प्रकाशितवाक्य 22 - नाहाली

¹ ओवतो तान माहु बिल्लोर गेत जलजल केरणार, जीवनान पाण्यान नदी देखाडील, जो बोगवानान एने कोकऱ्या च्या राजासना वरून निकलीन,

² ता नगरान वाटेने मध्यभागी वोयताली एतो. नदीन ज्या बाजूमाय एने ता बाजूमाय जीवनान झाड; ताम बारा प्रकारान फोल लागत एता, एने ते प्रत्येक मोयनाम पाकील एता; एने तान पान से जाती-जातीन माणहे हाजो एताला.

³ ओवतो शापित नाहं एय, एने बोगवानान एने कोक-यान राजासन ता नगरात एय एने तान दास तान सेवा केरुहू.

⁴ ते तान मूय देखणार, एने तान नाव तान आथापुर लेखनु एती.

⁵ ओवतो रात नाहं एय, ताह दिवाह एने सूर्य प्रकाशाची गिरीज नाहं एती, कारण प्रभु बोगवान ताह प्रकाश आपण्यू, एने ते पिडीन पिडी राज्य केरुहू.

यीशुन पोशो आवणो

⁶ ओवतो तो माहु कियील, “ज्यो वातू विश्वासाचे योग्य एने सत्य हि. प्रभुनी, जो भविष्यवक्तान आत्मान बोगवान हि, आपणो स्वर्गदूत तान केरता हि का आपणा दासाह ता वातू, ज्यान जेल्दी पुरो एने अवश्य हि, देखाणने.”

⁷ “देखू, मी जेल्दी आवूह हि! धन्य हि तो, जो ज्या पुस्तकामाय भविष्यवाणीच्या वातू माणने.”

⁸ मी तोच यूहन्ना हि, जो जी वातू होमलथू एने दिखिह एतो. जेहीकाय मी होमलील एने देखील, तर ते स्वर्गदूत माहु ज्यू वातू देखाळतालु एता, मी तान पायापोर नमन केरणेन केरता पडनु.

⁹ पुण तो माहु कियील, “देखू, इही मा केरूह; काहाकाय मी तारो, एने तारो बाहाक भविष्यवक्तान, एने ज्या पुस्तका केरीन वातूह मानणाराह हेगातीई दास हि. बोगवानान आराधना केरू.”

¹⁰ ओवतो तान माहु कियील, “जी पुस्तका केरीन भविष्यवाणीच्या वातूह बंद मा केरूह; कारण टाइम आहने आवी हि.”

¹¹ “जो अन्याय करने, तो अन्यायच करने; एने जो मलीन हि, तो मलीनच रिजी; एने जो धर्मी हि तो धर्मी बोणीन रेय; एने जो पवित्र हि; तो पवित्र बोणावीन रिजी.”

¹² “देखू, मी जेल्दी आवूह हि; एने प्रत्येक कामानुसार नुसार बदला आपणे केरता वेतन माहुफाय हि.”

¹³ “मी अल्फा एने ओमेगा, पेल्लो एने शेवेटलो, प्रारंभ एने शेवेट हि.”

¹⁴ “धन्य हि जो, जो आपणा फाडका धोवीन लेणे, काहाकाय ताह जीवनान झाडवोगे आवणेन अधिकार जुळी, एने ते फाटापूररीन नगरात प्रवेश केरुहू.”

¹⁵ पुण चिताह, एने देरीन, एने व्यभिचार, एने हत्यारे एने मूर्ती पुजारो, एने प्रत्येक एक झुठो आवडावनु देरणारे एने ठग केरणार बाहेर रेहू.

¹⁶ “माहु यीशु आपणा स्वर्गदूतांह तान केरता मोकलील हि का तुमरो ओगांण कलीसियान विषयाम ज्यू वातीन गवाही आप. मी दाविदान मूल वोचणे, एने वेगरयु तेजस्वी तारू हि.”

¹⁷ आत्मा एने वोवडी दुयुन केणु, “आव” एने होबलणार पुण केनार, “आव” जो हि तो आव, एने ज्या कोणीही जुवी तो जीवणेन पाणी फुकट लिवू.

उपसंहार

¹⁸ मी प्रत्येक जाणाह, जो ज्यो पुस्तका केरीन भविष्यवाणी वात होमेलनू, गवाही आपथु: जर कूण माणुह ज्या वातीमाय काही वोदाडी तर बोगवान ता पिडाहा, जो आवो पुस्तकामाय लिखील हि, तापोर लावीह.

¹⁹ जर कूण ज्या भविष्यवाणीच्या पुस्तकामाय वचनामायरीन काही काडीन टाकील, तर बोगवान ता जीवनाम झाड एने पवित्र नगरी तारीन, ज्यान वर्णन ज्या पुस्तकामाय हि, तान भाग काडीन टाकणे.

²⁰ जो ज्यू वातून गवाही आपथु तो हे किथे, “हा, मी जेल्दी आवूह हि” आमेन. हे प्रभु यीशु आव!

²¹ प्रभु यीशुन कृपा पवित्र माणहा हेरी रेंय. आमेन.