रोमीयो 6 - नाहाली

पापान केरता मोरील: मसीह ने केरता जीवताला

¹ तर आमु काय हि? काय आमु पाप करने कि कृपा जुलुम हि?

² केदिमेदी नाहं! आमु ताहेरया पापान केरता मोराना एता तेवी ओगाण तामाय केवी जीवन जाय?

³ काय आमूह नाहं मालूम कि आमु आखा तान केरता मसीह यीशुन बाप्तिस्मा लियेल, तेवी तान मोरतला आमु बाप्तिस्मा लियेल.

⁴ तर ओवतो आपु ता मोरणेन बाप्तिस्मा स्वीकारून आमु तान हेरी पुरीगियो जाईल, कारण इही मसीह पितान महिमाच्या द्वारे मुरील मायरीन जीवतालू किरील, तोहोलोच आमु पुण नोवालो जिवलाहारखे चालणे.

⁵ काहाकाय आमु जर तान मोरणेन प्रतीरुपान ताहेरी मिलिन गीया हि, तेवी खेरी खेरीच तान जीवतालू लेणेन प्रतीरुपान पुण जोडीन जाहू.

⁶ आमूह मालूम हि कि आमारो जुनो माणुह तान हेरी क्रुसापोर सोडवियू गीयो, काहाकाय पापान शरीर वाया एय जाहू, एने आमु ओगाण केरता पापान दास्य केरूह नाहा.

⁷ काहाकाय जो मोर गीयो, तो पापाम रीन मुक्त एय जायील ही.

⁸ ज्यानकेरता जर आमु मसीहान हेरी मारीन गीया, तर आमारो विश्वास हा हि कि तान हेरी जीवणेहि पुण.

⁹ काहाकाय हे होमोजणु कि मसीह मुरील मायरीन जीवतालू एय पोशा मोरण्यू नाहं; ज्यापरीन पोशा मरण पोशा आविह नाहं.

¹⁰ काहाकाय तो जो मरण जूळनो तो पापान केरता एकुच वारीन मरण जूळनो, पुण जो जीवतालू हि तो बोगवानाना केरता जीवतालू हि.

¹¹ ओहलाच तुमूह पुण आपणो स्वताह पापान केरता तर मरा, पुण बोगवानान केरता मसीह यीशु माय जीवतालू होमजू.

¹² ज्यानकेरता पाप तुमरो शरीराम अधीन एने जुवी, कि तुमूह तान लोभा अधीन रेहू नाहा;

¹³ एणेन आपणो शरीरान अधर्मची साधन लेनिके पाप साखजपर्ण केरू, पुण स्वताह मुरील मायरीन जीवतालू इयील होमजाडीन बोगवानानाह साखजपर्ण केरू, एने आपणो अवयव धार्मिकता साधन लेनिके बोगवानानाह साखजपर्ण केरू.

¹⁴ तेवी तुमरे पोर पापान प्रभुता नाहं आवूह, काहाकाय तुमु व्यवस्थान अधीन नाहं तर कृपान अधीन हि.

धार्मिकतान दास

¹⁵ तर काय एय गीयो? काय आमु यानकेरीता पाप केरणू कि आमु व्यवस्थान अधीन नाहं तर कृपान अधीन हि? केवी तेभी नाहं!

¹⁶ काय तुमूह नाहं मालूम कि ज्यान आज्ञा माननेकेरता तुमूह स्वताह गुलामाहोस साखजपर्ण केरीन आपणु ताणुच गुलाम हेते जर पापान केरता ज्यान मरण धार्मिकता हि?

¹⁷ पुण बोगवानान धन्यवाद ओहलो कि तुमूह जे पापान गुलाम ऐतेह ऐवी मोनामरीन ता हिकाडणे केरता आवीन गीया ज्याह आपणो खोलामाय आपील.

¹⁸ एने पापो सोडवीन धार्मिकता गुलाम एय गीया.

¹⁹ एने तुमरो देस्वभावाच्या दुर्बल ताकेरिन मनुष्यव्यवहारा प्रमाणे मी बोलेहे जोहलो तुमूह आपणो अवयवाह पाप केरणे केरता अशुद्ध पुण एने कुकर्म इही दास इही साखजपर्ण किरील गीया तोहोलोच ऐवी आपणो अवयवाह पवित्रतेसाठी धार्मिकता साखजपर्ण केरू.

²⁰ जेवी तुमूह पापान दास एता, तर धार्मिकता संबंधाने आलेग एतो.

²¹ शेवेट ज्या वातील ऐवी तुमूह लाज लागणे एती, जानकेरता ता टायीमा काय तुमूह फोल जुडतो एता? काहाकाय तान शेवेट तर मरण हि.

²² पुण पाप ने मुक्ती मेलावीन एने बोगवानान दास बोणावीन तुमूह फोल जुडील जोहलो पवित्रता प्राप्त एता, एने तान शेवेट अनंत जीवन हि.

²³ काहाकाय पापान वेतन मरण हि, पुण बोगवानान वरदान आपणो प्रभु यीशु मसीहा माय अनंत जीवन हि.