प्रकाशितवाक्य 13 - नाहाली

दुय जीव

¹ तेवी मी एक जीव शैतान समुद्रामायरीन निकेलतेन देखील, ज्यान दहा हिगे एने सात मुंडे एता. तान शिंगांपुर दहा मुकूट, एने तान मुंडीपोर बोगवान निंदान नावे लेखली एती.

² जे जीव मी देखील ते चित्यासारिखे एता; एने तान पाय रीसाडासारखे एता, एने मूय सिंहान सभेकेरिन एता. ता अजगरान आपणी सामर्थ्य, एने आपणा आसन एने मोठा अधिकार ताह आपील.

³ मी तान मुडीपुरीन एकापुर इही दुखाईल लागिल देखील होमजू तो मोयलो एतो, ओवतो तान प्राण घात दुखाईल हाजो एनो, एने आखा जोमनिन माणहे ता जीवान पासाण-पासाण नवल केरतीन गीया.

⁴ माणहान अजगरान पूजा केरील, काहाकाय ता जीव आपणो अधिकार आपील, एने हे केयीन जीवान पूजा केरील, “आवो जीव सारकोस कूण हि? कूण याहेर्यो लडू शकणे?”

⁵ मोठो बोल बोलणे से एने निंदा केरणेन केरता ता जीवाह एक मूय आपील हि, एने ताह चालीह एने दुय मोरना वोर काम केरणेन अधिकारी आपील हि.

⁶ ता जीवाह बोगवानान निंदा केरणेन केरता मूय उघाडील का तान नाव एने तान तम्बू म्हणजे स्वर्गाम रेणारान निंदा केरणू.

⁷ ता जीवाह अधिकार आपील हि, का पवित्र माणहा हेऱ्यो लेढाय एने तापोर जय मिलावी, एने ताह हरेक कूल एने माणहे एने भाषा एने जातीपूर अधिकार आप दियील हि.

⁸ पृथ्वी पुर तां आखा रेणारे, जान नाव ता कोकऱ्यान जीवनान पुस्तकामाय लेखाय नाहं गीया, जी जगान उत्पतीन टाईमें घात इयील एती, ता जीवान पूजा केरती.

⁹ ज्याह कान रेंय तो होबंली.

¹⁰ ज्याह कैदेत जाणू हि, ते बंदीजाय; जे तेलवार केरीन मारुह, अवश्य हि कि ते तेलवार केरीन मारील जाहो पवित्र माणहान धीर एने विश्वास ज्योच माय हि.

¹¹ ओवतो मी एक उंजू जीव ला पृथ्वी उपेर आव तालून देखील, तान कोकऱ्या हारीखे दुय हिंग एती, एने ते अजगराआ हारीखे बोलीह एता.

¹² तो ता पेल्ला जीवचा आखा अधिकार तान ओगाण कामाम आवीन लेणे; एने पृथ्वी एने तान रेणारे ता पेल्ला जीवाची तान प्राण घात दुखाईल हजो एय गीयो एता, मूर्ती पूजा केरतीन एता.

¹³ एने तो मोठला-मोठला चिन्ह देखाळतालु, न्यावोर का माणहान ओगांण स्वर्गामाय रीन पृथ्वीपोर आक्ठान लाव पाडतालू

¹⁴ ता चिन्हान कारण से, ज्याह जीवान ओगांण देखाडील अधिकार ताह आपील गीया एता, तो पृथ्वीपोर रेणाराह ढगवत एतो एने पृथ्वीपोर रेणारा किथी एतो कि ज्या जीवाची तलवार लागिल एती तो जीवतालू एनो हि, तान मूर्ती बोणावू.

¹⁵ ताह ता जीवी मूर्तीमाय जीव टाकणेन अधिकार आपील गीया, कि जीव मूर्ती बोलहू लागणार, एने जोलो माणहे ता जीव मूर्तीइ पूज्या नाहं केरणार, ताह मारीन टाकणे.

¹⁶ एने ता आत्या मोठा, मालदार-गोरिब, हाजो दास आखान हाजाडी आथ किव्हा तान निडालापूर एक एक खुण केरीन आपील,

¹⁷ कि ताह सोडीन ज्यापूर खुन म्हणजे ता जीव नाव केव्ही तान नावान संख्या ओहलो, तान शिवाय कूण आपणेमेल्णुन केरूह शकणार.

¹⁸ बुद्धी याजमाय हि: ज्याह बुद्धी रेंय तो ज्यो जीव संख्या जोडीन लेजी, काहाकाय ता माणाहान संख्या हि, एने तान संख्या सहाशे सासष्ट ओहलो हि.