रोमीयो 8 - नाहाली

पवित्र आत्मान द्वारा जीवन

¹ सेवट ऐवी जो मसीह यीशु माय हि, तापोर दण्डाज्ञा नाह. काहाकाय ते शरीरान नियम नाह तेवी आत्मान नुसार चालणु.

² काहाकाय जीवन आत्मान व्यवस्था मसीह यीशु माय माहु पाप ने, एने मोत ने व्यवस्था रीन मुक्त किरील.

³ कारण जे काम व्यवस्था देह् स्वभावामुळे दुर्बल एयन किरील, गेत्लो बोगवान किरील म्हणजे स्वताहा सोराह पापी देहाहोस देहाने एने आबाक मोकलील देहा माय दण्डाज्ञा केरील.

⁴ ज्यानकेरता कि व्यवस्था रीत आमरा माय देहहो भावासारखे नाहं तर आत्मान नुसार चालणु पुरो किरील जाणे.

⁵ काहाकाय देह स्वभावाचा माणुह चिहटालल्ली वातुहेरी मोन लागाडणे; अध्यात्मिक आत्मिक वातुहेरी मोन लागाडीन लागाडणे.

⁶ शरीरपोर मोन लागाडीन लागड्नार तेवी मरण हि, पुण आत्मापोर मोन लागाडीन लागड्नार तर जीव एने शान्ति काय केरणे हि;

⁷ काहाकाय शरीरपोर मोन लागाडीन लागड्नार तर बोगवानान हेर्यो वैर हि, काहाकाय तर बोगवानान व्यवस्था अधीन हि एने नाहं एहू शकत;

⁸ एने जो देहाधीन हि ते बोगवानानाह संतुष्ट केरतीन नाहं.

⁹ पुण ऐवी बोगवानान आत्मा तुम्रेमाय वास करने, तर तुमूह शारीरिक दशा नाहं, पुण आत्मान अधीन हि. जर कुणी फाय मसीहान आत्मा नाहं तर तो तान नाहं.

¹⁰ जर मसीह तुमरे माय हि, तर शरीर पापाह मारील हि पुण आत्मा धार्मिकता कारणाने जीवतालू हि.

¹¹ जर ताचने आत्मा तान केरता यीशुह मुरील मायरीन जीवतालू किरील, तो तुमरो माय हि; पुण जो मसीह मोरील मायरीन जीवाडील, आपणो आत्मान द्वारे जो शरीर माय हि, जीवाडी.

¹² यानकेरीता हे बायहो, आमु शरीरान कर्जदार नाहं कि शरीरान अनुसार दिह गीया,

¹³ कारण जर आमु शरीरान अनुसार जोगलि तर मोरण्यू, जर आत्मान अनुसार जोगलि तर जीवन रेहू.

¹⁴ यानकेरीता कि जोलाक माणहे बोगवानान आत्मा माय चालतो हि, तोज बोगवानान सोरो हि.

¹⁵ काहाकाय तुमूह दास पणाच्या आत्मा नाहं जुडना कि पोशा बिणेन बाळगावी, पुण दत्तक पणाचा आत्मा जुडना हि ज्यासे आमु आबा, आबुक केरीन आयेड देती.

¹⁶ आत्मा स्वताह आपणो आत्मान हेरी गवाही आपथु, कि आमु बोगवानान सोरा हेते.

¹⁷ एने जर सोरा हेते तर वारिस पुण हेते पुण बोगवानान वारिस एने मसीहा हेरी वारिस हि कि ऐवी आमु तान हेरी दुख पालोह, तर तान हेरी वैभव पुण बोगणे.

भविष्यमाय प्रगट एणेवाली महिमा

¹⁸ काहाकाय मी होमजथी कि आवो वेलान दुख एने क्लेश ता वैभवाच्या सुमोर, जे आमऱ्येपुररीन प्रगट एय, होयकी नाहं हि.

¹⁹ काहाकाय जग अत्यंत उत्कंठेने नजरेने बोगवानान सोरान आवणेन वाट देखीह हि.

²⁰ काहाकाय जग आपणो ईच्छा नाहं तर अधीन केरनेवालन उखेर रीन व्यर्थतेच्या स्वाधीन जी आशा से केरील गीयी.

²¹ काहाकाय जग पुण नश्वरतेच्या दासे मुक्त एय, बोगवानान सोराह महिमा युक्त मुक्तता जुडी.

²² काहाकाय आमूह मालूम हि कि आखा जग एविवूर मिलिन कण्हत एने तारास भोगीत हि;

²³ एने फक्त तोज नाहं तर आमु पुण ज्यान आहने आत्मान पेल्ला फोल हि, एने आपणो शरीरान सुटकारा दिखिह येतो आपणो ठायी कण्हत एतो.

²⁴ आवो आशान द्वारे आपणा उद्धार एय गीयो हि; पुण ज्या वस्तून आशा केरील जातेह ऐवी, ती जर ताराय एती तर पोशा आशा कां रेणी एती? काहाकाय ज्या वस्तूला कूण दिखिह हि तान आशा काय केरुहू?

²⁵ पुण ज्या वस्तूला आमु नाहं दिखिह, तर तान आशा मेली धीर मारीतले तान वाट दिखिह पुण हि.

²⁶ आवो रीतीमाय आत्मा पुण आमरा दुर्बळतेमुळे मदत केरूह “कारण नाहं आमूह मालूम कि प्रार्थना कायताहा रीतीमाय केरील जुवी, पुण आत्मा स्वताह आपणे केरता विनंती करने.”

²⁷ एने अंतर्यामी पार्खिलो ला मालूम हि कि आत्मान मोनभाव काय हि? काहाकाय ते पवित्र माणहा केरता बोगवानान ईच्छा विनंती करने.

²⁸ “आमूह मालूम हि कि जे माणहे बोगवानानापूर प्रेम केरणू, तान केरता आखा वातू मिलिन हाजो उत्पन्न केरणू; म्हणजे जानकेरता जे ताफाय हादाड्या हि.

²⁹ काहाकाय तान केरता ताह पेल्ला होमजाडीन लीईल हि, ताह पेलूच ठेरिनीन लीईल हि कि तान सोरान प्रतिमेप्रमाणे बोनाडाणे म्हणजे तो बायहो जादा मोठलो तान जेष्ठ इही एने जुवी.

³⁰ पुछो ज्याह पेलूच निवाडीन आपील” ताह हादाड्या पुण, एने ज्याह नीतिमान ठेरायेल, ताह महिमा पुण किरील.

बोगवानान प्रेम

³¹ पासाण आमु आवो वातून विषयातमाय काय केहू? जर बोगवानान आमरेहेर्यो हि तर आमारो विरोधी कूण एहू शकणे?

³² एने जा आपणा स्वतान सोराह भी नाह राखीन मेल्यू, पुण आपु आखान केरीन ताह आपील, तो आपुह ता हेर्यू आख्यू वातू काहा नाय आपी?

³³ बोगवानान निवडीलेताहा दोष कूण लागाडणार? बोगवानान हि जो ताह नीतिमान ठेरावणार हि.

³⁴ ओवतो कूण हि जो दण्डान आज्ञा आपण्यू? मसीहान हि जो मरण जूळनो पुण मुरील मायरीन जीवतालू पुण उठिल, एने बोगवानान जेवडी उगे हि, एने आमरे केरता विनंती पुण करने.

³⁵ तीन कूण आमूह मसीहान प्रेमाफायरीन आलेग केरुहू? काय त्रास, केव्ही संकट, कि आप्पती, कि तरास, कि, कि उपास मार, कि तलवार?

³⁶ या लिखील हि, “तार केरता आमु दिह दिह मारणे एता हि; आमूह मारणे केरणारा मेंढरांनहोस गेनील गीया हेते”

³⁷ पुण आवो आखा वातीमाय आमु तान द्वारे तान केरता आमऱ्येपुररीन प्रेम किरील, ते जीकनेपुररीन पुण मोठा हि.

³⁸ काहाकाय माहु खात्री हि का मरण, जीवन, स्वर्गदूत, अधिकारी, वर्तमान, भविष्य, सामर्थ्य, उचु,

³⁹ पातलो एणेन काल्ली ओहलो सृष्टी आमूह बोगवानान प्रेमारीन जो आमारो प्रभु यीशु मसीहा माय हि, आलेग केरूह शकणार.