प्रकाशितवाक्य 8 - नाहाली

सातवो शिक्कू एने होनान धूपदान

¹ जेहीकाय तास हाते शिक्का उगाडनो, तर स्वर्गाम अर्धा तास ताहवोर शांतता एनी.

² तेवी मी ता सात स्वर्गदूतांना पेल्ला जे बोगवानान सुमोर उबरीयेल रेतेह, एने ताह सात तुरही आपील गीया.

³ ओवतो एक उंजू स्वर्गदूत होना धूपदान मागिल आवा, एने वेदीन आहने उबरील रेणू; एने ताह जादा धुण आपील गीयो कि आखा पवित्र माणहान प्रार्थनान हेरी, होनान वेदी उपेर, जो सिहासनाच्या सुमोर हि चेढाऊ.

⁴ ता धुपाचा सेटू पवित्र माणहान प्रार्थना हेरी स्वर्गदूतांच्या आताकेरिन बोगवानान ओगाण पोचीलने गीयो.

⁵ तेव्ही स्वर्गदूताने धुपाटणे लेईन तामाय वेदी केरील आकठाम बोलीत एने पृथ्वीपोर टाकीन आपील; गर्जना एने शब्द एने वीज एने भूकंप एहू लागिल.

सात तुरही

⁶ जेवी ते सात स्वर्गदूत ज्यानस आहने सात तुरही एता ताह फुकिलो तियार एय गीयो.

⁷ पेल्ला स्वर्गदूताने तुरही फुकल्यु, एने रक्तामाय जुडनोह गारे एने आगठो उत्पन्न एय गीयो, एने पृथ्वी एक तृतीअंश बोलीन गीयो; एने एक तृतीअंश झाड बोलीन गीयो, एने आखा निलो खेड पुण बोलीन गीया.

⁸ दिहीरा स्वर्गदूताने तुरही फुक्यो, तर नाह आकठाम सारखो हेलगीन एक मोठा बोयडो समुन्द्रमाय टाकील गीयो; एने समुद्राचा एक तृतीवंश लुय एय गीयो,

⁹ एने एक तृतीवंश प्राणी मारीन गीया, एने एक तृतीवंश नाव नष्ट एय जाहो.

¹⁰ तिसऱ्या स्वर्गदूताने तुरही फुक्यो, एने एक मोठू तारू जो बोला सारखो हेलगतालो एतो स्वर्गामाय रीन तुतीगोयो, एने खोदेर एक तृतीवंश उपेर एने पाण्यान सातीवर आवीन पोडील.

¹¹ ता ताऱ्याचे नाव नाग्दैना हि; एने एक तृतीवंश पाणी नाग्दैना कोडवो एय गीयो, एने जुलुम माणुह पाणी कोडवो एय गीयो मारीन गीया.

¹² चौथो स्वर्गदूत तुरही फुक्यो, एने सूर्यान एक तृतीवंश, एने चादान एक तृतीवंश एने ताआरा एक तृतीवंश उपेर आपत्ती आवी, न्या ताहवोर कि तानकेरीन एक तृतीवंश शरीर आंधारो एनो एने दिहान एक तृतीवंश माय उजालो नाहं रेणू, एने तोहोलोच रात माय भी.

¹³ जेवी मी पोशा देख्यो, तर आकाशान माय एक गुवळाह उठिल एने उचो शब्दांनी हे केणे होमलील, “ता तीन स्वर्गदूतान केरणू शब्दान कारण से, ज्यान फुकीनो ऐवी रेणा हि, पृथ्वीन रेणारा पोर हाय, हाय, हाय”