रोमीयो 2 - नाहाली

बोगवानान न्याय

¹ हे दोष लागाडणार, तू कूण काहा नाह रेत, तू निरूतर हि; काहाकाय कि जी वातू तू दिहीरा पोर दोष लागाडणेति वातिमय तू स्वताह भी दोषी ठरिनील हि, जानकेरता कि तू जो दोष लागाडणे स्वता ती काम करने.

² आमूह मालूम हि ओहला ओहला काम केरनारापूर बोगवाना फायरीन खेरला दण्डान आज्ञा एने.

³ हे माणहा, तू जो ओहला-ओहला काम केरनारापूर दोष लागाडणे एने तूच ता काम करने; तू काय सोमजीह कि तू बोगवानान दण्डान आज्ञा से वोच जाही?

⁴ काय तू तान कृपा, एने तान सहनशीलता, धीरपणाह तुच्छ जाणीह? काय ज्यो समजात का कि बोगवानान कृपा तुवाह मोन बोदलणेन हिकाडीह?

⁵ पुण तू आपणो कठोरपणाने एने हटीला मोनान कारण ता रागान दिहान केरता, ज्यामाय बोगवानान खेरो न्याय प्रगट एय, आपणे केरता राग कामाविह हि.

⁶ तो आखाह ज्यान तान कामानबद्द्ल फोल आपी:

⁷ जो सुकर्मामाय स्थिर रेयीन, महिमा, एने आदराने, अमरता होदमाय हेते, तो ताहा अनंत जीवन आपी;

⁸ पुण जो वाद केरणार हेते एने सत्याह मानते नाहं, पुण अधर्म मानतेह, तापोर राग एने कोप आव पोळी.

⁹ एने क्लेश एने संकट प्रत्येक माणुह जीव जो वाईट करने तापोर आवी, पेल यहूद्यावर ओवतो यूनानी पोर;

¹⁰ पुण महिमा एने सन्मान एने केल्यान आखाह जुडी, जो पुण हाजो करने पेल्ला यहूदी ओवतो यूनानी पोर,

¹¹ काहाकाय बोगवान कुणाचने पक्षपात केरतीन नाहं.

¹² जानकेरता तान केरता व्यवस्था नाहं पुण पाप किरील, ते बिना व्यवस्था नाह पुण हेते; तान केरता व्यवस्था पोडीन पाप किरील, तानकेरीन दण्ड नियमामाय नुसार एय;

¹³ काहाकाय कि बोगवानान व्यवस्था नुसार होमलणारे धर्मी नाहं, पुण शास्त्रा नुसार चालणारे खेरो ठेरायेल जातीमाय.

¹⁴ ओवतो ताहेरया दिहरी जातीनी माणहे ज्यानस उगे व्यवस्था नाहं, पुण स्वभावमाय शास्त्रान वातू नुसार चालणु तर व्यवस्था ताहेऱ्यो नाह एता, पुण ते आपणे केरता खुदेन व्यवस्था हि.

¹⁵ ते व्यवस्था वातू आपणो आपणो हृदयामाय लिखील देखाडतलू एने तान विवेक बुद्धी पुण गवाही आपती, एने तान चिंता परस्पर दोष लागाळ नाहं तर निर्दोष ठराविलु.

¹⁶ ज्या एक दिह बोगवान मारो सुवार्तान अनुसार यीशु मसीहान द्वारे माणहान लिकाडील वातुहू न्याय केरूह ता एक दिह हे देखाईल आवी.

यहूदी एने व्यवस्था

¹⁷ जर तू यहूदी केवडाविह, एने व्यवस्था पोर विश्वास मेलीह, एने बोगवानान विषयाम घमंड मेलीह.

¹⁸ एने तान ईच्छा जाणीह एने व्यवस्थाची शिक्षा मेलावीन हाजो हाजो वातुहू माणने;

¹⁹ एने आपणेपूर विश्वास मेलीकि मी आंधला वाटाडी, एने आंधाराम पोडजानारा प्रकाश,

²⁰ एने ज्ञानाना हिकाडनारो, एने आतल्या गुरु हि एने ज्ञान एने सत्यान नमुना जे व्यवस्था हि, माहु जुडील हि.

²¹ सेवट; काय तू दिहीरा हिकाडणे; स्वताह हिकाडी नाहं काय? काय तू चोरी नाहं केरणेन हिकाडील? एने खुदेन चोरी करने?

²² तू ज्यो किथे, “व्यभिचार केरूह मां” काय तू भी व्यभिचार केर्ने? तू जो मूर्ती से विटालू केर्ने, काय खुद मंदिराह लुटणे?

²³ तू जे व्यवस्था माय खत करने, काय व्यवस्था माय नाहं मानीन बोगवानान अपमान करने?

²⁴ “काहाकाय तुमरे कारण दिहरी जातीम बोगवानान नावान निंदा एय जाणे” जीही लिखील पुण हि.

²⁵ केध्दीह तू व्यवस्था नुसार चालूह तर सुंतेने लाभ रेंय, पुण केध्दीह तू व्यवस्था माय मानणनये नाहं तर तारी खतना बिना सोतान दशा ठेरणू.

²⁶ जानकेरता केध्दीह सुनते रीथीह माहाजाती व्यवस्थाची दिहरो जाणाह मानत, जातीमाय तर तान काय बिना खतनान दशा सुंतेच्या बरोबर नाहं तोली जाहू.

²⁷ एने जो माणुह शारीरिक रुपान बिना खतनान रेंय. केध्दीह हे व्यवस्था माय पुरो केरहेतू, काय तुवाह जो लेख जुडील एने खतना किरीत, तेभी पुण व्यवस्था पालाण नाहं दोषी ठेरणार नाहं?

²⁸ कारण यहूदी तो नाहं जो प्रगटात यहूदी हि; एने नाहं ते खतना हि जे प्रगटात हि एने शरीराम हि.

²⁹ पुण तू यहूदी तो हि, जो हृदयाम एने आत्मा माय हि, नाहं कि तोच खतना हि, लिखील इही कि: वाहवा माणहा उगेरीन नाहं पुण बोगवाना फायरीन एने जुवी.