प्रकाशितवाक्य 3 - नाहाली

सार्दीसाह संदेश

¹ “सार्दीसने कलीसियान दूताह ज्यो लिख” “ज्यान आहनी बोगवानान सात आत्मा एने सात तारा हेते, तो ज्यो किथी हेते का मी तारो कामान केरीन ओळखणे: तू जीवतालो तर केवाथी, पुण हेते मोरील.”

² जागृत होव, एने ता सामानान जे उगरील हेते जे नाश एण्या हेते, ताह दृढ केर; काहाकाय का मी तारो काल्लाच कामाह बोगवानान पुरो नाहं देख्यो.

³ ज्ञान केरता एर केर का तू केवी शिक्षण प्राप्त किरील एने होमलील एता, एने ताणुच एईन रीवू एने मोन फिरीन. जर तू जागृत नाहं रेंय तर मी चोर हारका आवीन जाहो, एने तू केदिमेदी नाहं ओलखु शकणार का मी कायताहा वेलान तारपोर आवीन पोळी.

⁴ पुण होव, सार्दीसमाय तारो आहने काही इही माणहे हेते तान केरता आपणा फाडका अशुद्ध नाहं किरील, ते शुभ फाडका पिरील मारहे-या फिरेह, काहाकाय का ते आवो योग्य हेते.

⁵ जो जय मिलवणे ताह ज्याह प्रकारे शुभ फाडका पेरावील जातेह, एने तो तान नाव जीवनान पुस्तकामाय कायताहा रीतीमाय नाहं काटू; पुण तान नाव आपणो आबोक एने तान स्वर्गदूतांन हारका मानीन एय.

⁶ ज्यान कान रेंय तो होमलीन लिवू का आत्मा कलीसियाही काय केणे.

फिलादेलफियाह संदेश

⁷ “फिलादेल्फियान कलीसियान दूताह ज्यो लिख” “जो पवित्र एने सत्य हि, एने जो दाविदान किल्यु मेलणे, जान उघाडील कुणी बोंद नाह केर शकणे एने बोंद केरीलाह कुणी उगाड नाह शकणे, तो ज्यो किथे”

⁸ मी तारो काम नाह ओळखणे; देखू, मी तारे ओगाण एक बायणो उगडीन मिलील हेते, ज्याह कूण बंद नाहं केरूह शकत; तारो सामर्थ्य जारीकुच तर हेते, तेभी पुण तू मारो वचनान देखणे किरील हेते एने मारो नावान नकार नाहं आपील.

⁹ देखू, मी शैतानान ता आराधनालय होमाल नाऱ्यानां तारो वशमाय केरीन आपुह जे यहूदी बोणावीन बोह्ना हेते, पुण हेते नापून ठोग्त्ळू केतेह, देखू मी इही केरूह का ते आवीन तारो पायापोर पोडीन जाह, एने ज्यो ओलखिन लेती का मी तारपोर प्रेम मिलील हेते.

¹⁰ तू मारो धीराचे वचन उबराखणे हेते, ज्ञान केरता मी पुण तुवाह परीक्ष्याच्या ता टायीमा वोचाडीन मिलील जो पृथ्वी उपेर रेणारे पारखिल केरता आखा जगा आवूह हेते.

¹¹ मी लागीच आवूह हेते; जे काही तारहेर्यो हेते ताह थोबाडीन मेलील का कूण तारो मुकूट सांडाळील घेवो.

¹² जो जीकी ताह मी आपणा बोगवानान मंदिरान एक खांब बोणावूह, एने तो पोशो केधी बाहेर नाय निक्ली; एने मी आपणा बोगवानान नाव, एने आपणा बोगवानान नगर म्हणजे नवीन यरूशलेमान नाव, जो मार बोगवाना फायरीन स्वर्गामाय रीन उतरणार हि एने आपणो नवीन नाव तापोर लिखूह.

¹³ ज्यान कान रेंय तो होमेल लिवू आत्मा कलीसिया काय किथी हेते.

लौदीकियाह संदेश

¹⁴ “लौदीकिया ज्यान कलीसिया च्या दूताह ज्यो लिखू” “जो आमेन एने खेरो हेते, एने बोगवानान सृष्टीचे मुळ कारण हेते, तो ज्यो किथे का.”

¹⁵ मी तारा कामाह ओळखणे का तू नाहं तर हेलो हेते नाहं तोपील: हाजो येतो का तू हेलो नाहं तर तोपील एतो येतो.

¹⁶ पुण, तू तुहलो नाह का तू कोमट हि, तू हेलो किंवा तातू नाह. केरीन मा तुवाह आपणा मुया मायरीन उखली दियील.

¹⁷ तो किथे का मी धनी हेते एने धनवान एय जाय हेते एने काही वस्तून थोडो नाहं; एने ज्यो नाहं मालूम का तू अपळालेला एने तुच्छ एने कंगाल एने आंधलो एने नागला हेते.

¹⁸ मी तुवाह सेल्लू आपथु आग्ठामाय शुद्ध किरील होनो मार फायरीन वेचातो ले का तू धनवान एय जाही, एने शुभ्र फाडका लेय ली का पेरीन तुवाह आपणो नांगेर्लो पणान लाज नाहं एय, एने आपणो डोला माय लागाडणे केरता सुरमा लेईन ले का तू देखणेन जोओवे.

¹⁹ मी ज्या ज्यापूर प्रेम केरथू, ता आखान अपराध तान पदरी रीगाडीन शिक्षा केरथू; ज्ञान हाती आशा देर एने पश्चाताप केर.

²⁰ देखू, मी बायणापुर उबरील रेयीन खटखटवतुलू; केध्दीह कूण मारो शब्द होबली बायणो उगाडणे, तर मी तान आहने माय आवीन तान हेरी जेवण केरूह एने तो मारो हेरी.

²¹ जो जय मिलिन ताह मी मारो हेरी मारो सिहासनापोर बोहावूह, तोहोलोज मी पुण जय मेलावीन आपणो पित्या हेरी तान सिहासनापोर बोहीन गीयो.

²² ज्यान कान रेंय तो होबलू घेवो का आत्मा कलीसिया काय किथी हेते.