jeh ny reddyn ta bennalt rish [Jee, agh jeh ny reddyn ta bennalt rish] deney.

²⁴ ¶ Eishtagh doort Yeesey roosyn va sheer marish, My ta dooinney erbee booiaght geyrt orryms, lig e e hene y obbal as e chrosh y hroggal, as geyrt orrym.

²⁵ Son quoi‐erbee ballish e vioys y hauail, caillee e eh: as quoi‐erbee chaillys e vioys er my ghraih’s, sauee e eh.

²⁶ Son cre’n vondeish t’ec dooinney, my chosnys e yn seihll ooilley as e annym hene y choall? ny cre nee dooinney y choyrt ayns coonrey son e annym?

²⁷ Son hig mac y dooinney ayns gloyr e Ayrey, as e ainlyn casherick marish, as ec y tra shen cooilleenee e da dy chooilley ghooinney cordail rish e obbraghyn.

²⁸ Dy firrinagh ta mee gra riu, Dy vel part nyn shassoo ayns shoh, nagh jean blashtyn er y baase, derrey hee ad mac y dooinney cheet ayns e reeriaght.