रोमीयो 9 - नाहाली

बोगवान एने तान निवाडील माणहा

¹ मी मसीहा माय खेरो किथे, मी ठोगलु नाह बोलीह हि मारा सदा विवेक बुद्धीने पुण पवित्र आत्मा माय गवाही आपतेन हि,

² कि माहु मोठू शोक हि, एने मारा मोन सदा दु; खत रेणेन,

³ काहाकाय कि मी न्या ताहवोर इच्छितो कि आपणो विचारोहो जे शरीरान बायहो मारा कुटुबमेरयू हि, जीवेच; च मसीहा फायरीन शार्पित एय गीया.

⁴ ता इस्राएली हेते, दंत्तकपणान हक, महिमा, वाचा, व्यवस्था एने उपासना, एने वचन ताणुच हेते

⁵ पूर्वजही तापोर हि, एने मसीहपण शरीरान बोहे ज्याचमाय होयआखाज परम बोगवान पिडीने पिडी धन्य होवो. आमेन.

⁶ पुण हे नाहं कि बोगवानान वचन टाकीन जाहो, जानकेरता कि जे इस्राएल चे वंश हेते ता आखा इस्राएल वंश नाहं;

⁷ एने नाहं अब्राहामान वंश ला कारणाने आखा तान सोरा ठेरना, पुण “ईसाहाक याफायरीन तारो वंश केवाडने.”

⁸ म्हणजे शरीरान सोरा बोगवानान सोरो नाहं, पुण प्रतिज्ञान सोरा आशेमाय मोजने जातेह.

⁹ काहाकाय कि प्रतिज्ञा वचन ज्याच हि: “मी आवो वेलान अनुसार आवी एने साराह सोरो एय.”

¹⁰ एने केवळ ज्याच नाहं, तर रीबिका पुण एकहो म्हणजे आमारो आबोक ईसाहाक याफायरीन पेटावाली एती,

¹¹ एने ऐवी ताहवोर नाहं सोरो जन्मले एता, एने नाहं तान हाजो वाईट किरील एता; जानकेरता कि बोगवानान योजना जो ताह निवाडीन लेणेन अनुसार हि, कर्मकेरणार कारणाने नाहं पुण हदणाराआ कारणाने हि, बोणावीन रेंय:

¹² केरीन तीह केणेम आवील का, “मोठलो आतल्यान सेवा केरी.”

¹³ जोहलो लिखील हि, “मी याकूबावर प्रेम किरील, पुण एसावाला अप्रिय मानणनये.”

¹⁴ ज्यानकेरता आमु काय केहू? काय बोगवाना उखेर अन्याय हि? एखातवार नाहं.

¹⁵ कारण कि तो मुसाला किथे, “मी ज्या कुणापोर दया केरूह इच्छितो तापोर दया करने, एने ज्या कुणापोर कृपा केरूह इच्छितो तापोर कृपा केरूह.”

¹⁶ सेवट हे नाहं कि इच्छिकरणार कि नाहं, नाहणे का पुण दया करणार बोगवानान वात हि.

¹⁷ कारण कि पवित्र शास्त्रामाय फारोला कियील गीया, “मी तुवाह जानकेरता उबरीयेल किरील हि कि तुमरे माय आपणा सामर्थ्य देखाडीन, एने मारो नावान पोरचार आखा पृथ्वीपोर होवो.”

¹⁸ ज्यानकेरता हे तापोर इच्छितो, तापोर दया करने, एने ज्याह इच्छितो ताह कठोर केरीन आपथु,

बोगवान राग एने तान दया

¹⁹ सेवट तू माहु केह, “तो पोशा का दोष लागाडणे? कूण तान इच्छाकेरिन सामना केरूह?”

²⁰ हेमाहू, तू कूण हि जो बोगवानान सामना करने? काय तीयारकोरील वस्तु केहू शकेल कि घोड्विनारू, “माहु इही का बोणाविल हि?”

²¹ काय तुमूह मातडयामाय अधिकार नाहं कि एकुच वात एक खाम्बला आदराहाटी एने दिहरान अनादरासाठी बोणाविल?

²² तर तामाय काल्ली आश्चर्याची वात हि कि, बोगवानान आपणो राग देखडणे केरता एने आपणा सामर्थ्य प्रगट करीन ईच्छा क्रोधाने आतल्या सोरा जे विनाशान केरता तियार किरील गीया एता, मोठू धीराने खेरो,

²³ एने जो दया न, केरता तान महिमा केरता पेलूच तियार किरील, आपणो महिमाच्या हाजा केरीन ईच्छा प्रगट केरील.

²⁴ म्हणजे आमरे पोररीन तान केरता तान केवळ यहूदीयाम नापून दिहरी जातीमाय पुण हादाड्या गीया.

²⁵ जाणेन ता होशे च्या पुस्तकामाय पुण किथे, जी मारी प्रजा नाहां एती ताह मी आपणी प्रजा केरणूतेवीह जी प्रिय नाहां एती तीह प्रिय केह.

²⁶ एने इही एय कि ज्या जगामाय ताह हे कियील एता कि तुमूह मारी प्रजा नाहं हि, तान जागीपोर ते जीवतालो बोगवानान सोरा कियील जाहो.

²⁷ एने यशाया इस्राएल विषयी आयडीन केणे, जर इस्राएल ने सोराची संख्या समुद्राम वालू ओलिक रेंय तेभी पुण तामायरीन जारीकुच वोचती.

²⁸ केरू कि प्रभु आपणा वचन पृथ्वीपोर पुरो केरीन धार्मिक तेणे ताह तात्काळ सिद्ध केरूह.

²⁹ जाणे यशायाने पेल्ला पुण कियील एता, काही सेनाधीशाचा प्रभु आमरे केरता काही वंश नाहं सुळील हि, त्राम्ही सदोमाच्या सारकोस होऊन जाईल असतो एने गमोराहारको बनलो असतो.

इस्राएल ने अविश्वास

³⁰ पासाण आमु काय केहू? ज्याच कि दिहरी जाती जे धार्मिकतान होदणे केरतीन नाह एता, धार्मिकता प्राप्त केरील अर्थात ता धार्मिकतेला जो विश्वासामाय हि,

³¹ पुण इस्राएलान, जो धार्मिकतान व्यवस्थाह होदतेन ता व्यवस्था पर्यंत पोचेल नाह

³² तीन केणेन केरता? ज्याकेरता कि ते विश्वासान नाहं पुण माहु ते कर्मकेरिन होदणे केरतीन एता, तास ता ठोकराचे देगडापूर ठोकर बुंदे.

³³ जसे लिखील हि, “देखू मी सियोनामाय एक जेठ लागणार दिगुड, एने ठोकर खाणार चट्टाण मेली, एने जो कूण तान उपेर विश्वास केरूह, तो लाजवाईल एय नाहं.”