रोमीयो 15 - नाहाली

दिहरान बोडोती केरू

¹ सेवेत आमु जोरावाराह जुवी कि निर्बलाह सहन केरीन, याच एणेन मा का जीवाह प्रसन्न केरूह.

² आमुफायरीन प्रत्येक शेजाऱ्यांना तान हाजो कामान केरता प्रसन्न केरू कि तान उन्नती एय.

³ काहाकाय कि मसीहाने आपणो स्वताह प्रसन्न किरील नाहं, पुण जाणेन लिखील हि, “तारो निंदकांची निंदा मारपुर आवी हि.”

⁴ जोलाक वातू पेल्ला तारीन लेखीन गीया हेते, ती आमरेकेरीन लिखील गीयी हेते कि आमु धीर एने पवित्र शास्त्रान हाजो आशा मेलूह.

⁵ धीर एने शान्ति आपणार बोगवान तुमूह हे वरदान आप कि मसीह यीशुन नुसार परस्पर एक मोन एईन रिजी.

⁶ कारण कि तुमूह एक मोन एने एक स्वरात आपणा प्रभु यीशु मसीहान आबाक बोगवान ज्ञान स्तुती केरावी.

सोबान केरताल सुसमाचार

⁷ ज्यानकेरता जाणेन मसीहाने बोगवानान महिमा केरता तुमूह ग्रहण किरील हि, तोहोलोच तुमूह पुण एक दिहीराह ग्रहण केरू.

⁸ ज्याकेरता मी किथे कि जी प्रतिज्ञा पूर्वजान आपील गीयी एती ताह दृढ केरणेन केरता मसीह, बोगवानान खेरोपण प्रेमान आपणे केरता खतना किरील माणहान दास बना.

⁹ एने दिहरी जाती पुण दया कारणाने बोगवानान स्तुती केरीन केरील लेखील हि, “जानकेरता मी जातीई-जातीई माय तारो धन्यवाद केरुहू, एने तारो नावान भजन गावीही.”

¹⁰ पोशो कियील, “हे जाती-जाती आखा माणहे, तान प्रजा हेऱ्या आनंद केरू.”

¹¹ एने ओवतो, “हे जाती-जातीन आखा माणहे, प्रभुन स्तुती केरू, एने हे राज्य राज्यान माणहे, तान स्तवन केरू.”

¹² एने ओवतो यशाया केणे, “ईशायान मूल फुटे, एने दिहरी जाती न्यान अधिपती एणेन केरता एक उठीह, तापोर दिहिरिजाती आशा मेलती.”

¹³ बोगवान जो आशेमाय दाता हि तुमूह विश्वास केरणेन केरता आखा प्रकारान आनंद एने शान्ति परिपूर्ण केरूह कि पवित्र आत्मान सामर्थ्यान तुमरी आशा वोदनेन जाहो.

इमुत से लेखणेन कारण

¹⁴ हे मारो बायहो, मी स्वताह तुमरो विषयाम निश्चित ओळखणे, कि तुमूह पुण स्वताहा हाजान केरता भूरील ईश्वरीय ज्ञानांनी जादा हेते, एने एक दिहीरा हिक केरूह केरसेक्तालू.

¹⁵ तेभी मी काहरी-काहरी एर करावणे केरता तुमूह जे जादा धैर्याने लेखील हि, हे ता कृपेने कारणाने एय गीयो जे बोगवानान माहु आपील हेते.

¹⁶ कि मी दिहरी जाती केरता मसीह यीशुन दास एईन बोगवानान सुवार्तान सेवा याजका हारका केरूह, ज्यासे दिहरी जाती न्यान अर्पण केरील जाणे पवित्र आत्मा माय पवित्र बोणावीन ग्रहण किरील जाहो.

¹⁷ ज्याकेरता ता वातीन विषय माय जे बोगवाना हेरी संबध मेली, मी मसीह यीशु माय माहु अभिमान वाटतो.

¹⁸ कारण कि ता वातुहू सोडीन माहु उंजू कायताहा वातून विषय माय केरणेन धेर्य नाहं जे मसीहाने दिहरी जाती न्यान अधिनते केरीन वचन एने कर्म,

¹⁹ ई पवित्र आत्मान सामर्थ्यान मारोज द्वारे किरील न्याओर कि मी यरूशलेम मायरीन चारू हाती इलुरीकामा ताहवोर मसीहान सुवार्तान पुरो घोषणा केरील.

²⁰ पुण मारो मोनान ईच्छा हि कि जाहारी-जाहारी मसीहान नाव नाहं गीया तिथ ताहवोर सुवार्ता होमेल इही होवो कि दिहरान बांधील पायापोर घेर बाधहु.

²¹ पुण जाणे लेखील हेते तोहोलोच होवो, ज्या माहु ताहवोर ताह सुवार्ता पोचाडील नाहं ते देखणे एने ज्याह होमलावाने नाहं ते समाज.

रोम यात्रान पौलुसान योजना

²² ज्यानकेरता मी तुमरीफाय आवता पोशा पोशा अडथळा आवा.

²³ पुण ऐवी आवो देशामाय मारो कामान केरता उंजू जागो रेणी नाहं एने जादा वर्षामाय माहु तुमरो आहने आवणेन उत्कंठा हि.

²⁴ जानकेरता ताहेरया मी स्पेनला जाइताहा तुमरीफाय आवीन जाहो कारण कि माहु आशा हि कि माहु तोथा आवता तुमरो हेरी भेट एय एने ताहेरया तुमरी संगती एय मारा मोन बोरीन आवी तेवी तुमूह माहु काही सेटो ताहवोर पोचाडीन द्या.

²⁵ पुण ऐवी तर मी पवित्र माणहान सेवा केरता यरूशलेम ला जात हि.

²⁶ कारण कि मी मासेदोनिया एने अखयान माणहाह हे हाजो लागनो कि यरूशलेमान पवित्र माणहामाय गरिबा केरीन काही मदत केरणे आप.

²⁷ ताह हाजो तर लागनो, पुण ते तान कर्जदार हि, काहाकाय दिहरी जातीन केध्दीह अध्यात्मिक वातीमाय भागीदार एयताहा ताह पुण उचित हि कि शारीरिक वातीमाय तान सेवा केरू.

²⁸ ज्याकेरता मी हे काम पुरो केरीन एने ताह हि आर्थिक मदत आपील तुमरीफाय आवीन स्पेनला जाहो.

²⁹ एने मी ओळखणे कि ताहेरया मी तुमरीफाय आवी तेवी मसीहान पुरो आशीर्वाद हेरी आवी.

³⁰ हे बायहो, आपणा प्रभु यीशु मसीहान आहने पवित्र आत्मान प्रेमाआ एर आपील मी तुमूह विनंती करने कि मारकेरीन बोगवाना उखेर प्रार्थना केरनेमाय मारो हेरी आग्रहाने रीवू.

³¹ कि मी यहूद्यांचे अविश्वासणाऱ्या हेरी वोचीन रेंय एने मारी जी सेवा जी यरूशलेमकेरता हि पवित्र माणहाह दुखान.

³² एने मी बोगवानान ईच्छा तुमरेहे-यो आनंद आवीन आराम पावेल.

³³ शान्तिन बोगवान तुमरो आखासामने रीवू आमेन.