रोमीयो 12 - नाहाली

बोगवानान सेवान जीवन

¹ ज्यानकेरता हे बायहो, मी तुमरीकेरता बोगवानान दया एर आपील विनंती करने कि आपणो शरीराह जीवतालू एने, पवित्र बोगवानान ग्रहणीय बलीदान केरीन चेढाऊ. जिच तुमरी अध्यात्मिक सेवा हि.

² आवो जगाच्या ओहलो जरूप बोणावूहु मा; पुण आपणो मोनान नोवोकेरिन जी जीव रुपांतर एहू द्या, ज्यासे तुमूह बोगवानान हाजो, एने ग्रहणीय एने सिद्ध ईच्छा महामुंदू होमजाडीन लेतेन रीवू.

³ काहाकाय कि मी ता कृपादानाच्या कारणाने जे माहु जुडील हि, तुमरे मायरीन प्रत्येक जाणाह किथे, कि आपणो योग्य ते पेक्षा होवटो स्वताह माणुह मा; पुण जीही बोगवानान आखाह विश्वासान परिनामाणानुसार वाटीन आपील हि, तोहोलोच सुबुद्धी हेरी आपुहू होमजू.

⁴ केरणू कि जाणे आमरा शरीराह मोकता अवयव हेते, एने आखा अवयवाचे एकुच काम नाह;

⁵ तोहोलोच आमु मोक्तास जन हेरो, मसीहा माय एक शरीर एने प्रत्येक जन एकमेकान अवयव हेते.

⁶ ताहेरया कि ता कृपादानाच्या नुसार जे आमूह आपील गीया हेते आमूह बाती बातीन वरदान जुडील हेते, तर ज्याह भविष्यवाणी केरणेन वरदान जुडील रेंय, तान ते विश्वासान परिनामाणानुसार भविष्यवाणी केरावी;

⁷ ज्याह सेवा केरणेन वरदान जुडील रेंय, तान सेवा लागिन रिजी; ज्याह हिकाडणे वरदान जुडील रेंय, तान शिक्षण आपणे माय लागिन रिजी;

⁸ ज्याह सुवार्ता केरणेन वरदान जुडील हेते, तान सुवार्ता केणेम लागणारच रिजी; एने दान आपणारा ते उत्साहने आपणे, एने जो दया करने तान ते आनंद केरावी.

⁹ प्रेम निष्कपट रेणू जुवी; बाक्ताह रीन सेटा रेवू; हाजाला कामाह लेटकीन रीवू.

¹⁰ बाहाक प्रेमाच्या बारामाय खेरो प्रेम देखाडा; तुमी प्रत्येक जन एक दिहरान आदराने आपणापेक्षा थोर मानू.

¹¹ आस्थेविषयी मंद रेहू मा; आत्मा माय उत्सुक ओहलो; प्रभुही सेवा केरतीन रीवू.

¹² आशान विषयामाय, आनंदमाय; संकटामाय विषयामाय, हिम्मत मेलू प्रार्थनान विषयामाय, स्थिर रेय

¹³ पवित्र माणहान गरजा पुरो केरू पावणाय केरणेम लागिन रीवू.

¹⁴ तुमूह त्रास आपणारा आशीर्वाद द्या, आशीर्वादच द्या हाराप आपुह मा.

¹⁵ आनंद केरणारा हेरी आनंद केरुपून शोक केरनाराहेरी शोक केरू.

¹⁶ आपसामाय एकचीत ओहलो मोठा मोठा वातुपोर मोन लागाडीन मुक्या मा तर गरीब माणहाहे-यो संगती मेलू स्वताह शहाणे होमजू मा.

¹⁷ कायनेहाजो बद्दल वाईट ओहलो कुणान फेड केरूह मा आखा माणहान दृष्टीने जे हाजी ते केरणेकेरिन लक्ष्य मेलू.

¹⁸ शक्य तर आखा माणहा हेऱ्यो तुमरेफायरीन एय तोलोक मिलिन रीवू.

¹⁹ हे प्रिय आपणु बोदलो मा, लावू पुण बोगवान राह रागान अवसर आपु काहाकाय शास्त्रामाय लिखील हि काय बोदलु लेणेन मारो कामही बोगवान किथी मिज बोदलु लेह.

²⁰ आवो उलटो जर तारो शत्रु फुकलागीही रेंय तर ताह जेवण आप एने तिह्ल्यो रेंय तर पाणी आप कारण इही कोलाकेरिन तू तान मुंडीपोर आरो रास केरही.

²¹ चुकीने जीकल्यू जाहू, मां, तेवी हाजोहाय चुकीई जिकिने.