प्रकाशितवाक्य 2 - नाहाली

इफीसाह संदेश

¹ “इफिसुस ने कलीसियान दूताह ज्यो लिख” “जा सात तारा आपणा जेवड्या आथाम लेईन मिलील एता, एने डाखरे हेरी समयामाय फिरीन एतो, तो हे किथे कि.”

² मी तारो कामे, एने तारो मेहनत, एने तारो धीरान ओळखणे; एने जे पुण तू वाईट माणहाह देखहुं नाहं शकत, एने जो आपणा जीवाह प्रेरित केरणू, एने हि नाहं, ताह तू ओलखिन ठेगणे देखील.

³ तू धीर देरणे, एने मारो नावाकेरता दुख विसीन विसीन थकनु नाहं.

⁴ पुण माहु तार विरुद्ध हे केणेन हि कि तू आपणा पेल्ला प्रेम सोडीन दियील हि.

⁵ ज्यानकेरता एर किर का तू कारीन पोडील हि, एने मोन फिराव एने पेल जां कामे केरील ता पोशा केर. जर तू मोन नाय फिरावही, ते मी तुवा फाय आवूह एने तारी समई तीन जागे रीन काड लेह.

⁶ पुण होव, तुमरीम हि वात तर हि का तू निकलाइतांन कामांन घृण करने. जा से मी भी घृणा करने.

⁷ जान कान रेंय तो होमली लिवू का आत्मा कलीसियाह तारीन काय किथे. जो जय मिलिन, मी ताह जीवनान झाडमायरीन जो बोगवानान स्वर्गान माणहान हि, फोल खाणेन आपुह.

स्मुर्णाह संदेश

⁸ “स्मुर्णान कलीसिय दूताह ज्यो लिख” “जो पेल्लो एने शेवेट हि, जो मोरीन गीयो एतो एने ऐवी जीवतालू एईन गीयो हि, तो हे किथे कि”

⁹ मी तारो क्लेश एने लुलो ओळखणे पुण तू धनी हि एने जे माणहे आपणा जीवाह यहूदी केणु एने नाहं, पुण शैतानान आराधनालय हि, तान निंदाला पुण ओळखणे

¹⁰ जे दुख माहु सहन केरणे लागी, तापुररीन कूण बिऊ मा. काहाकाय देखू शैतान तुमरो मायरीन काही जेलीमा टाकणे हि काहाकाय कि तुमूह पारखिलु जाऊ; एने तुमूह दहा दिह ताहवोर क्लेश उठाडने पोडी. जीव आपल्यो ते विच विश्वासी रीवू, तर मी तुवाह जीवनान मुकूट आपुह.

¹¹ जान कान रेंय तो होमली लिवू कि आत्मा कलीसियाह काय केणे. जो जय जुडणे, ताह दिहीरा मोरणान हानी नाहं पोचाडने.

पुर्गमानाह संदेश

¹² “पुर्गमान कलीसियाह दूताह ज्यो लिख” “ज्यान आहनी दुधारी एने तेज तलवार हि, तो हे किथे कि.”

¹³ मी हे ओळखणे कि तू तिथ रेणे जांबी शैतानाच सिंहास हि; तू मारो नावापुर स्थिर रेणे, एने मारपुर विश्वास केरणेसे ता दुयोमाय पुण पासाण नाहं एनो ज्यानस माय मारो विश्वास योग्य गवाही अंतीपा, तुमरो माय तान स्थानापुर घात केरील गीयो जांबी शैतान रेणे.

¹⁴ पुण माहु तार विरुद्ध किही वातू केणेन हि, काहाकाय का तारो न्या काही इही हेते, बलमाच्या चेलाना होमोलनु, तान केरता बिलामाला इस्राएलच्या सुमोर ठोकराचे कारण मेलणे हिकाळनेल का मूर्ती पुर बलीदान वस्तु खा एने व्यभिचार केरू.

¹⁵ तोहोलोच तारो न्या काही इही हेते, जो निकलाइतांन शिक्षणाला होमोलनु.

¹⁶ अंत: मोन फिरीन, नाहं तर मी तारो आहने तालतालेत आवीन आपणा मुखाची तलवार केरीन तान हेर्यो युद्ध केरूह.

¹⁷ जान कान रेंय तो होमली लिवू का आत्मा कलीसियाह काय किथे. जे जय मिलिन तान मी गुफ मान्नामधून आपुह, ऐवी ताह एक पाडील दिगुड पुण आपुह; एने ता देगडापूर एक नाव लिखील रेंय, ज्याह तान मिलविनाराहा शिवाय एने कुनुस ओलखु नाहं.

थुआतीराह संदेश

¹⁸ “थूआथीरा कलीसियान दूताला हे लिख” “बोगवानान सोरो ज्यान डोला आगठान ज्वालान हारका, एने ज्यान पाय हाजो पितलीन हारका हि, तो हे किथी हि का.”

¹⁹ मी तारो कामाम, तारो प्रेम एने विश्वास एने सेवा एने धीर, ला ओळखणे एने हे पुण का तारो पासाण काम पेल्ला तारीन वोदिन हेते.

²⁰ पुण माहु तार विरुद्ध हे केणेन हेते का तू ता बायकू इजबेल ला रेहू आपथु जो आपणा जीवाह भविष्यवक्ता केणे का, एने मार दासाह व्यभिचार केरणे एने मूर्तीन ओगाण बलीदान केरील वस्तु जेवण खाणु हिकाडीन आपल्या.

²¹ मी ताह मोन फिरावणार केरता टाइम आपील, पुण तो आपआपा व्यभिचाराने मोन फिरिनतलु नाहं इछां.

²² देखू, मी तीह आथरील खीळलेली ओहलो केरूह; एने जो तारो हेरी व्यभिचार केरणू केध्दीह ते पुण तान काम केरणे मोन नाहं फिरिनिले तर मी ताह मोठली क्लेशामाय टाकील.

²³ मी तीन सोराह मारीन टाकील; तेवी आखा कलीसिया, सोमजी लेती का हृद्य एने मोनान पारखणार मीच हि, एने मी तुमरो मायरीन आखाहाज तान काम नुसार फोल आपुहू.

²⁴ पुण तुमूह थूआथीराच्या उगरील माणहाह जोला, जिस शिक्षणाला नाहं मोनाम एने ता वातुहू ज्याह शैतानान उंडो वातू किथी नाहं ओलकतेह, हे किथे का मी तुमरे पोर उंजू बारो नाहं.

²⁵ पुण होव, जो तुमरे आहने हि ताह मारा आवहू ताहवोर थोबाडीन मेलू.

²⁶ जो जय मिलिन मारो कामान नुसार शेवेट ताहवोर केरतीन रेंय, मी ताह जाती जातीन माणहांपोर अधिकार आपुह,

²⁷ एने तो लोखंडाचा राजदण्ड मागिल तापोर राज्य केरूह, ज्या प्रकारे कुंभार माटळ्या बिगेर ठाम्बला चुरो चुरो एय जातेह: मी पुण ओहलोच अधिकार आपणा पित्या फायरीन मिळवील हि;

²⁸ एने मी ताह वेगीस ने तारू आपुह.

²⁹ जान कान रेंय तो होमेल लिवू का आत्मा कलीसिया काय किथे.