तीतुस 3 - नाहाली

मसीही चाल-चलन

¹ माणहाह सत्ता एने अधिकारी रिजी, एने तान आज्ञा मानणु, एने प्रत्येक हाजो कामान केरता तियार रीवू,

² कुणीहुच बदनाम मा केरूह, लेडाणार नाहं ओहलो; पुण सौम्य स्वभावाचा ओहलो, एने आखा माणहान हाती मोडली नम्रतेने रिजी.

³ कारण आमु पुण पेल्ला निर्बुधी, एने अवज्ञा केरणारा, एने जुदाजुदा प्रकारान वासनांचे एने भोग विलास दास्य माय एता, एने दृष्टपणा एने हेवो याम आविश्य ओडकाडणेन एता, द्वेष पात्र एता, एने एक दिहीरान दोष केरतेन एता.

⁴ पुण जेवी आमरो उद्धारकर्ता बोगवान भलाई, एने माणहापूर तान प्रेम प्रगट एनो,

⁵ तान आमरा उद्धार किरेल; एने हे खेरोपणा कामान कारण से नाहं, जे आमु जीवेच किरेल, पुण आपणो विचारान दया नोवालो जेल्मान तारिले एने पवित्र आत्मान आमूह नोवालो बोणाविल द्वारे एय गीयो.

⁶ जाह तो आमरा उद्धारकर्ता यीशु मसीह द्वारे आमु पोर अधिकार से भरपूर टाकील.

⁷ ताहेऱ्या आमु तान कृपान धर्मी होमजील, पिडीन पिडी अनंत जीवनान आशा नुसार वारिस बोणहु.

⁸ हि वात खेरो हि, एने मी होमजथी कि तू आवो गोष्टीन विषयी खात्री केरीन केह कि ज्यानकेरता कि तान केरता बोगवानापुर विश्वास मेलील हि, ते हाजो काम माय केरणेन केरता लक्ष दयाहि. वात हाजी एने माणहाह लागजाईल हि.

⁹ पुण मूर्ख पणान बाद, एने वंशावळ्या, एने विरोध एने लेडाणे जे व्यवस्था च्या विषय माय ओहलो, होमालीन रीवू; कारण ते नीरुपयोगी एने वाया हि.

¹⁰ कोठलाज तडफिनाराहा एक दुय वेळा होमाजाडणे मुमजवून तान आलेग रिजी,

¹¹ हे सोमजाडिते कि ओहलो माणुह भटकून गीयो हि, एने आपणो जीवाह दोषी केरीन पाप केरतेन रेणे.

व्यक्तिगत वातू एने अभिवादन

¹² जेवी मी तारो आह्नी अर्तमाह काहा तुखिकुसला न्या मोकलीन तर मारो आह्नी निकुपुलिस आवणेन प्रयत्न केरणेन, कारण मी तोज हियालू केरणेन निश्चय किरेल हि.

¹³ जेनास शास्त्री एने आपील अप्पुलोस ज्याह यत्न केरीन ओगांण पोचाडीन दया, एने देखू कि ताह कायताहा वस्तून थोडो नाहं वाहिगोलू जुविकाय.

¹⁴ आमरा माणहे पुण गोरजेहे पुरो केरणेन केरता हाजो कामामाया केरणेन केरता शिक्जीव म्हणजे निष्फळ नाहं रिजी.

¹⁵ मारो आखा हाती तुम्हू सलाम जो विश्वासान कारण से आमरेहे-यो प्रेम मेकतात, ताह सलाम. तुमु आखा कृपा एती रेय.