Noo Mian 10 - Noo Mian 1748

CAB. X.

¹ As tra ve er nemagh er e ghaa ostyl jeig huggey, hug e daue pooar harrish spyrrydyn niau‐ghlen, dyn eyrt magh ad, as dy [leihys dy chooilley hingys, as dy] chooilley ghoghan.

² As shoh va enmyn yn daa ostyl yeig; yn chied er, Simon ta enmyssit Peddyr, as Andreays e vraar. Jamys mac Zebedee, as Ean y braar echyssyn,

³ Philip as Bartholomew, Thomas, as Mian yn publican, Jamys mac Alpheus, as Lebbeus va slennooit Thaddeus.

⁴ Simon yn Canaanite, as Yuase Iscariot, ren myrgeddyn e y vrah.

⁵ Yn ghaa yeig shoh hug Yeesey magh, as doardee e daue, gra, Ny gow‐jee ayns raad ny Ashoonyn quaagh, ny gys ard‐valjyn ny Samaritanee.

⁶ Agh gow‐jee hoshiaght gys kirree cailjey thie Israel.

⁷ As myr vees shiu goll, jean‐jee preacheil, gra, Ta reeriaght Niau er‐gerrey.

⁸ Slaanee‐jee sleih chingey, glen‐jee ny louranee, jean‐jee ny merriu y vioghey, tilg-jee magh drogh spyrrydyn: nastee ta shiu er gheddyn, as dy nastee cur-jee veu.

⁹ Ny cur‐jee lieu aer, ny argid, ny prash ayns ny sporranyn eu:

¹⁰ Ny stoyr dy vee son y raad, ny daa chooat, ny braagyn, ny luirg (son ta’n obbree feeu e veaghey.)

¹¹ As ard‐valley ny balley erbee dy jed shiu stiagh ayn, fenee‐jee quoi ayn ta feeu, as marishyn furree‐jee, derrey hed shiu reue.

¹² As tra vees shiu goll stiagh ayns thie, bannee‐jee daue.

¹³ As my vees y thie feeu, lig da’n shee eu cheet er: agh mannagh bee eh feeu, lig da’n shee eu chyndaa hiu hene reesht.

¹⁴ As quoi‐erbee nagh jean nyn mea y oltaghey, as nagh der geill da ny goan eu, tra aagys shiu yn thie ny’n ard‐valley shen, crie‐jee yn joan jeh ny cassyn eu.

¹⁵ Dy firrinagh ta mee gra riu, dy vow cheer Sodom as Gomorrah ny smoo dy foar, ec laa ny briwnys, ny yiow yn ard‐valley shen.

¹⁶ ¶ Cur‐my‐ner ta mish dyn goyrt shiu magh, myr kirree mastey moddee‐oaldey. Bee-jee er‐y‐fa shen creeney myr ard‐nieughyn, as gyn loght myr calmanyn.

¹⁷ Agh cur‐jee twoai jeh deney, son livrey‐ee ad shiu seose gys ny coonceilyn as custee ad shiu ayns ny kialteenyn oc.

¹⁸ As bee shiu er nyn goyrt fenish kianoortyn as reeaghyn er y choontey ayms, dy vod oyr y ve eu, fenish y ymmyrkey dauesyn as da ny Ashoonyn quaagh.

¹⁹ Agh tra livrey‐ys ad shiu seose, ny bee‐jee imneagh kys ny cre nee shiu y loart, son bee eh er ny choyrt diu ayns yn oor keddyn, cre nee shiu y loart.

²⁰ Son cha nee shiuish ta loart, agh spyrryd yn Ayr eu ta loart ayndiu.

²¹ As livrey‐ee yn derrey vraar yn braar elley gys baase, as yn ayr y liannoo; as nee cloan girree seose noi nyn ayr as nyn moir, as deyree ad ad gys baase.

²² As ver dy chooilley ghooinney feoh diu, kyndagh rish yn ennym ayms: agh eshyn nee fannaghtyn gys y jerrey, bee e er ny hauail.

²³ Agh tra vees ad janoo tranlaase erriu ’sy derrey ard‐valley, roie-jee shiuish er‐chea gys ard‐valley elley: son dy firrinagh ta mee gra riu, dy bee mac y dooinney er jeet, roish my bee shiu er gholl harrish ard‐valjyn Israel.

²⁴ Cha vel yn scoyllar er‐skyn e vainshter, ny’n chiarvaant er‐skyn e hiarn.

²⁵ Slioyr da’n scoyllar dy ve myr e vainshter, as da’n chiarvaant myr e hiarn: my ta’d er chaeu Beelzebub er mainshter y thie, cre woad smoo nee ad e vooinjer y oltooan?

²⁶ Ny gow‐jee er‐y‐fa shen aggle rowe: son cha vel nee erbee follit, nagh jig gys soilshey, ny nee erbee kellit nagh jig magh.

²⁷ Shen ta mish dy insh diu ayns y dorraghys, loar‐jee shiuish jeh ayns y toilshey, as ny ta shiu er chlashtyn ayns y chleash eu voyms, jean-jee y phreacheil er mullagh ny thiyn.

²⁸ As ny bee‐jee agglagh rowesyn varrys y corp, agh nagh jiarg er yn annym y varroo: agh bee‐jee ayns aggle smoo roishyn, oddys corp as annym neesht y stroie ayns Nivrin.

²⁹ Nagh vel daa sparrow er nyn greck son farling? as cha duitt annane oc marroo er y talloo fegooish oardaghey’n Ayr eu.

³⁰ Agh ta eer renaigyn nyn ging ooilley er nyn earroo.

³¹ Ny bee‐jee shiuish er‐y‐fa shen ayns aggle, ta ny smoo dy ve soit jiu, ny jeh ymmodee sperriu.

³² Quoi‐erbee er‐y‐fa shen ghoys rhyms kiongoyrt rish deney, goyms rishyn myrgeddyn kiongoyrt rish my Ayr t’ayns niau.

³³ Agh quoi‐erbee obbys mish kiongoyrt rish deney, eshyn neems myrgeddyn y obbal kiongoyrt rish my Ayr t’ayns niau.

³⁴ Ny smooinee‐jee dy daink mish dy chur liam shee gys y talloo, cha daink mee dy chur liam shee, agh cliwe.

³⁵ Son ta mish er jeet dy scarrey dooinney veih e ayr, as yn inneen veih e moir, as y ven chlewn veih e moir ’sy leigh.

³⁶ As noidjyn dooinney vees adsyn jeh’n lught‐thie echey hene.

³⁷ Eshyn ta ny sgraihee er ayr ny moir ny orryms, cha vel e feeu jeem: as eshyn ta ny sgraihee er mac ny inneen ny orryms, cha vel e feeu jeem.

³⁸ As eshyn nagh jean e chrosh y ymmyrkey as geyrt orryms, cha vel e feeu jeem.

³⁹ Eshyn nee e vioys y hauail, caillee e eh, agh eshyn chaillys e vioys er my ghraih’s, nee e eh y hauail.

⁴⁰ Eshyn ta soiaghey jiuish, te soiaghey jeems, as eshyn ta soiaghey jeems, te soiaghey jehsyn t’er my choyrt.

⁴¹ Eshyn ta cur oltaghey‐bea da phadeyr ayns ennym phadeyr, yiow e leagh phadeyr, as eshyn ta cur oltaghey‐bea da dooinney cairagh ayns ennym dooinney cairagh, yiow e leagh dooinney cairagh.

⁴² As quoi‐erbee ver cappan dy ushtey feayr da annane jeh’n vooinjer veggey shoh dy iv, ayns ennym annane jeusyn ta sheer geyrt orryms, dy firrinagh ta mee gra riu, nagh jean e er aght erbee e leagh y choall.