Noo Mian 12 - Noo Mian 1748

CAB. XII.

¹ Ec y tra shen, hie Yeesey trooid arroo er y doonaght, as var adsyn va sheer geyrt er accryssagh, as ren ad toshiaght dy phluckey jeeasyn jeh’n arroo, as dy ee.

² Agh tra honnick ny Phariseyn ad, doort ad rish, Cur‐my‐ner ta’n vooinjer ta kinjagh geyrt ort, janoo red nagh vel lowit dy ve jeant er y doonaght.

³ Agh doort eshyn roo, Nagh vel shiuish er lhaih, cre ren David, tra ve hene as e heshaght accryssagh,

⁴ Kys hie e stiagh ayns thie Yee, as die e yn arran casherick, nagh row lowit dashyn ny da’n vooinjer va marish dy ee, agh da ny saggyrtyn ny lomarcan.

⁵ Ny, nagh vel shiu er lhaih ayns y leigh, kys er laghyn y doonaght ta ny saggyrtyn ayns y chiamble brishey’n doonaght, as foast cha vel peccah er ny choyrt nyn lieh.

⁶ Agh ta mish gra riu, dy vel ayns shoh fer syrjey ny’n chiamble.

⁷ Agh dy beagh fys er ve eavish, cre ta dy ve toiggit liorish y raa shoh, Ta mee ny sbooie er myghin ny oural, cha beagh shiu er gheyrey yn vooinjer niau‐chyndagh.

⁸ Son ta mac y dooinney ny Hiarn, er y doonaght hene.

⁹ As tra ve er gholl veih shen, hie e stiagh ayns y cheell oc.

¹⁰ ¶ As cur‐my‐ner va dooinney ayns shen va’n laue echey er shyrgaghey, as, dy voddagh oyr y ve oc dy loart noi Yeesey, denee ad jeh, gra, Vel eh lowal dy leihys er laghyn y doonaght?

¹¹ As doort e roo, Quoi’n dooinney nyn mast eavish, vees ynn cheyrrey echey, as my huittys ee ayns jeeg er y doonaght, nagh daar e greme urree, as nagh drog e ass ee?

¹² Nagh vel dooinney eisht foddey share ny keyrrey? Shen‐y‐fa te lowal dy yanoo mie er y doonaght.

¹³ Eishtagh doort e rish y dooinney, Sheen magh dty laue, as heen e magh ee, as va’n laue echey er ny leihys myr y laue elley.

¹⁴ ¶ Eishtagh hie ny Phariseyn magh, as hug ad nyn goyrle dy cheilley noi, my‐chione yn aght oddagh ad e y stroie.

¹⁵ Agh tra va fys ec Yeesey er, jimmee e veih shen: as deiyr earrooyn moarey dy leih er, as ren e ad ooilley y leihys.

¹⁶ As hug e currym daue, gyn ad dy vrah e.

¹⁷ Dy voddagh ve cooilleenit ny va loarit liorish Esaias y phadeyr, gra,

¹⁸ Cur‐my‐ner, my harvaant ta mee er ny reih, my er‐ghraihagh jeh ta mee dy moar soiaghey ayns m’annym; nee yn spyrryd aym vaghey ayn, as soilshee e briwnys da ny ashoonyn.

¹⁹ Cha jean e streeu, ny keaney, cha‐moo chlinnys annane erbee e choraa ayns ny straadjyn.

²⁰ Cuirtlagh vroojit cha jean e y vrishey, as lieen vees jaagh jeh, cha jean e y vooghey, derrey ver e magh briwnys lesh barriaght.

²¹ As ayns yn ennym echey, nee ny Ashoonyn quaagh treshteil.

²² ¶ Eishtagh hoie ad kiongoyrt rish dooinney va drogh spyrryd ayn, as ve doall as balloo: as laanee e e, ayns wheesh as dy ren eshyn va doall as balloo chammah loart as fakin.

²³ As ghow ooilley’n pobble yyndyss, as doort ad, Nagh nee shoh mac Ghavid?

²⁴ Agh tra cheayl ny Phariseyn jeh, doort ad, Cha vel e shoh tilgey magh drogh spyrrydyn, agh liorish Beelzebub, prince ny drogh spyrrydyn.

²⁵ As va fys ec Yeesey er ny smooinaghtyn oc, as doort e roo, Ta dy chooilley reeriaght ta girree magh ny oi hene er ny choyrt mow; as cha vod ard‐valley ny thie erbee ta girree magh ny oi hene, shassoo.

²⁶ As my ta’n Jouyl tilgey magh Jouyl, te girree magh ny oi hene, kys eisht oddys y reeriaght echey shassoo?

²⁷ As my ta mish liorish Beelzebub tilgey magh drogh spyrrydyn, quoi liorish ta nyn gloan hene dyn dilgey ad magh? adsyn er‐y‐fa shen vees ny briwnyn eu.

²⁸ Agh my ta mish geyrt magh drogh spyrrydyn liorish spyrryd Yee, eisht ta reeriaght Yee er jeet hiu.

²⁹ Er nonney kys oddys peccagh goll stiagh ayns thie dooinney lajer, as e chooid y ghoal liorish roosteraght, mannagh gianle e hoshiaght yn dooinney lajer? as eisht nee e e hie y roostey.

³⁰ Eshyn nagh vel liam, te m’oi; as eshyn nagh vel chymsaghey mârym, te skeylley.

³¹ ¶ Shen‐y‐fa ta mee gra riu, Bee dy chooilley pheccah as raa mollaghtagh er ny leih da deney; agh goan mollaghtagh noi’n spyrryd noo cha bee er nyn leih da deney.

³² As quoi‐erbee loarys fockle noi yn mac dooinney, bee eh er ny leih da: agh quoi-erbee loarys noi yn spyrryd noo, cha bee eh er ny leih da, edyr ayns y teihl shoh, ny ayns y teihl ta ry heet.

³³ Edyr jean‐jee yn billey mie, as e vess mie; er nonney jean‐jee yn billey olk, as e vess olk: son liorish e vess, ta enney er ny choyrt er y villey.

³⁴ O heeloghe dy ard‐nieughyn, kys oddys shiuish, ta olk, reddyn mie y loart? son magh veih stoyr y chree, ta’n beeal loart.

³⁵ Ta dooinney mie, ass stoyr mie yn chree echey, cur magh reddyn mie; as drogh ghooinney ass y drogh stoyr cur magh drogh reddyn.

³⁶ Agh ta mee gra riu, dy chooilley ockle niau‐chooie nee deney y loart, dy der ad coontey er y hon, ec laa ny briwnys.

³⁷ Son liorish dty ghoan vees oo er dty heyrey, as liorish dty ghoan vees oo er dty gheyrey.

³⁸ ¶ Eisht dreggyr shiartance jeh ny scruderyn as jeh ny Phariseyn, gra, Vainshter, baillin cowrey y akin woid.

³⁹ Agh dreggyr eshyn, as doort e roo, she sheeloghe olk as maardyragh ta shirrey cowrey, as cha bee cowrey erbee er ny chur daue, agh cowrey yn phadeyr Jonas.

⁴⁰ Son ’naght myr va Jonas tree laa as tree uiyghyn ayns bolg y whale: myr shen bee mac y dooinney tree laa as tree uiyghyn ayns cree’n tallooin.

⁴¹ Nee deney Nineveh girree seose ayns briwnys, as y cheeloghe shoh y gheyrey, er‐yn‐oyr dy ghow ad arrys ec preacheil Jonas, as cur‐my‐ner, ta fer smoo ny Jonas ayns shoh.

⁴² Nee ben‐rein y jass girree seose ayns briwnys noi yn cheeloghe shoh, as ad y gheyrey: son haink ish veih ny ardjyn sodjey er y talloo, dy eashtagh rish creenaght Solomon, as cur‐my‐ner ta fer smoo ny Solomon ayns shoh.

⁴³ Tra ta’n spyrryd niau‐ghlen er gholl ass dooinney, te shooyl trooid ynnydyn chyrmey, shirrey fea, as cha vel e dy gheddyn eh.

⁴⁴ Eishtagh te gra, Chyndaa‐ym gys my hie, ass haink mee, as tra te cheet, te dy gheddyn eh follym, sceabit as soit magh dy stoamey.

⁴⁵ Eisht te goll, as cur lesh marish shiaght spyrrydyn elley ta ny smessey ny e hene, as ta’d goll stiagh as vaghey ayns shen: as ta’n jerrey ny smessey da’n dooinney shen ny’n toshiaght, As shoh myr nee eh taghert da’n drogh heeloghe shoh.

⁴⁶ ¶ Choud as ve foast loart rish y pobble, cur‐my‐ner va e voir as e vraaraghyn nyn shassoo mooie, shirrey loart rish.

⁴⁷ Eishtagh doort fer rish, Cur‐my‐ner ta dty voir as dty vraaraghyn nyn shassoo mooie, as ta’d booiaght loart rhyt.

⁴⁸ Agh dreggyr eshyn yn fer dinsh shoh da, gra, Quoi my voir? as quoi my vraaraghyn?

⁴⁹ As heen e magh e laue hucsyn va sheer geyrt er, as doort e, Cur‐my‐ner my voir as my vraaraghyn.

⁵⁰ Son quoi‐erbee nee aigney my Ayr t’ayns niau, e shen my vraar as my huyr as my voir.