रोमीयो 7 - नाहाली

वाराडवाला जीवनान वार्ता

¹ हे बायहो, काय तुमु नाह ओलखते मी नियमशास्त्रान ओलखिणार किथे कि ताहेरया एक माणुह जीवतालू रेणे, तो ताहवोर तापोर व्यवस्था सत्ता रेणू?

² काहाकाय वाराडावाली बायकू व्यवस्था अनुसार आपणो एदम्याह जीवानामाय तान हेरी बांधील हि, पुण केध्दीह एदमी मोरीन जाहो, तर ती माणहान नियममायरीन सुळीन गीयी.

³ जानकेरता केध्दीह एदम्या जीवतालू एयताहा ती कायताहा दिहीरा एद्म्याह एय गीयी, तर व्यभिचारामाय जाहो, पुण केध्दीह एदमी मोरीन गीयो, तर ती ता व्यवस्था मायरीन सुळीन गीयी, न्या ताहवोर कि केध्दीह कूण दिहीरा एदम्यान एय गीयी तेभी व्यभिचारणी ठेहरी.

⁴ तोहोलोच मारो बायहो, तुमूह पुण मसीहान शरीरान जर व्यवस्था मुरील बोनाडीन गीया, कि ता दिहीरान एय जावू, जो मोरील मायरीन जीव उठिल: का आमु बोगवानान केरता फोल लावहू.

⁵ काहाकाय कि ताहेरया आमु शारीरिक एता, तर पापान अभिलाषा जे व्यवस्था द्धारे एती, मृत्यू चे फोल उत्पन्न केरणेन केरता आमरा शरीरा माय काम केरतीन एता.

⁶ पुण ज्यान बंधनामाय आमु एता तान केरता मोरीन, ऐवी व्यवस्था तून इही सुळीन गीया, कि पाहून लेखणो जुना रीत उपेर नाहं, नापून आत्मान नोवालो रीतीपूर सेवा केरणू.

व्यवस्था एने पाप

⁷ तर आमु काय केहू? काय व्यवस्था पाप हि? केधीच नाहं! नापून विना व्यवस्था मी पाप नाहं ओळखतेह: व्यवस्था केध्दीह नाहं कियेल, कि लालूच केरहू मां तर मी लालच्य ओलखिल नाहरेने.

⁸ पुण पाप ने संधी साधून आज्ञा द्धारे कुणबी आखा प्रकारान लालूच उत्पन्न किरील, काहाकाय कि वोगर व्यवस्था पाप मुरील हि.

⁹ मी तर व्यवस्था वोगर जीवतालू एतो, पुण ताहेरया आज्ञा आवी, तर पाप जीवतालू एय गीयो, एने मी मरण जाईल.

¹⁰ एने तीस आज्ञा जी जीवनान केरीन एती मारकेरीन मोरनी कारण ठेराईल.

¹¹ काहाकाय कि पापण्या संधी साधून आज्ञा द्धारे माहु बोह्कावी एने ताणुच द्धारे माहु देद्बी टाकील.

¹² ज्याकेरता व्यवस्था पवित्र हि, एने आज्ञा पुण हाजो एने हाजी हि.

पापा से वोचणे माय व्यवस्था असमर्थ

¹³ तर काय ती हाजी एती, मारकेरीन मृत्यू ठेरना केदिबी नाहं, पुण पाप तान हाजो वस्तून द्धारे मारकेरीन मुरील उत्पन्न केरणार एनो कि तान पाप एने; प्रगट एय गीयो, एने आज्ञा द्धारे पाप बहुमच पापमय ठेरना.

¹⁴ आमु ओळखणे कि व्यवस्था तर आत्मिक हि पुण मी करने शारीरिक एने पाप्यान मी वेचील हि.

¹⁵ जे मी करने ताह ओळखतेह नाहं, काहाकाय कि जे मी इच्छितो ते नाहं करने, पुण ज्यान माहु हेष लागीह तोज करने.

¹⁶ केध्दीह जे मी नाहं इच्छितो तोज करने तर मी मानीन लेणे कि व्यवस्था हाजो हि.

¹⁷ तेवी ओला देशामाय माय तान केरणार मी नाहं, नापून पाप हे कुणबी बुहील हि.

¹⁸ काहाकाय कि मी ओळखणे कि कुणबी अर्थात मारो शरीरामायरीन काल्ली हाजी वस्तु वास नाहं केरतीन ईच्छा तर कुणबी हि, पुण हाजो काम मारकेरीन बोणावीन नाहं जात.

¹⁹ कारण कि ज्या इच्छो कामान मी हाजो करने, तो तर नाहं केरतीन, पुण ज्या चुकीने हाजो नाहं केरतीन, तोज केरतेच रेणे.

²⁰ सेवट केध्दीह मी तोज करने ज्यान ईच्छा नाहं केरतीन तेवी तान केरणार मी रेणा नाहं पुण पाप जे कुणबी बुहील हि.

²¹ ज्योच प्रकारे मी हे व्यवस्था मेलावीन लेणे कि ताहेरया हाजो केरणेन ईच्छा करने, तर वाईट मारो उगे आवी.

²² काहाकाय कि मी माय वाला माणहान तर बोगवानान व्यवस्था तून जुलुम प्रसन्न रेणे.

²³ पुण माहु आपणो शरीरा माय दिहीरा प्रकारची व्यवस्था देखाईल आवी जे मारो बुद्धी व्यवस्था तून चालाडील एने माहु पाप्यान बंधनामाय टाकणे जे मारो शरीराहे-या हि.

²⁴ मी कोहलो काही माणुह हि! माहु ज्याह मृत्युन शरीरान कूण सोडवे.

²⁵ आमरा प्रभु यीशु मसीहाच्या द्वारे बोगवानान धन्यवाद एय, जानकेरता मी आपणो बुद्धी बोगवानान व्यवस्था तून पुण शरीर केरीन पापान नियमोमाय सेवा करने.