रोमीयो 3 - नाहाली

¹ सेवट यहूदीयान यहूदी येणेन केव्ही खतना येणेन काय लाभ?

² आखान प्रकारान जादा काही. पेल्ला तर हे कि बोगवानान वचन ताह होपील.

³ कोलाकान विश्वास मेलील नाह केरीन काय ईइल? तान अविश्वास बोगवानान विश्वासपात्रता व्यर्थ केरील काय?

⁴ केदिमेदी नाहं! नापून बोगवान खेरो एने प्रत्येक माणुह ठेग-यु ठेरणू, जोहलो लिखील हि, “ज्यान तू आपणो वातू माय खेरो ठोरावणे न्याय करीन टाइम तू विजयी पावेल.”

⁵ जानकेरता केध्दीह आमारो अधर्म बोगवानान धार्मिकता हि, तर आमु काय केहू? काय ज्याच कि बोगवान जो राग करने अन्यायी हि? हे तर मी माणहान रीतीमाय किथी हि.

⁶ केदिमेदी नाहं! नाहं तर बोगवान केवी जगान न्याय केरूह?

⁷ केध्दीह मारो ठेगणे पणाच्या कारणाने बोगवानान सत्य तान महिमा केरता, जास्ती एय प्रगट एनी तर ओवतो का पापाहा हारका दण्डान योग्य ठेरिन्यो जाथू?

⁸ “आमु का बुराई केरूह नाहा कि हाजो निकाली? जोहलो कि आमऱ्येपुररीन हि दोष लागाडया जाथू, एने काही केणु कि ज्यान केणे हि पुण इही जे ठराविलु ते हाजो हि.”

कुणीच धर्मी नाह

⁹ तर ओवतो काय एय गीयो? काय आमु ताउगेरीन हाजो हि? केधीच नाहं; काहाकाय आमु यहूदी एने यूनानी उपेर हा दोष लागिल हि कि ता आखा आखा पाप्यान वंश माय हि.

¹⁰ जाणेन लिखील हि: “कुनुस धर्मी नाहं, एक पुण नाहं.”

¹¹ कूण होमजणार नाहं; कूण बोगवानान होदनारू नाहं.

¹² आखा भटकिल्यो हि, आखा आखा बिगरउपयोगी बोणावीन गीया हि; कुनुस सत्कर्मे केरणार नाहं.

¹³ तानकेरीन गळा उगडील माणहान हि, तास आपणो जीभने वेखडणु किरील हि तान ओठमाय गेयळेकान विष हि.

¹⁴ तान मूय शापाने एने कपटीपानाने भूरील हि.

¹⁵ तान पाय रक्त वोयाडील उतावळे एय गीयो हि,

¹⁶ तान मार्गाम नाश एने क्लेश हेते,

¹⁷ तास शान्तिन सिडिक ओलखिल नाहं.

¹⁸ तान डोला सुमोर बोगवानान बिय नाहं.

¹⁹ आमु ओलखिल कि व्यवस्था जे काही किथी हि, ते ताहाज किथी हि जे व्यवस्था अधीन हि; तान केरता कि प्रत्येक मूय बंद किरील जातीमाय एने आखा जग बोगवानान दण्डाचे योग्य ठेरती;

²⁰ काहाकाय का व्यवस्था कारण से काल्लोज प्राणी तान सुमोर धर्मी ठेरणार नाहं, जानकेरता कि व्यवस्था द्वारे पापान ओलेख एती.

विश्वासा द्वारे धार्मिकता

²¹ पुण ऐवी व्यवस्था आलेग बोगवानान ती धार्मिकता प्रगट एनी, हि ज्यान गवाही पवित्र शास्त्र एने भविष्यवक्ता आपणु.

²² म्हणजे बोगवानान हि धार्मिकता जे यीशु मसीहा पोर केरणू ता विश्वास केरणारा केरता हि. काहाकाय कि कायीच भेदभाव नाहं;

²³ जानकेरता कि आखा पाप किरील हि एने बोगवानान महिमारहित हि,

²⁴ पुण तान कृपासे सुटकेद्वारे जो मसीह यीशु माय हि, नितीमुल्य धर्मी ठेरिन्यो जातीमाय.

²⁵ ताह बोगवानान तान रक्तान कारणाने एक इही क्षमा ठेरायेल जो विश्वास केरणेन केरता कार्यकारी एती, कि जे पाप पेल्ला किरील गीया एने ज्यापूर बोगवानान आपणो सहनशीलतान काहाकाय लक्ष आपील नाहं. तान विषयाम तो आपणी धार्मिकता प्रगट केरूह.

²⁶ नापून ता टायीमा तान खेरापण प्रगट एती कि ज्यान ते खुदेन खेरो ठेरणू, एने जे यीशुवर विश्वास मेलणार नीतिमान ठेरावी एय.

²⁷ तर खत केरणेन कां रेणा? तान तर जागेज नाहं कायताहा व्यवस्था कारणाने? नाहं, नापून विश्वासान व्यवस्था कारणाने नाहं.

²⁸ जानकेरता आमु आवो परिणामापुर पुचनु हि माणुह व्यवस्था कामान केरता जुदोज, विश्वासा द्वारे नीतिमान ठेरहू.

²⁹ काय बोगवान केवळ यहूद्यांचाच हि? काय दिहरी जाती न्यान नाहं? होव, दिहिरिजातीन न्या पुण हि.

³⁰ कारण एकुच बोगवान हि, जो नाहं खतना किरील, विश्वासान एने खतना किरील पुण विश्वासान द्वारेच धर्मी ठेरायेल.

³¹ तेवी काय आमु व्यवस्थाह विश्वासान द्वारे वाया ठेरायेल? एखातवार नाहं! नापून व्यवस्था माय स्थिर केरणू.