प्रकाशितवाक्य 20 - नाहाली

हजार वर्षान राज्य

¹ ओवतो पोशो मी एक स्वर्गदूताह स्वर्गामाय रीन उतेरतालो देखील, तान आथामाय अथाह कुंडान किल्ली एने एक मोठली हाकूल एती.

² तो ता अजगर, म्हणजे जुना गेयळेक, जो दियाबल एने शैतान हि, देरावीन हजार वोवडान केरता बाधील आपील,

³ एने तांह अथाह कुंडामाय टाकीन बोंद केर देना एने तां पोर शिक्को मार देनो, का तो हजार वोर्ह्या पुरा एने वोर जाती-जातीन माणहाह उवतू नाय बोरमावी. ज्यान बादमाय खेरी हि काय थोडाक टाईमान केरीन उंजू उगाड देती.

⁴ ओवतो मी आसने देखील, एने तापोर माणहे बोहीन गीया, एने ताह न्याय केरणेन अधिकार आपील गीया. मी तान आत्माना पुण देख्यो, तान मुंडे यीशुन गवाही आपिन एने बोगवानान वचनमाय कारण से काटील गीया एता, एने तान केरता पुण ता जीव, एने ता तान मूर्ती पूजा केरील नाहां एती एणेन तान जीव आपणो निडालापूर एने आथापुर लीईल एती. ते जीवतालू एय मसीहा हेरी हजार वर्ष ताहवोर राज्य केरतीन रेणा.

⁵ जेवीवोर हे हजार वर्ष पुरो होवो ताहउर बाकी मुरील मायरीन जीवतालू नाहं उठी. हे तर पेल्ला पुनरुस्थान हि.

⁶ धन्य पवित्र ते हि, जे पेल्ला आवो पुनरुस्थानाचे भागीदार हि. ओहलापूर दिहिरी मुरील कायीच अधिकार नाहं, पुण ते बोगवानान एने मसीहान याजक एय एने तान हेरी हजार वो-यावोर राज्य केरुहू.

शैतानान विनाश

⁷ जेहीकाय हजार वर्ष पुरो एय गीयो तर शैतान केदिमरीन आवी.

⁸ तो ता जातीही जे पृथ्वीन चासवुगे एती, म्हणजे वातू एने मागोगला ज्यान संख्या समुद्राम रेटायेतकेहे एय, ठकवावयास लेडानेगीयु एक्ठाच केरणेन केरता नीही.

⁹ ता आखा पृथ्वीपोर फेयलीन पवित्र माणहान सावुलू एने प्रिय नगरीला घेरून लेहु; एने आकठाम स्वर्गामाय रीन उतरीन ताह नष्ट केरुहू.

¹⁰ ताह ठोकाड्नारो शैतान आकठाम एने गंधकाच्या काटे, ज्यामाय तो जीव एने झुठो भविष्यवक्ता पुण एती टाकील जाहू; एने ते रातेनदीही पिडीन पिडी पीडामाय तोद्पितलो रेहू.

मोठलो धोवल्यो सिहासन एने आखरी न्याय

¹¹ ओवतो मी एक मोठा दोवल्या राजासन एने ताह, जो तापोर बोहील हि, देखू; तान ओगाणरीन पृथ्वी एने आकाश पोडीन गीया, एने तान केरता जागो नाहं जुडी.

¹² ओवतो मी आत्या मोठा आखा मुरील ताहरीन सिंहासनान ओगांण उबराखाडील देखील, एने पुस्तक उघाडनेमाय आवी; एने पोशी एक उंजू पुस्तक उघाडनेमाय आवी, म्हणजे जीवनान पुस्तक; एने जोहलो ता पुस्तकामाय लेखील एतो, तोहोलोच तान कामापोररीन मुरीलान न्याय एनो.

¹³ समुद्रान ता मुरीलाह जे तामायरीन एता आपील, एने मृत्यू एने अधोलोकांनी ता मुरीलाह जे ज्यामाय एता आपील; एने तामायरीन प्रत्येक जमाहा कामापुररीन तान न्याय किरील गीयो.

¹⁴ मृत्यू एने अधोलोक आकठाम काटे टाकील गीया. हि आखटाहेर्यो सरोवर दिहरा मृत्यू हि;

¹⁵ एने जा कुणीन नाव जीवनान पुस्तकामाय लिखील नाय सापडी, ताह आकठान कुंडामाय टाक देना.